Isaiah 64

64 ¹Iyavo, nana kazingram serda tāra rāsi kaja, chieina nawui mangāli kaphungbing nganukranu, ²meina maharthing chi chuikatā thāda, kala tara̱ hang ngasak thāda, naming nawui yangkashebingli theingasak khavai, chieina yurbing nawui mangāli nganukranu! ³Ithumna maphaningsālak kaji khangachee-khangachā ot nana sātharan, nana tāra rāhaira, kala nawui mangāli kaphungbing nganuka. ⁴Achālakhawui eina thuida, khipākhana khanā eina mashālak lah maphaningsalak; ali honabingwui vang otsak kasā Vare, na maningla khipā vareli mikna mathei. ⁵Khamathān eina khamashung khangarong ot kasābingli, nawui shongfali zata tharan nali phaningungbingli nana samphangkhui. Kha nana malungvāthaowa, kala ithumna morei sāhaira; ithumna sāngnā ithumwui moreili leihaira; ithum huikhui samphangrala? ⁶Ithum saikora makathar mi kathā ngasāhaira, kala ithumwui khamashung ot saikora makhaotot kahai kashankachon kathāna. Ithum saikora anah kathā thenghaowa, kala ithumwui morei, masi kathā, ithumli khuithuihaora. ⁷Naming khangakao, nali singtit khavai akhalatta mathuk ngasak mi akhala maleimana; kaja nana ithumwui eina namai ngathumhaida ithumli ithumwui morei pāngli sāthatserhaira.

⁸Kha ara, na ithumwui Avā na; ithum leikhonna, kala na ithumwui ham kasemna; ithum saikora nawui pāngwui kasāna. ⁹O ithumwui Avā, hakmahā malungvātmihaialu, kala ithumwui morei katang makhavai maphaningungmihaialu. Yanglu, kapona, ithum saikora nawui mibingna. ¹⁰Nawui kathara keinungbing lamhāng ngasāhaira; Zion lamhāng ngasāhaira, Jerusalem ngachakting ngasāhaira. ¹¹Ithumwui kathara kala khamathā shim, ithumwui shāvā ngarāna nali masot sochikat kahai apam, meina chuitāmihaira, kala ithumna machuk kahai ot saikora kashimān ngasāhaira. ¹²O ithumwui Avā, ot saikora hiwui thili nana kasaikha haira? Nana kasaikha pamda ithumli hakmahā machot ngasakra?