Isaias 64

64 ¹O, kon gision mo pa unta ang kalangitan ug manaog, aron matay-og ang mga bukid diha sa imong atubangan, ²sama sa kalayo nga mosunog sa mga igsusugnod ug makapabukal sa tubig—aron mailhan ang imong ngalan sa imong mga kaaway, aron mangurog ang kanasoran diha sa imong atubangan! ³Sa dihang nagbuhat ka ug kahibulongang mga butang nga wala namo damha, mikanaog ka, ug natay-og ang mga bukid diha sa imong atubangan. ⁴Sukad sa karaang panahon, walay nakadungog ni nakasabot pinaagi sa dalunggan, walay mata nga nakakita ug lain gawas kanimo, nga nagbuhat alang sa naghulat kaniya. ⁵Gidawat mo kadtong malipayong nagabuhat sa matarong, nga nahinumdom kanimo samtang naglakaw sila sa imong mga dalan. Apan nasuko ka, ug nakasala kami; dugay na kaming nanaa sa among mga sala—maluwas pa ba kami? ⁶Kaming tanan nahisama sa usa ka tawong mahugaw, ug ang tanan namong matarong nga mga buhat sama sa hugaw nga bisti. Kaming tanan nalaya sama sa dahon, ug ang among mga sala, sama sa hangin, mibanlas kanamo palayo. ⁷Walay bisan usa nga nagtawag sa imong ngalan, nga nagpukaw sa iyang kaugalingon aron mokupot kanimo; kay gitagoan mo ang imong nawong gikan kanamo ug gitugyan mo kami ngadto sa among mga sala.

⁸Apan karon, ikaw ang among Amahan; kami ang yutang-kulonon, ug ikaw ang among magkukulon; kaming tanan binuhat sa imong kamot. ⁹Ayaw pagsuko ug hilabihan, among Amahan, ug ayaw hinumdomi ang among sala hangtod sa kahangtoran. Tan-awa, nangamuyo kami—kaming tanan imong katawhan. ¹⁰Ang imong balaang mga siyudad nahimong kamingawan; ang Zion nahimong kamingawan, ang Jerusalem nahimong biniyaan. ¹¹Ang among balaan ug matahom nga balay, diin ang among mga katigulangan midayeg kanimo, nasunog sa kalayo, ug ang tanan namong gipakamahal nahimong guba. ¹²Human niining tanan, magpugong ka pa ba, among Amahan? Magpakahilom ka ba ug magsakit kanamo sa hilabihan?