Nyensangei Shenbü Sangsem
Chia laubü shuong thükenbou shanga. Dawideibü chia. Chia che.
Nyensang sangsembo tokei khangeida hoba kombünong ngekbü kaona thonda. Seneibü Bouei shabü mangakongko apda hoba kaodak thonbü ka welau ditda, kheijinei meten lolo setshang ka saomaida: kao deiei sopan, shongh shuong olinbüei shanjinan, kombünong hoba yosiyang aei ngekko.
65 1O seneibü Bou, Zion ka nyensang sangsembo no shanga awailetda; hoba no shanga seneibü takletbü joyolabü.
2Nyi welaubü ditda, hoba müt pendou no jungto loulabü. 3Shabü shuongei ngo kailepan kibü chaloua, nyi seneibü rebeka apbukei. a a v3 Ho danko seneibü Bouei kubü shabü apbubü kho Jisu danko haüthüktikei, aoei seneibü shabü haoei lolo künkei, sen chem to leibala shanga. 4Nyi pienbü müt olinbou, hoba nyi nyangko leiban kaibü chemsophanga kilabü. Senei kaibü chem maibüei, kaibü lemshang saopobüei shenlabü.
5Hatlamoklabü saopobü kümsilei shuongei nyi sen to jongaida, O sen khümenbou seneibü Bou, kaodak thonbü pendou hoba yungnyu thonbü shuong pendoueibü maanglem ki, 6aoei haoeibü hauei shongh shuong phokukei, seiei neian kikei; 7aoei yungnyu ngühko, haoeneibü deishou ngühko, hoba phangshuongeibü khonsak tüangti. 8Kaodak thonbüa kibü shuongei kaibü seikümseilei shuong to hatko loda; nyi ngeyang hoba chasem to olinyoko ngekda.
9Nyi kaodak to pangtei hoba deiei naangtida; nyi kho apsileko keibou yeitida. Seneibü Bou shumang dei shenan kia; nyi mütshuong to haoeneibü youshou samda, aishanga kho tegü nyi kaodak lamlekei. 10Nyi kho kaoa deiei sopkutida hoba kho kombünong tangsheitham yeitida; nyi kho lang tapninei sopkutida hoba kho longbü haükuda. 11Nyi po to kaibü maibüei khun antian, hoba kaibü lamnyu shuong naangmaibü sopbojaida. 12Yamlamang nyem shuong sopbojaida, hoba shonghshou shuong olinbüei sholepda. 13Nyem shuong sanshuongei neian kia, hoba pholi shuong youshouei danglepan kia; haoen olinyoko ngekda hoba liko chia lauda.
