መዝሙር 65

65 ¹አባታችን ሆይ፤ በጽዮን ምስጋና በዝምታ ይጠብቅሃል፤ ስእለታችንም ለአንተ ይፈጸማል።

²ጸሎትን ትሰማለህ፤ ሰዎችም ሁሉ ወደ አንተ ይመጣሉ። ³ኀጢአት በወረረኝ ጊዜ፣ ዐመፃችንን አንተ አስተሰረይህ። ^a a v3 አባታችን እዚህ የሚሰጠው ይቅርታ፣ ወደ ቤታችን እንድንመለስ መተላለፋችንን በራሱ ላይ በወሰደው በኢየሱስ ፍጹም ይሆናል። ⁴የመረጥከው፣ በአደባባዮችህ እንዲኖር የምታቀርበው ሰው ብፁዕ ነው። በቤትህ መልካም ነገር፣ በመቅደስህ ቅድስና እንጠግባለን።

⁵የምታድነን አባታችን ሆይ፤ በጽድቅ በሚያስፈራ ሥራ ትመልስልናለህ፤ የምድር ዳርቻዎች ሁሉና የሩቅ ባሕሮች ተስፋ ነህ፤ ⁶በኀይሉ ተራሮችን ያጸና፣ ብርታትን የተጎናጸፈ፤ ⁷የባሕሮችን ጩኸት፣ የሞገዳቸውን ድምፅ፣ የአሕዛብንም ሁከት የሚያረጋጋ። ⁸በምድር ዳርቻ የሚኖሩ በድንቅ ሥራህ ይደነቃሉ፤ ጎህንና ምሽትን በደስታ እንዲዘምሩ ታደርጋለህ።

⁹ምድርን ትጎበኛለህ፣ ታጠጣታለህም፤ እጅግም ታበለጽጋታለህ። የአባታችን ወንዝ ውኃ ሞልቶታል፤ ምድርን እንዲህ አዘጋጅተሃልና ለሰዎች እህላቸውን ታዘጋጃለህ። ¹⁰ትልሞችዋን ታጠጣለህ፣ እርከኖችዋንም ታስተካክላለህ፤ በዝናብ ታለሰልሳታለህ፣ በቀሏንም ትባርካለህ። ¹¹ዓመቱን በበጎነትህ ታቀዳጃለህ፣ መንገዶችህም ጥጋብን ያንጠባጥባሉ። ¹²የምድረ በዳ መሰማሪያዎች ይጎርፋሉ፤ ኮረብቶችም ደስታን ይታጠቃሉ። ¹³ሜዳዎች በመንጋ ተጎናጽፈዋል፤ ሸለቆዎችም በእህል ተከድነዋል፤ በደስታ ይጮኻሉ፣ በአንድነትም ይዘምራሉ።