ኣቱም ኵላ ምድሪ፥ ንኣቦና እልል በሉ

ንመራሒ ዜማ። ደርፊ። መዝሙር።

ኵላ ምድሪ ኣቦና ንሓደ ዝገበሮ ነገር ክትርኢ ተፀዊዓ፦ ባሕሪ ናብ ንቑፅ ምድሪ ተለወጠ። ድሕሪኡ እቲ ድምፂ ናብ ናይ ብሕቲ ምስክርነት ይፀብብ — ከም ብሩር ተፈቲንና ተፀሪና፥ ሰባት ኣብ ልዕሊ ርእስና ሓለፉ፥ ንሱ ኸዓ ናብ ፅጋብ ኣውፅአና።

ምዕራፍ 66።

ኣቱም ኵላ ምድሪ፥ ንኣቦና ብሓጐስ ዕልል በሉ! ክብሪ ስሙ ዘምሩ፤ ምስጋናኡ ኽቡር ግበሩ። ንኣቦና ከምዙይ በልዎ፦ “ግብርታትካ ኽንደይ ዘፍርሕ እዩ! ብብዝሒ ሓይልኻ ፀላእትኻ ኣብ ቅድሜኻ ይግዕዙ። ኵላ ምድሪ ትሰግደልካን ትዝምረልካን፤ ንስምካ ድማ ይዝምሩ።”

ንዑ፥ ግብርታት ኣቦና ርኣዩ፤ ንሱ ኣብ ኵሉ ሰብ ዝገብሮ ግብሪ ዘፍርሕ እዩ። ንባሕሪ ናብ ንቑፅ ምድሪ ለወጠ፤ በቲ ፈለግ ብእግሮም ሓለፉ። ኣብኡ ድማ ብእኡ ተሓጐስና። ብሓይሉ ንዘለኣለም ይገዝእ፤ ኣዒንቱ ኣብ ኣህዛብ ይሕልዋ፤ እቶም ዓመፀኛታት ርእሶም ኣይልዐሉ።

ኣቱም ኵሎም ህዝብታት፥ ንኣቦና ባርኽዎ፤ ድምፂ ምስጋናኡ ኣስምዑ፤ ንሱ ኣብ ማእኸል ህያዋን ዓቂቡና፥ ነእጋርናውን ኽትስናኸል ኣይሓደገን። ኦ ኣቦና፥ ንስኻ ፈቲንካና ኢኻ እሞ፤ ከምቲ ብሩር ዝፅረየሉ ኣፅሪኻና። ናብ መርበብ ኣእቲኻ፥ ኣብ ሕቖና ኸቢድ ፆር ኣሰከምካና። ሰባት ኣብ ልዕሊ ርእስና ክፀዓኑ ገበርካ፤ ብሓዊን ብማይ ሓለፍና፥ ግናኸ ናብ ቦታ ፅጋብ ኣውፂእካና። ^a

ናብ ቤትካ ምስ ዚቃፀል መስዋእቲ ክኣቱ እየ፤ መብፅዓ ድማ ክፍፅመልካ እየ፤ እቲ ከናፍረይ ዝተዛረባኦ፥ ኣፈይ ድማ ዝተመባፅዖ መብፅዓ፥ ኣብ መከራ ኣብ ዝነበርኩሉ ጊዜ እዩ። ናይ ስቡሓት እንስሳ ዚቃፀል መስዋእቲ ኸቕርበልካ እየ፥ ምስ ትኪ ዝሕረድ ማጓሉ፤ ኣብዑርን ኣጣልን ከቕርብ እየ።

ኣቱም ንኣቦና እትፈርሁ ዅልኻትኩም፥ ንዑ ስምዑ፤ ንነፍሰይ ዝገበረላ ኸዓ ክነግረኩም እየ። ብኣፈይ ናብኡ ኣእዌኹ፤ ላዕለዋይ ምስጋና ድማ ኣብ ልሳነይ ነበረ። ኣብ ልበይ ሓጢኣት ኣፍቒረ እንተ ዝነብር፥ ጐይታ ኣቦ ኣይምሰምዐንን። ኣቦና ግና ብሓቂ ሰሚዑ እዩ፤ ንድምፂ ፀሎተይ ሰሚዑ እዩ። እቲ ንፀሎተይ ዘይነዓቐ፥ ምሕረቱውን ካባይ ዘየርሓቐ ኣቦና፥ ይባረኽ!