Pandulani Kudzulu
Uyu ndi mpembo wakuti Baba wathu angapasula kudzulu mbabuluka pantsi. Nkhabe kuikhira anthu kumbuyo, mbwenye unalonga kuti mabasa awo abwino kakamwe ndi ninga cakubvala cakupswipa, mbuchimbidzira kuti palibe munthu anamubatirira. Nyumba ya Mulungu yapswa na moto. Unamala na mbvunzo wakuti nkhabe kutawirwa.
64 1Dai mupandule kudzulu mbamutcita, toera mapiri atensuke pamaso panu, 2ninga moto usapisa ntsanga mbacitisa madzi kuvira—toera dzina yanu idziwike kuna anyamalwa anu, toera mitundu ya anthu itetemere pamaso panu! 3Pidacita Imwe pinthu pyakugopswa pidakhonda ife kudikhira, Imwe mwatcita, mapiri mbatensuka pamaso panu. 4Kubulukira kale-kale, nkhabe munthu adabva peno kudzindikira na khutu, nkhabe diso ridaona unango kusiyapo Imwe, munacitira pinthu ule anakudikhirani. 5Imwe musatambira ale anacita pyakulungama mwakutsandzaya, ale anakukumbukirani mukufamba iwo m'njira zanu. Mbwenye Imwe mwaipirwa, ife mbatidawa; ife tiri m'madawo athu kwa nthawe itali—kodi tinakwanisa kupulumuswa? 6Ife tonsene tadzakhala ninga munthu wakukhonda kucena, pyonsene pyakulungama pyathu ndi ninga nguwo yakupswipa. Ife tonsene tisauma ninga tsamba, madawo athu, ninga mphepo, asatikwewa. 7Nkhabe munthu anacemera dzina yanu, ule analamuka toera kuphata Imwe; thangwi Imwe mwabisa nkhope yanu kwa ife, mbamutipereka ku madawo athu.
8Mbwenye cincino, Imwe ndimwe Baba wathu; ife ndife dongo, Imwe ndimwe nyakuumba wathu; ife tonsene ndife basa ya manja yanu. 9Lekani kuipirwa kakamwe, Baba wathu, lekani kukumbukira madawo athu kwa muyaya. Yang'anani, ndaphata miyendo—ife tonsene ndife mbumba yanu. 10Mizinda yanu yakucena yadzakhala thando; Sioni yadzakhala thando, Yerusalemu yadzakhala bulukunkhu. 11Nyumba yathu yakucena na yakubalika, mudasimba ambuya athu Imwe, yapiswa na moto, pyonsene pidafuna ife pyadzakhala bulukunkhu. 12Pakumala pyonsene ipi, kodi Imwe munadzakhonda kutiphedza, Baba wathu? Kodi munadzakhala dzii mbamutitambuza kakamwe?
