Salmo 66

66 ¹Panaghugyaw sa kalipay ngadto sa atong Amahan, tibuok kalibotan! ²Awita ninyo ang himaya sa iyang ngalan; himoa ninyong mahimayaon ang pagdayeg kaniya. ³Ingna ninyo ang atong Amahan, “Pagkakahibulongan sa imong mga buhat! Pinaagi sa imong dakong gahom ang imong mga kaaway mangurog sa kahadlok sa imong atubangan. ⁴Ang tibuok kalibotan nagsimba kanimo ug nag-awit sa mga pagdayeg kanimo; nag-awit sila sa pagdayeg sa imong ngalan.”

⁵Dali ug tan-awa ninyo ang mga buhat sa atong Amahan, kahibulongan sa iyang mga gibuhat ngadto sa tanang katawhan. ⁶Gihimo niya ang dagat nga mamala nga yuta; milatas sila sa suba nga naglakaw. Didto nagmaya kita diha kaniya. ⁷Nagmando siya pinaagi sa iyang gahom hangtod sa kahangtoran; ang iyang mga mata nagbantay sa mga nasod— ayaw tugoti nga magpagarbo ang mga masinupakon.

⁸Dayega ninyo ang atong Amahan, tanang katawhan; ipabati ninyo ang tingog sa pagdayeg kaniya, ⁹nga nagtipig kanato taliwala sa mga buhi ug wala motugot nga madalin-as ang atong mga tiil. ¹⁰Kay ikaw, among Amahan, nagsulay kanamo; gilunsay mo kami sama sa paglunsay sa pilak. ¹¹Gidala mo kami ngadto sa pukot; gibutangan mo ug mabug-at nga palas-anon ang among mga likod. ¹²Gitugotan mo ang mga tawo nga magkabayo ibabaw sa among mga ulo; miagi kami sa kalayo ug sa tubig, apan gidala mo kami ngadto sa dapit sa kadagaya. ^a a v12 Ang “magkabayo ibabaw sa among mga ulo” maoy karaang ekspresyon alang sa pagkabuntog ug pagkaulipon sa hingpit.

¹³Mosulod ako sa imong balay dala ang mga halad nga sinunog; tumanon ko ang akong mga panaad kanimo, ¹⁴ang mga panaad nga gilitok sa akong mga ngabil ug gisaad sa akong baba sa dihang ako anaa sa kasamok. ¹⁵Maghalad ako kanimo ug mga halad nga sinunog sa pinatambok nga mga mananap, uban sa aso sa mga laking karnero nga gihalad; maghalad ako ug mga torong baka ug mga kanding.

¹⁶Dali ug paminaw, kamong tanan nga nahadlok sa atong Amahan, ug isugilon ko kaninyo kon unsa ang iyang gibuhat alang sa akong kalag. ¹⁷Mitu-aw ako kaniya pinaagi sa akong baba, ug ang taas nga pagdayeg diha sa akong dila. ¹⁸Kon gipakamahal ko pa ang sala diha sa akong kasingkasing, ang Soberanong Amahan dili unta maminaw. ¹⁹Apan sa pagkatinuod ang atong Amahan namati; gipatalinghogan niya ang akong pag-ampo. ²⁰Dalaygon ang atong Amahan, nga wala magsalikway sa akong pag-ampo o magkuha sa iyang gugmang walay paglubad gikan kanako!