Silemyet ne nyiitaat kalasunet
Eng' kiboitiindetap tyendo. Saamisetap Daudi. Tyeni.
Namei kalasunet eng' silem ak koletei eng' kewek che po poiboiyet. Tuchei Kwandanyo tengekto ak kogas saaet kobun tabanwegap ng'wony, ak yeityo kinor kenyiit kuutweet: iyeemisei terenwek, ilititen ng'etutik eng' poiboiyet, ak kotyen komoswek ak atebwosyek tuwai.
65 1Koriibin kalasunet eng' silem, Kwandanyo, eng' Zion; ak isuldoitoe inyee kaarortaosyekyo.
2Igase inyee saaet, ak kobwa piik tugul olo imiiten. 3Ye kagoterterwa tengekwogik, ki iatonone pistoennyo. a a v3 Nyoetap kaat ne iyachini Kwandanyo olini ko kagosulda eng' Jeso, ne ki koonor pistautikyo kei, si koib acheek kaa. 4Beruuret chiito ne ilewen ak iriikiti si komeny eng' kurgetwogiguk. Kinyiiten myeeindap koong'ung', tiliilindap hekalung'ung'.
5Iwolechi acheek poisyonik che po kwong'eet che po imanda, Kwandanyo ne sarwech, amang'etap tabanwegap ng'wony tugul ak nyanjosyek che loo, 6ne ki tonon tuloonook eng' kimnateennyi, ne kilaakyi kamuktaet; 7ne itililisei kutitap nyanjosyek, kutitap peegwakwak che mildogei, ak ng'walalyetap piik. 8Iywei piik che menyei tabanwegap ng'wony kwang'utiguk; iyae karon ak koskolenyweet kowaach eng' poiboiyet.
9Iriibei inyee emet ak ibisei; itesyi myeeindo abun. Ko nyiitaat peek aineetap Kwandanyo; ibechini piik peegwakwak, amu nooto ye ki ichop emet. 10Iyeemisei terenwekyik ak ilititi ng'etutikyik; inyilildoi eng' ropta ak iberuur minsetennyi. 11Ikerchini kenyiit kuutweet eng' myeeindong'ung', ak kong'irtagei ortinweguk aiyebindo. 12Kong'irtagei susweegap surkwen, ak kirate tuloonook poiboiyet. 13Kilaakyi komoswek keechiirek ak kituch atebwosyek peek; kowaach eng' poiboiyet ak kotyen togeennyi.