መዝሙር 64

64 ¹አባቴ ሆይ፤ በሮሮዬ ጊዜ ድምፄን ስማ፤ ሕይወቴንም ከጠላት ሽብር ጠብቅ። ²ከክፉዎች ስውር ተንኰል ሰውረኝ፤ ክፋትን ከሚያደርጉ ጫጫታ ከበዛ ጭፍራ። ³ምላሶቻቸውን እንደ ሰይፍ ይስላሉ፤ መራራ ቃላቸውን እንደ ፍላጻ ያነጣጥራሉ፤ ⁴ነውር የሌለውን ከአድፍጦ ይተኵሱበት ዘንድ፤ ድንገትም ያለ ፍርሃት ይተኵሱበታል። ⁵ክፉ ዐሳባቸውን አጥብቀው ይይዛሉ፤ ወጥመድ ለመደበቅ ይነጋገራሉ፤ “ማን ያያቸዋል?” ይላሉም።

⁶ዐመፅን ያሴራሉ፤ እንዲህም ይላሉ፤ “በሚገባ የተዶለተ ዕቅድ ፈጽመናል።” የሰው ውስጣዊ ዐሳቡና ልቡ ጥልቅ ነው። ⁷አባታችን ግን በፍላጻ ይተኵሳቸዋል፤ ድንገትም ይቈስላሉ። ⁸እንዲሰናከሉ ይደረጋሉ፤ የገዛ ምላሶቻቸው ይመለሱባቸዋል፤ ያዩአቸው ሁሉ ራሳቸውን ይነቀንቃሉ።

⁹ያን ጊዜ ሰው ሁሉ ይፈራል፤ የአባታችንንም ሥራ ይናገራሉ፤ ያደረገውንም ያስተውላሉ። ¹⁰ጻድቅ በአባታችን ደስ ይበለው፤ በእርሱም ይጠለል፤ ልባቸው የቀና ሁሉ በደስታ ይጩኹ!