യെശയ്യാ 64 FHB Father's Heart Bible™

64 ¹അയ്യോ, അങ്ങ് ആകാശം കീറിപ്പിളർന്ന് ഇറങ്ങിവന്നെങ്കിൽ, അങ്ങയുടെ സന്നിധിയിൽ പർവതങ്ങൾ വിറകൊണ്ടെങ്കിൽ, ²തീ കുറ്റിക്കാടിനെ കത്തിച്ച് വെള്ളത്തെ തിളപ്പിക്കുന്നതുപോലെ—അങ്ങയുടെ നാമം അങ്ങയുടെ ശത്രുക്കൾക്ക് വെളിപ്പെടേണ്ടതിന്, അങ്ങയുടെ സന്നിധിയിൽ ജനതകൾ നടുങ്ങേണ്ടതിന്തന്നെ! ³ഞങ്ങൾ പ്രതീക്ഷിക്കാത്ത ഭയങ്കരകാര്യങ്ങൾ അങ്ങ് ചെയ്തപ്പോൾ, അങ്ങ് ഇറങ്ങിവന്നു, അങ്ങയുടെ സന്നിധിയിൽ പർവതങ്ങൾ വിറകൊണ്ടു. ⁴പുരാതനകാലംമുതൽ, അങ്ങയെ കാത്തിരിക്കുന്നവനുവേണ്ടി പ്രവർത്തിക്കുന്ന അങ്ങയെയല്ലാതെ മറ്റാരെയും ആരും കേട്ടിട്ടില്ല, ചെവികൊണ്ട് ഗ്രഹിച്ചിട്ടില്ല, ഒരു കണ്ണും കണ്ടിട്ടുമില്ല. ⁵സന്തോഷത്തോടെ നീതി പ്രവർത്തിക്കുന്നവരെ, അങ്ങയുടെ വഴികളിൽ നടക്കുമ്പോൾ അങ്ങയെ ഓർക്കുന്നവരെ, അങ്ങ് സ്വീകരിക്കുന്നു. എന്നാൽ അങ്ങ് കോപിച്ചു, ഞങ്ങൾ പാപം ചെയ്തു; ഞങ്ങൾ ദീർഘകാലമായി ഞങ്ങളുടെ പാപങ്ങളിലാണ്—ഞങ്ങൾ രക്ഷിക്കപ്പെടുമോ? ⁶ഞങ്ങൾ എല്ലാവരും അശുദ്ധനായ ഒരുവനെപ്പോലെയായിത്തീർന്നിരിക്കുന്നു, ഞങ്ങളുടെ നീതിപ്രവൃത്തികളെല്ലാം മലിനമായ ഒരു വസ്ത്രംപോലെയാണ്. ഞങ്ങൾ എല്ലാവരും ഒരു ഇലപോലെ വാടിപ്പോകുന്നു, ഞങ്ങളുടെ പാപങ്ങൾ കാറ്റുപോലെ ഞങ്ങളെ അടിച്ചുകൊണ്ടുപോകുന്നു. ⁷അങ്ങയുടെ നാമം വിളിച്ചപേക്ഷിക്കുന്നവൻ, അങ്ങയെ മുറുകെപ്പിടിക്കുവാൻ ഉണർന്നെഴുന്നേൽക്കുന്നവൻ, ആരുമില്ല; എന്തെന്നാൽ അങ്ങ് അങ്ങയുടെ മുഖം ഞങ്ങളിൽനിന്നു മറച്ച്, ഞങ്ങളുടെ പാപങ്ങൾക്ക് ഞങ്ങളെ ഏല്പിച്ചിരിക്കുന്നു.

⁸എന്നാൽ ഇപ്പോൾ, അങ്ങ് ഞങ്ങളുടെ പിതാവാകുന്നു; ഞങ്ങൾ കളിമണ്ണ്, അങ്ങ് ഞങ്ങളുടെ കുശവൻ; ഞങ്ങൾ എല്ലാവരും അങ്ങയുടെ കൈയുടെ പണിയാകുന്നു. ⁹ഇത്ര ഭയങ്കരമായി കോപിക്കരുതേ, ഞങ്ങളുടെ പിതാവേ, ഞങ്ങളുടെ പാപം എന്നേക്കും ഓർക്കുകയുമരുതേ. നോക്കണമേ—ഞങ്ങൾ എല്ലാവരും അങ്ങയുടെ ജനമാണ്. ¹⁰അങ്ങയുടെ വിശുദ്ധനഗരങ്ങൾ ഒരു മരുഭൂമിയായിത്തീർന്നിരിക്കുന്നു; സീയോൻ ഒരു മരുഭൂമിയായും, യെരൂശലേം ഒരു ശൂന്യസ്ഥലമായും തീർന്നിരിക്കുന്നു. ¹¹ഞങ്ങളുടെ പിതാക്കന്മാർ അങ്ങയെ സ്തുതിച്ച ഞങ്ങളുടെ വിശുദ്ധവും മനോഹരവുമായ ആലയം തീകൊണ്ടു ചുട്ടെരിക്കപ്പെട്ടിരിക്കുന്നു, ഞങ്ങൾ വിലമതിച്ചതെല്ലാം ഒരു നാശക്കൂമ്പാരമായിത്തീർന്നിരിക്കുന്നു. ¹²ഇതെല്ലാം കഴിഞ്ഞിട്ടും, അങ്ങ് അടങ്ങിയിരിക്കുമോ, ഞങ്ങളുടെ പിതാവേ? അങ്ങ് മൗനം പാലിച്ച് ഞങ്ങളെ ഇത്ര ഭയങ്കരമായി പീഡിപ്പിക്കുമോ?