Gotha prithibi, amar Pitri ke hala koribi

Gana cholawa mukhyo manuh nimite. Ekta gana. Ekta bhajan.

Pura prithibi ke ekta kaam saabole matise jun amar Pitri korise: samundar sukha mati hoi jaise. Etu pichete awaj tu nijor gawahi te ahise — amikhan ke porikha korise aru chandi nisena sapha korise, manuh khan amikhan laga mur uporte ghora chola ise, aru Tai amikhan ke bisi bhorpur thaka jaga te ulai anise.

Adhyay 66.

Gotha prithibi, amar Pitri ke khushi pora hala koribi! Tar nam laga mohima gan koribi; Tar laga stuti ke mohima-pura banabi. Amar Pitri ke kobi, “Apuni laga kaam khan kiman asurit ase! Apuni laga dangor takot pora Apuni laga dushman khan Apuni age te thartharai ase. Gotha prithibi Apuni ke aradhana kore aru Apuni ke stuti gan kore; tarkhan Apuni laga nam te stuti gan kore.”

Ahhibi aru amar Pitri laga kaam khan sabi, sob manuh khan nimite Tar laga kaam khan asurit ase. Tar pora samundar ke sukha mati bonai dise; tarkhan theng pora nodi paar kori jaise. Ta te amikhan Tar te anondo korise. Tar laga takot pora Tar he hodai raj kore; Tar laga suku khan pora desh khan ke sai thake— biddrohi khan nijor ke untcha na koribo dibi.

Sob manuh khan, amar Pitri ke dhonyo koribi; Tar laga stuti laga awaj huni bole dibi, Kun pora amikhan ke jinda thaka khan majot te rakhise aru amar theng ke phislibo diya nai. Kilemane Apuni, amar Pitri, amikhan ke porikhya korise; chandi ke sapha kora nisena Apuni amikhan ke sapha korise. Apuni amikhan ke jal bhitor te anise; amar pithi te bhari boja rakhidise. Apuni manuh khan ke amar matha uporte uthi bole dise; amikhan jui pora aru pani pora paar hoise, kintu Apuni amikhan ke ekta bhorpur jaga te ulai anise. ^a

Moi jolai diya bolidan loi kene Apuni laga ghor te ahhibo; moi laga kosom khan Apuni ke pura kori dibo, kuntu kosom moi laga oth pora koise aru moi laga mukh pora vachan dise, jitia moi dukh te thakise. Moi Apuni ke mota janwar khan laga jolai diya bolidan dibo, bolidan diya mer khan laga dhuwa logot te; Moi saand goru aru chagol khan dibo.

Ahhibi aru hunibi, amar Pitri ke bhoi kora sob manuh khan, aru Tar pora moi laga atma nimite ki korise moi kobo. Moi laga mukh pora Tar ke moi hala korise, aru moi laga jiba te untcha stuti thakise. Jodi moi laga mon te paap ke sabhal kori rakhise koile, Sob-uporte thaka Pitri huni nathakibo. Kintu hosa pora amar Pitri hunise; Tar pora moi laga prathana ke mani loise. Amar Pitri dhonyo hobi, Kun pora moi laga prathana ke phelai diya nai aru Tar laga vachan laga morom moi pora hatai diya nai!