Dọwaa Eluigwe
Nke a bụ ekpere ka Nna anyị dọwaa eluigwe ma rịdata. Ọ dịghị agbachitere ndị mmadụ, ọ na-akpọ ezi ọrụ ha kachasị mma uwe rụrụ arụ, ma kweta na ọ dịghị onye na-ejide ya. E sụrụ ụlọ nsọ ọkụ. Ọ na-ejedebe n'ajụjụ a na-azaghị.
64 1Ọ, a sị na ị dọwaa eluigwe rịdata, ka ugwu niile maa jijiji nʼihu gị, 2dịka ọkụ si amụnye osisi kpọrọ nkụ ọkụ, na-emekwa ka mmiri gbọọ—ka ndị iro gị mara aha gị, ka mba niile wee maa jijiji nʼihu gị! 3Mgbe i mere ọrụ dị oke egwu anyị na-atụghị anya ya, ị rịdatara, ugwu niile makwara jijiji nʼihu gị. 4Site nʼoge ochie, ọ dịghị onye nụrụla maọbụ ghọta site na ntị, ọ dịghị anya hụrụla onye ọbụla ma e wezụga gị, onye na-arụ ọrụ maka onye na-echere ya. 5Ị na-anabata ndị ji obi ụtọ na-eme ihe ziri ezi, bụ ndị na-echeta gị mgbe ha na-aga nʼụzọ gị niile. Ma iwe were gị, anyị wee mehie; anyị anọọla ogologo oge na mmehie anyị—a ga-azọpụta anyị? 6Anyị niile adịla ka onye na-adịghị ọcha, ezi omume anyị niile dịkwa ka uwe ruru unyi. Anyị niile na-akpọnwụ ka akwụkwọ, mmehie anyị, dịka ikuku, na-ebufukwa anyị. 7Ọ dịghị onye na-akpọku aha gị, onye na-akpọlite onwe ya ijide gị; nʼihi na i zonahụla ihu gị nʼebe anyị nọ, werekwa anyị nyefee nʼaka mmehie anyị.
8Ma ugbu a, ị bụ Nna anyị; anyị bụ ụrọ, gị onwe gị bụkwa onye na-akpụ anyị; anyị niile bụ ọrụ aka gị. 9Ewela iwe nke ukwuu, Nna anyị, echetakwala mmehie anyị ruo mgbe ebighị ebi. Biko, lee anya—anyị niile bụ ndị gị. 10Obodo nsọ gị niile aghọọla ọzara; Zayọn aghọọla ọzara, Jeruzalem aghọọkwa ebe tọgbọrọ nʼefu. 11Ụlọ anyị dị nsọ ma maa mma, bụ ebe nna nna anyị ha toro gị, ka e jiri ọkụ rechapụ, ihe niile anyị ji kpọrọ ihe aghọọkwala mkpọmkpọ ebe. 12Mgbe ihe ndị a niile gasịrị, ị ga-ejidesi onwe gị ike, Nna anyị? Ị ga-agba nkịtị ma mee ka anyị taa ahụhụ nke ukwuu?
