Sorgo Phatai Khuli Dibi
Etu ekta prathana ase je amar Pitri akash phari kene tolete ahibo. Etu manuh khan ke bachai nadiye, tarkhan laga bhal kaam khan ke mela kapra koi, aru kunbi Tak dhori nathake koi mani loi. Mandir julai dise. Jowab napa ekta prosno pora khotom hoi.
64 1Oh, Apuni sorgo phatai khuli kene nami ahhile, Apuni laga usor te pahar khan kapi uthibo, 2jineka jui pora khorkhori ke jolai diye aru pani ke ukhlai diye—Apuni laga nam Apuni laga dushman khan ke janai dibole, titia desh khan Apuni laga usor te kapi uthibo! 3Jitia Apuni amikhan pora asha nakora bhoyanok kaam khan korise, Apuni nami ahhise, aru Apuni laga usor te pahar khan kapi uthise. 4Purana jug pora, kun manuh bhi huna nai, kaan pora bujha bhi nai, Apuni ke chari kene dusra ke kun suku bhi dekha nai, kun Apuni ke rukhi thaka manuh nimite kaam kore. 5Kun manuh khushi pora thik kaam kore, kun Apuni laga rasta te berai kene Apuni ke yaad kore, Apuni taikhan ke grohon kore. Kintu Apuni khong hoise, aru amikhan paap korise; amikhan bisi din pora amikhan laga paap te ase—amikhan poritran pabo paribo na? 6Amikhan sob letera manuh ekjon nisena hoi jaise, aru amikhan laga sob dharmik kaam khan letera kapra nisena ase. Amikhan sob pata ekta nisena sukhi jai, aru amikhan laga paap khan, hawa nisena, amikhan ke uthai loi jai. 7Apuni laga nam te mata kun bhi nai, Apuni ke dhori bole nijor ke uthai diya kun bhi nai; kilemane Apuni amikhan pora Apuni laga mukh lukai loise aru amikhan ke amikhan laga paap te di dise.
8Kintu etiya, Apuni amar Pitri ase; amikhan matti ase, aru Apuni amikhan laga kumar ase; amikhan sob Apuni laga hath laga kaam ase. 9Eneka bhiyonkor khong nakoribi, amar Pitri, aru amikhan laga paap ke hodai nimite yaad nakoribi. Sabi, anugrah kori kene—amikhan sob Apuni laga manuh khan ase. 10Apuni laga pobitro sheher khan ujar jagah hoi jaise; Zion ujar jagah hoi jaise, Jerusalem khali jagah hoi jaise. 11Amikhan laga pobitro aru sundor ghor, jun jagah te amikhan laga baba khan pora Apuni ke prosansa korise, jui pora julai dise, aru amikhan ki daam bhabise, eitu sob khotom hoi jaise. 12Eitu sob laga pichete, Apuni rukhi thakibo naki, amar Pitri? Apuni chup kene thakibo aru amikhan ke eneka bhiyonkor dukh dibo naki?