Beno sala milolo na Tata ya beto, beno ntoto nyonso
Samu na mutwadisi ya bayimbi. Mukunga. Nkunga.
Ba ke bokila bantu nyonso ya ntoto na kutala kima mosi yina Tata ya beto salaka: yandi kumisaka mubu ntoto ya kuyuma. Na manima ndinga ke baluka na kimbangi ya muntu mosi — ba mekaka beto mpe ba petisaka beto mutindu palata, bantu yulukaka na zulu ya mintu ya beto, mpe yandi nataka beto na kisika ya kufuluka.
66 1Beno sala milolo ya nsayi na Tata ya beto, beno bantu nyonso ya ntoto! 2Beno yimbila nkembo ya nkumbu ya yandi; beno sala ti masiika ya yandi kuvwanda ya nkembo. 3Beno tuba na Tata ya beto: «Mavanga ya nge kele ya nsisi mingi! Na ngolo ya nge ya nene bambeni ya nge ke tekita na mantwala ya nge. 4Bantu nyonso ya ntoto ke sambilaka nge mpe ke yimbilaka samu na nge; bawu ke yimbila nkumbu ya nge.»
5Beno kwiza mpe beno tala bisalu ya Tata ya beto, yandi kele muntu ya nsisi na mavanga ya yandi na sika ya bantu nyonso. 6Yandi kumisaka mubu ntoto ya kuyuma; bawu sabukaka nzadi na makulu. Kuna, beto yangalalaka na kati ya yandi. 7Yandi ke yala na ngolo ya yandi tii seko; meso ya yandi ke kengidila bayinsi— bika bantu ya kiyala kudizangula ve.
8Beno sakumuna Tata ya beto, beno bantu nyonso; bika muningu ya masiika ya yandi kuwakana, 9yandi yina me bumba beto na kati ya bantu ya moyo mpe me bika ve makulu ya beto kubwa. 10Samu ti nge, Tata ya beto, me meka beto; nge me petisa beto mutindu ba ke petisaka palata. 11Nge nataka beto na kati ya mpwasa; nge tulaka kiyeko ya kilo na mikongo ya beto. 12Nge bikaka bantu kuyuluka na zulu ya mintu ya beto; beto lutaka na kati ya tiya mpe na kati ya maza, kasi nge me basisa beto na kisika ya bima mingi. a a v12 «Kuyuluka na zulu ya mintu ya beto» kele mpova ya ntama ya kutendula kuvwanda ya kununga mpenza mpe ya kuvwanda na nsi ya luyalu.
13Mu ke kwiza na yinzo ya nge ti minkayulu ya kuyoka; mu ke futa bansilulu ya munu na nge, 14bansilulu yina bikoba ya munu tubaka mpe yinwa ya munu silaka ntangu mu vwandaka na mpasi. 15Mu ke pesa nge minkayulu ya kuyoka ya bibulu ya mafuta, ti mulinga ya mameme ya mbakala yina mu me pesa munkayulu; mu ke pesa bangombe ya mbakala mpe bankombo.
16Beno kwiza mpe beno wa, beno nyonso yina ke zitisaka Tata ya beto, mpe mu ke zabisa beno mambu yina yandi me sala samu na mwela ya munu. 17Mu bokilaka yandi na yinwa ya munu, mpe masiika ya nene vwandaka na ludimi ya munu. 18Kana mu vwandaka kuzola masumu na ntima ya munu, Mfumu Tata zolaka kuwa munu ve. 19Kasi ya tsyelika, Tata ya beto me kuwa munu; yandi me wila lusambulu ya munu. 20Nkembo na Tata ya beto, yina me manga ve lusambulu ya munu mpe me katula ve luzolo ya ngwisani ya yandi na munu!