Lee M Ebe A, Lee M Ebe A

Nna anyị kwuru na ya nọ na-ekwu, lee m, nye ndị na-ajụghị ya, ndị ka mma ili na emume nzuzo. Ikpe ahụ kewara: ndị ohu ya na-eri ihe ebe ndị ọzọ agụụ na-agụ. Mgbe ahụ o mere eluigwe ọhụrụ na ụwa ọhụrụ, ebe ákwá kwụsịrị, ọ dịghịkwa onye na-ewuru onye ọzọ ụlọ.

Isi 65.

Ekwere m ka ndị na-ajụghị ajụjụ maka m chọọ m; ekwere m ka ndị na-achọghị m chọta m. Agwara m mba nke na-akpọghị aha m, sị, “Lee m ebe a, lee m ebe a.” ^a Ogologo ụbọchị niile, agbasaala m aka m abụọ nye ndị nnupụisi, bụ ndị na-aga nʼụzọ na-adịghị mma, na-eso nzube nke onwe ha, ndị na-akpasu m iwe nʼihu m mgbe niile, na-achụ aja nʼime ogige, na-esurekwa ihe na-esi isi ụtọ nʼelu brik; ndị na-anọdụ nʼetiti ili ma na-anọ ọnọdụ abalị nʼebe nzuzo; ndị na-eri anụ ezi, nke nwere ofe ihe rụrụ arụ nʼime ite ha; ndị na-asị, “Nọọrọ onwe gị, abịala m nso, nʼihi na m dị nsọ karịa gị.” Ndị a bụ anwụrụ ọkụ nʼimi m, ọkụ nke na-enwu ogologo ụbọchị niile. Lee, e dere ya edere nʼihu m: Agaghị m agba nkịtị, kama m ga-akwụghachi ụgwọ; m ga-akwụ ya nʼapata ha, ma mmehie nke gị onwe gị ma mmehie nna nna unu ha ọnụ, ka Nna anyị kwuru; nʼihi na ha suru ihe na-esi isi ụtọ nʼelu ugwu ma kwaa m emo nʼelu ugwu nta, aga m atụ nʼapata ha ụgwọ zuru ezu nʼihi omume ha mbụ.

Otú a ka Nna anyị kwuru: Dịka a na-achọta mmanya ọhụrụ nʼụyọkọ, mmadụ ekwuo, sị, “Ebibila ya, nʼihi na ngọzi dị nʼime ya,” otú ahụ ka m ga-eme nʼihi ndị ohu m, ka m ghara ibibi ha niile. “Aga m esite na Jekọb mepụta ụmụ, sitekwa na Juda mepụta onye ga-eketa ugwu m niile; ndị m họọrọ ga-eketa ya, ndị ohu m ga-ebikwa nʼebe ahụ. Sharọn ga-aghọ ebe ịta nri maka igwe atụrụ, Ndagwurugwu Akọ ga-abụ ebe izuike maka igwe ehi, maka ndị m ndị chọrọ m. Ma unu ndị na-agbakụta m azụ, ndị na-echefu ugwu nsọ m, ndị na-edoziri Chi Ihuọma tebụl, na-ejupụtakwara Chi Akaraaka iko mmanya a gwakọtara agwakọta. ^b Aga m akara unu akara maka mma agha, unu niile ga-egbukwa ikpere nʼala maka ogbugbu; nʼihi na m kpọrọ oku, unu azaghị, m kwuru okwu, unu egeghị ntị; unu mere ihe dị njọ nʼanya m, họrọkwa ihe na-adịghị m mma.”

Ya mere, otú a ka Nna anyị, Onye na-achị ihe niile kwuru: Lee, ndị ohu m ga-eri nri, ma agụụ ga-agụ unu; ndị ohu m ga-aṅụ ihe ọṅụṅụ, ma akpịrị ga-akpọ unu nkụ; ndị ohu m ga-aṅụrị ọṅụ, ma ihere ga-eme unu; “Lee, ndị ohu m ga-abụ abụ nʼihi ọṅụ obi, ma unu ga-eti mkpu nʼihi ihe mgbu nke obi, tiekwa akwa nʼihi mmụọ tiwara etiwa. Unu ga-ahapụ aha unu nye ndị m họọrọ dịka ọbụbụ ọnụ, Nna anyị, Onye na-achị ihe niile ga-egbukwa unu; ma ndị ohu ya ka ọ ga-akpọ aha ọzọ, ka onye ọbụla na-arịọ ngọzi nʼala ga-agọzi onwe ya site na Nna nke eziokwu, onye ọbụla na-aṅụ iyi nʼala ga-aṅụ iyi site na Nna nke eziokwu; nʼihi na nsogbu ndị gara aga ka echefuru, zookwa ha ezo nʼanya m.

Eluigwe Ọhụrụ, Ụwa Ọhụrụ

“Nʼihi na lee, ana m eke eluigwe ọhụrụ na ụwa ọhụrụ, a gaghị echetakwa ihe ndị mbụ, ha agaghịkwa abata nʼuche. ^c Kama ṅụrịanụ ọṅụ, nweekwanụ obi ụtọ ruo mgbe ebighị ebi nʼihe ahụ m na-eke; nʼihi na lee, ana m eke Jerusalem ka ọ bụrụ ọṅụ, ndị ya ka ha bụrụ obi ụtọ. Aga m aṅụrị ọṅụ nʼihi Jerusalem, nweekwa obi ụtọ nʼihi ndị m; a gaghịkwa anụ ụda ákwá nʼime ya ọzọ, maọbụ mkpu nke mkpagbu. A gaghịkwa enwe nʼime ya nwa ọhụrụ nke na-adị naanị ụbọchị ole na ole, maọbụ agadi nwoke nke na-adịghị ndụ ruo afọ ya niile; nʼihi na nwa okorobịa ga-anwụ mgbe ọ gbara narị afọ ndụ, onye na-erughị narị afọ ka a ga-ewere dịka onye a bụrụ ọnụ. Ha ga-ewu ụlọ biri nʼime ha; ha ga-akọ ubi vaịn rie mkpụrụ ya. Ha agaghị ewu ụlọ ka onye ọzọ biri nʼime ya, maọbụ kọọ ihe ka onye ọzọ rie; nʼihi na ụbọchị ndị m ga-adị ka ụbọchị osisi, ndị m họọrọ ga-anọ ogologo oge na-erijú afọ nʼọrụ aka ha. Ha agaghị adọgbu onwe ha nʼọrụ nʼefu maọbụ mụọ ụmụ maka oke egwu nke na-abịa na mberede, nʼihi na ha bụ mkpụrụ nke ndị Nna anyị gọziri agọzi, ha na ụmụ ụmụ ha. Tupu ha akpọ oku, aga m aza ha; mgbe ha ka na-ekwu okwu, aga m anụ.” Nkịta ọhịa na nwa atụrụ ga-eso onwe ha taa nri, ọdụm ga-ata ahịhịa dịka ehi, ma aja ga-abụ nri agwọ. Ha agaghị emerụ ahụ maọbụ bibie ihe nʼebe ọbụla nʼelu ugwu nsọ m, ka Nna anyị kwuru.