Laa 65

65 ¹O ithumwui Avā, Zionli masotna kasaikha eina nali ngaraili; kala ithumwui khangashit nali ungshung ngasakra.

²Nana seihā kasā nganā, kala mi saikorana nali rāra. ³Moreina ili kheizata tharan, nana ithumwui khayonkhamāng pheomi. ^a a v3 Ithumwui Avāna hili mi morei pheomi kaji chi, Jishuli ungshung ngasakhaira; ana ithumwui morei awui khalatta tungli khuilaga, chieina ithumli shimshong khuivā ngasak khavaina. ⁴Nana kapangkhuida nali nganaida khuivāda nawui kayāngli okthui khavai a chi sokhamina! Ithumna nawui shimwui kaphāna chipemra, nawui khorumshimwui katharna.

⁵Nana ithumli khamashung khangarongwui khangachee khangachā otsak eina ngahānkā, O ithumli huikhame ithumwui Avā, okathui akatanga saikora kala tāmeikap shamadruwui kachihān, ⁶awui yāng eina kaphungbing sakā kahaina, pangshap eina chonvai sākahaina; ⁷shamadruwui khangang chi chingrihai ngasakkhame, athumwui khangaphaowui khangang, kala yurbingwui rotkhamarāt. ⁸Okathui akatangli kapambingna nawui machutkakhuibingli ngacheerang eina nganingra; nana kazing kathang kala ngazinshong chili panglāk eina vao ngasaka.

⁹Nana ngaleili yangmida tara̱ chaimi; nana chili mavātla chungsang ngasaka. Ithumwui Avāwui kongrei tara̱na pemtinghai; nana mibingli athumwui mā mira, kaja chithāda nana ngalei ngarānhai kahaina. ¹⁰Nana chiwui tinkhurbing tara̱na yingasaka, kala chiwui kajujuibing tāngpat ngasaka; nana chili zingrot eina timfa ngasaka, kala chiwui kashon chi somi. ¹¹Nana nawui kaphāna zingkumli kuihon sangmi, kala nawui shongfabing heiunna pemtinghai. ¹²Lamhāngwui seihomphungbing pemtha̱-pemtai ngasaka, kala phungrābing khamathān eina shaksai. ¹³Wonnui katimpambing yaoshangna chonvai sāhaira, kala tampākbing māna ngaphumhaira; athum panglāk eina vaoda laa sāruma.