Yezu, Wamphambvu Toera Kupulumusa
Munthu unango anabwera kubuluka ku Edomu na pyakubvala pyakubvunda na ciropa, mbwenye apondaponda mbuto yakupondera mphesa ekhene, mbapana munthu adamphedza. Buluka kukumbuka kunasanduka kwa ntsisi: Baba wathu akhabonera pabodzi na anthu ace m'matsautso awo, mbakhaanyamula, mpaka iwo adatsukwalisa Nzimu wace. Cinamala na kubvunza kuti ntsisi zace zayenda kupi.
63 1Mbani uyu anabwera kubuluka ku Edhomu, na nguwo zakupswipiswa zakufiira kubuluka ku Bozra, uyu wa mbiri mu nguwo zace, mbafamba na mphambvu zace zikulu? “Ndine Ine, anadziwisa kulungama, wamphambvu toera kupulumusa.” a a v1 Mpostolo Juwau aona Yezu, akubvala nguwo yakuviika mu ciropa, mbaponda cakukamulira vinyu ca ukali wa Baba wace — Cibvumbulutso 19:11-15.
2Thangwi yanji nguwo yanu ndi yakufiira, na nguwo zanu ninga za ule anaponda mu cakukamulira vinyu?
3“Ine ndaponda cakukamulira vinyu ndekhene, na pa mitundu ya anthu nkhabe m'bodzi akhali na Ine; ndaafinya mu ukali wanga, mbandiaponda mu kuipirwa kwanga; ciropa cawo caphulika pa nguwo zanga, mbandipswipisa nguwo zanga zonsene. 4Thangwi ntsiku yakubwezera ikhali muntima mwanga, na caka ca akuombolwa anga cafika. 5Ndayang'ana, mbwenye nkhabepo m'bodzi toera kuphedza; ndadzumatirwa thangwi nkhabe m'bodzi akhandiphedzera; natenepo nkhono wanga wene wandibweresera upulumuki, na kuipirwa kwanga kwandiphedzera. 6Ndaponda mitundu ya anthu mu ukali wanga; ndaacitisa kuledzera mu kuipirwa kwanga, mbandithira ciropa cawo pantsi.”
Ndinadzalonga Kufuna kwa Baba Wathu
7Ndinadzalonga pya kufuna kwa cibverano kwa Baba wathu, kusimbwa kwace, mwakubverana na pyonsene pidaticitira Iye, na udidi ukulu udapangiza Iye kuna nyumba ya Izarayeli, mwakubverana na ntsisi zace, mwakubverana na kufuna kwace kukulu kwa cibverano.
8Thangwi Iye alonga tenepa: “Mwandimomwene iwo ndi mbumba yanga, ana akuti nkhabe kudzakhala akunyengeza.” Na tenepo Iye akhala Mpulumusi wawo.
9Mu nyatwa zawo zonsene Iye akhabva nyatwa, na nthumwi wa pamaso pace aapulumusa iwo; mu kufuna kwace na mu ntsisi zace aaombola iwo; aakweza mbaathukula iwo ntsiku zonsene za kale. 10Mbwenye iwo apandukira mbatsukwalisa Nzimu Wace Wakucena; natenepo Iye azungunuka mbakhala nyamalwa wawo, Iye ene mbamenyana nawo. 11Penepo iye akumbuka ntsiku za kale, za Mose na za mbumba yace. Ali kupi ule adaakwezesa kubuluka m'bara, pabodzi na akumbizi a nkumbi wace? Ali kupi ule adaikha Nzimu Wace Wakucena pakati pawo, 12ule adalatiza nkhono wace wa mbiri ku nkhono wamadyo wa Mose, ule adagawa madzi patsogolo pawo toera kudzicitira dzina yakukhonda kumala, 13ule adaapitisa pakati pa madzi akuzika? Ninga kavalo n'thando, iwo hadagwegweduka tayu. 14Ninga pifuyo pinatcitira m'phompho, Nzimu wa Baba wathu waapasa kupuma. Natenepo imwe mwatsogolera mbumba yanu, toera kudzicitira dzina ya mbiri.
Yang'anani Pantsi Kubuluka Kudzulu
15Yang'anani pantsi kubuluka kudzulu muone, kubuluka ku mbuto yanu yakucena na yambiri. Phinga yanu na mabasa anu amphambvu piri kupi? Kutekenyeka kwa ntima wanu na ntsisi zanu pyakhondwa kuna ine. 16Thangwi imwe ndimwe Baba wathu, maseze Abhrahamu nkhabe kutidziwa, na Izarayeli nkhabe kutizindikira; imwe ndimwe Baba wathu; Muomboli wathu kubulukira kale-kale ndi dzina yanu. 17Thangwi yanji, Baba wathu, musatitawirisa kudzunga kubuluka m'njira zanu, mbamuumisa ntima wathu, toera ife tikhonde kukugopani? Bwererani thangwi ya atumiki anu, madzinza a unthaka wanu. 18Thangwi ku ndzidzi ung'ono mbumba yanu yakucena ikhala na unthaka; anyamalwa athu aponda nyumba yanu yakucena. 19Ife takhala ninga ale akuti imwe cipo mwaatonga, ninga ale akuti nkhabe kucemerwa na dzina yanu.
