詩篇 66

66 ¹ 全地啊，你哋要向我哋嘅父歡呼！ ² 要歌頌佢名嘅榮耀， 要將榮耀歸畀對佢嘅讚美。 ³ 你哋要對我哋嘅父講：「你所做嘅事真係威嚴可畏！ 因住你嘅大能， 你嘅仇敵都喺你面前縮埋一嚿。 ⁴ 全地都敬拜你，向你歌頌； 佢哋歌頌你嘅名。」細拉

⁵ 你哋嚟睇吓我哋嘅父所做嘅事，佢向世人所行嘅係咁威嚴可畏。 ⁶ 佢將海變成乾地， 佢哋就徒步行過條河。 喺嗰度我哋因佢而歡喜快樂。 ⁷ 佢用佢嘅大能永遠掌權，佢嘅眼目監察列國—— 叛逆嘅人唔好自高自大。細拉

⁸ 萬民啊，你哋要稱頌我哋嘅父， 等對佢嘅讚美聲畀人聽見， ⁹ 佢保守我哋嘅性命，唔畀我哋嘅腳滑跌。 ¹⁰ 我哋嘅父啊，因為你試驗過 我哋，你熬煉我哋好似熬煉銀咁。 ¹¹ 你將我哋帶入羅網， 將沉重嘅擔子壓喺我哋嘅背脊上面。 ¹² 你容許人騎喺我哋嘅頭上； 我哋經過水火， 但你終於帶我哋出到豐盛之地。 ^a a v12 「騎喺我哋嘅頭上」係古時嘅講法，形容被人完全轄制同征服。

¹³ 我要帶住燔祭入你嘅殿， 我要向你還我嘅願， ¹⁴ 就係我嘅嘴唇所講、我個口所應承嘅願， 喺我遇難嗰陣。 ¹⁵ 我要將燔祭獻畀你， 就係肥壯牲畜嘅燔祭，連同公綿羊嘅馨香煙氣； 我又要獻上公牛同山羊。細拉

¹⁶ 凡敬畏我哋嘅父嘅人啊，你哋都嚟聽吓，等我講吓佢為我個靈魂所做嘅事。 ¹⁷ 我用個口向佢呼求， 我條脷就高聲讚美佢。 ¹⁸ 我心裏面若果珍藏住罪孽， 至高嘅父就唔會聽我。 ¹⁹ 但我哋嘅父確確實實聽咗，佢已經留心聽我嘅禱告。 ²⁰ 願我哋嘅父受稱頌，因為佢冇拒絕我嘅禱告， 亦都冇將佢嘅約中慈愛從我身上收番！