Chem Danga Kaset Tongnu
Laa kaithangnupa lang. David om Kalum Laa.
Heibi raantoza ga chong gaye — tong ding chem danga kasetnu, koi maaknu mi khat ding inkamga tonu kakhaanu chong bing thanthing danga sat, kasao kabaonu nun na baom kasianu baning ding tuna le mu ngam make diga choitipnu. Ani Pa khouna thanthing khatna haga han tak nge, khatle bani bahak om tong gana bani ding kakhang satlune.
64 1Apa, aom rakannu bi Akhwan ngaisu ngo; munanu om katei bina aring ngaaksian thang ngo. 2Sa maknu nun om inthimga tonu thiraang bina ating inkam thang ngo, kasianu to ongnu nun om kasao kabaonu mi khang bina ating inkam thang ngo. 3Banina bani tong ding chem danga kaset towe; thanthing danga bani kakhaanu chong ding sat lang sengnu, 4koi maaknu ding inkamga ong tupluga sat lang; thei mak daakka khatle kachi makka bani maan ding sate. 5Banina bani kasianu baning ding choitipnu; inkamga thwan thangnu lang chong kabialuga rinne, “Tuna haga mulune?”
6Banina kathing aih chong tup kaleluga rinne, “Anina sei bathiangga rang thangnu baning ding bapung pha thang rwe.” Misa om basung baning khatle balan ga kathuknu nge. 7Atiyeda ani Pa na thanthingna bani ding satlune; thei mak daakka bani liam damlune. 8Bani ket pi basui thang damlune; bani bahak om tong gana bani ding kakhang satlune; haga munu mi bingna bani lu kazinlune.
9Haba nung bi mi bing kachilune; banina ani Pa om chwan ding kasamluga Maanna to damnu bing ga lung baninglune. 10Ririak senu nun ga ani Pa khou karoga Bakhou bachun ding ngo; sung bazenu mi bing ga karoga paoro!