Mikunga 66 FHB Father's Heart Bible™

66 ¹Lubokilenu kwena Tata wetu mu kyesi, benu tsi yosu! ²Luyimbilenu khembu ya khumbu yandi; lukitulenu lukumu lwandi lwa khembu. ³Luzimbwadilenu Tata wetu: «A buna mihangu myaku mitsisidi! Mu ngolu zaku za mbuta bambeni baku badikulumuna ku thwala yaku. ⁴Tsi yosu yisi kufukamina amana yisi kuyimbila mikunga kwena ngeyi; yisi yimbila mikunga mya lukumu kwena khumbu yaku.»

⁵Alwisenu lutala bisalu bya Tata wetu, yandi kenina wa tsisi mu mihangu myandi kwena batu boosu. ⁶Wákhitula yanga dya mbuta dyákituka mafu máyumuka; báhyokila nzadi mu malu. Kuna twásangwala mwena yandi. ⁷Wisi yala mu ngolu zandi mvula yi mvula; mesu mandi masi tanikina makanda— bakolami kabaditombulaku.

⁸Lusakumunenu Tata wetu, benu batu ba tsi zoosu; ndinga ya lukumu lwandi yayukakana, ⁹wuna wutukebidi hana kati dya bazinga, amana kayambudiku malu metu makhukuka. ¹⁰Mukuma ngeyi, Tata wetu, wutumeki; wututomisi hanga bwosu bisi tomisa mbongu mu mbawu. ¹¹Wutukotisi mu wanda; wutheka kizitu kya phasi hana makunda metu. ¹²Wuyambudi batu báhyokila hana mitwa myetu; twáhyokila mu mbawu yi mu mamba, kaasi wutukatudi ku homa ha mavwa ma lawu-lawu. ^a a v12 «Bahyokila hana mitwa myetu» yenina mbandu ya ndinga ya khulu yina yisongila kuyalwa kwabuluta yi kukitulwa bampika.

¹³Yikwísa mu nzu yaku ni bimenga bya kuyoka; yifúta ndefi zama kwena ngeyi, ¹⁴ndefi zina malebu mama mázonza amana munwa wama wásila muna tangwa yákala mu biwayi. ¹⁵Yitámbika kwena ngeyi bimenga bya kuyoka bya bambisi ba mafuta, ni mwisi wa mameme ma kimenga; yitámbika miluma mya bangombi yi bakhombu.

¹⁶Alwisenu luyuka, benu boosu lwisi tina Tata wetu, amana yisámuna mana kahangini kikuma kya luzingu lwama. ¹⁷Yákalunga kwena yandi ni munwa wama, amana lukumu lwa mbuta lwákala hana lulaka lwama. ¹⁸Yuka ni yázolaka disumu mu mbundu yama, Pfumu Tata kakhanaku kuyuka. ¹⁹Kaasi kyedika Tata wetu wuyuki; wuhinikini lombilu lwama. ²⁰Tata wetu kasakumuka, wuna kalosiku lombilu lwama amana kakatudiku khenda yandi ya bulunda kwena meni!