Ngalei Hupva̱, Ithumwui Avāli Vaolu
Laa sāme kathānali. Laa akha. Laa lairik akha.
Okathui saikorana ithumwui Avāna sākahai ot akha yanglu da kaso: ngayi chi ngalei katheng ngasāhaira. Chieina tui chi mikumo akhawui sākhi ngasāda ngathuma — ithumli chāng yangda lupā langhai thāda langhaira, mibingna ithumwui kuitungli tongzata, kala ana ithumli haklak khalei apamli khuishokhaira.
66 1Ngalei hupva̱na ithumwui Avāli mathānda vaolu! 2Awui ming tekhamateili laa sālu; awui masot tekhamatei ngasaklu. 3Ithumwui Avāli hānglu, "Nawui otsak kayākha khangachee khangachāla! Nawui hakkhamahā pangshap eina nawui yangkashebing chi nawui mangāli ngayuma. 4Okathui saikorana nali khorumra kala nali masotlaa sāra; athumna namingli masotlaa sāra."
5Rālaga ithumwui Avāwui ot yanglu, ana mi saikorawuitungli awui ot sakhame chi khangachee khangachāna. 6Ana ngayili ngalei katheng thāda ngasaka; athumna kong chi phei eina zata. Apam chili ithumna awui vang ringphai. 7Ana awui pangshap eina mashimānla mungra; awui mik eina miyurbingli rimpamra— ngakaikashebing chi khalatta makhāngkālu.
8Mi saikora, ithumwui Avāli solu; awui masotwui khon shāranu, 9Ana ithumli kharingabingwui alungli mayonmi, kala ithumwui pheili manganaithui ngasakmana. 10Kaja na, ithumwui Avā, ithumli chāng yanghaira; lupāsā langhai thāda nana ithumli langhaira. 11Nana ithumli khalen lungli khuirai; ithumwui khumkhorli otphun kharit sangmihaira. 12Nana mibingli ithumwui kuitungli tongngasaka; ithumna mei kala tara̱ lungli ngaruivāhaira, chithālala nana ithumli haklak khalei apamli khuishokhaira. a a v12 "Ithumwui kuitungli tong" hi aruihon tuina, katong eina munghami kala hamsang ngasak kahaiwui pao chihānna.
13Ina rikkatā kachigat zangda nawui shimli rāra; ina iwui ngashit kahai chi nali mira, 14imorchaina matui kala ikhamorna hānga kahai ngashit chi, iwui kakhanang tharan. 15Asākakā sābingwui rikkatā kachigat, chigatki yaovāwui meikhut zangda, ina nali chigatra; Ina mukvā kala me chigatra.
16Rāda nganālu, ithumwui Avāli khangacheebing saikora, kala ana imanglāwui vang khi sākahai chi ina hāngra. 17Ina ikhamor eina ali ngakaowa, kala awui masot khāngkahai imaleli lei. 18Ina iwui wuklungli morei leishiakha, Proho Avāna manganāmara. 19Kha kachangkhat eina ithumwui Avāna nganāhaira; ana iwui seihā kasā khuisangmihaira. 20Ithumwui Avāli sochikatranu, ana iwui seihā kasā makhalanmana, kala awui makhangachei leikashi iwui eina makhuithuimana!
