Isaiah 64

64 ¹Háà, ìbá ṣe pé ìwọ yóò fa ọ̀run ya, kí o sì sọ̀kalẹ̀, kí àwọn òkè ńlá lè wárìrì níwájú rẹ, ²bí iná ti ń fi igi gbígbẹ jó, tí ó sì ń mú omi hó—láti fi orúkọ rẹ hàn fún àwọn ọ̀tá rẹ, kí àwọn orílẹ̀-èdè lè wárìrì níwájú rẹ! ³Nígbà tí ìwọ ṣe àwọn ohun amúnimọ́lẹ̀ tí àwa kò retí, ìwọ sọ̀kalẹ̀, àwọn òkè ńlá sì wárìrì níwájú rẹ. ⁴Láti ìgbà àtijọ́, kò sí ẹni tí ó ti gbọ́ tàbí tí ó fi etí dámọ̀, ojú kankan kò ì tí ì rí ẹnìkan yàtọ̀ sí ìwọ, ẹni tí ń ṣe iṣẹ́ fún ẹni tí ń dúró dè é. ⁵Ìwọ ń tẹ́wọ́gba àwọn tí ń fi ayọ̀ ṣe ohun tí ó tọ́, àwọn tí ń rántí rẹ bí wọ́n ti ń rìn ní ọ̀nà rẹ. Ṣùgbọ́n ìwọ bínú, àwa sì dẹ́ṣẹ̀; ó ti pẹ́ tí àwa ti wà nínú ẹ̀ṣẹ̀ wa—ṣé a lè ní ìgbàlà? ⁶Gbogbo wa ti dàbí ẹni tí kò mọ́, gbogbo iṣẹ́ òdodo wa sì dàbí aṣọ eléèérí. Gbogbo wa sì ṣá bí ewé, ẹ̀ṣẹ̀ wa sì, bí afẹ́fẹ́, gbá wa lọ. ⁷Kò sí ẹni tí ń ké pe orúkọ rẹ, tí ó jí ara rẹ̀ láti dì ọ́ mú; nítorí ìwọ ti fi ojú rẹ pamọ́ kúrò lọ́dọ̀ wa, ìwọ sì ti fi wá lé ẹ̀ṣẹ̀ wa lọ́wọ́.

⁸Ṣùgbọ́n nísinsìnyí, ìwọ ni Baba wa; àwa ni amọ̀, ìwọ sì ni amọ̀kòkò wa; gbogbo wa ni iṣẹ́ ọwọ́ rẹ. ⁹Má ṣe bínú kíkorò tó bẹ́ẹ̀, Baba wa, má sì ṣe rántí ẹ̀ṣẹ̀ wa títí láé. Wò wá, jọ̀wọ́—gbogbo wa ni ènìyàn rẹ. ¹⁰Àwọn ìlú mímọ́ rẹ ti di aṣálẹ̀; Sioni ti di aṣálẹ̀, Jerusalemu sì ti di ahoro. ¹¹Ilé mímọ́ àti ẹlẹ́wà wa, níbi tí àwọn baba wa ti yìn ọ́, ni a ti fi iná sun, gbogbo ohun tí àwa fẹ́ràn sì ti di ahoro. ¹²Lẹ́yìn gbogbo èyí, ṣé ìwọ yóò fàsẹ́yìn, Baba wa? Ṣé ìwọ yóò dákẹ́, kí o sì pọ́n wa lójú tó bẹ́ẹ̀?