Yesu, Mai Iko na Ceto

Wani yana zuwa daga Edom da tufafi masu ɗigon jini, ya taka matsewar inabi shi kaɗai ba mai taimako. Sa'an nan tunawa ta zama mai taushi: Ubanmu ya sha wahala cikin wahalar mutanensa, yana ɗauke da su, har suka ɓata wa Ruhunsa rai. Ya ƙare da tambayar ina jinƙansa ya tafi.

Babi na 63.

Wane ne wannan mai zuwa daga Edom, cikin tufafi masu jajayen tabo daga Bozra, wannan mai ɗaukaka cikin tufafinsa, yana taƙama da ikonsa mai girma? “Ni ne, mai shelar adalci, mai iko na ceto.” ^a

Me ya sa tufafinka ja suke, tufafinka kuma kamar na mai tattaka a wurin matsin inabi?

“Na tattaka wurin matsin inabi ni kaɗai, daga cikin mutane kuwa babu wanda yake tare da ni; na murƙushe su cikin fushina na kuma tattake su cikin hasalata; jininsu ya yayyafa a tufafina, na kuma ɓata dukan tufafina. Gama ranar sakayya tana a zuciyata, shekarar fansata kuwa ta zo. Na duba, amma babu mai taimako; na yi mamaki domin babu wanda ya goyi bayana; saboda haka hannuna da kansa ya kawo mini ceto, hasalata kuma ta goyi bayana. Na tattake mutane cikin fushina; na buge su da maye cikin hasalata, na kuma zubar da jininsu a ƙasa.”

Zan Faɗi Ƙaunar Ubanmu

Zan faɗi madawwamiyar ƙaunar Ubanmu, yabonsa, bisa ga dukan abin da ya yi mana, da kyautatawa mai girma da ya nuna wa gidan Isra'ila, bisa ga jinƙansa, bisa ga yawan madawwamiyar ƙaunarsa.

Gama ya ce, “Hakika su mutanena ne, 'ya'ya waɗanda ba za su yi ha'inci ba.” Sai ya zama Mai cetonsu.

Cikin dukan wahalarsu shi ma ya sha wahala, mala'ikan fuskarsa kuwa ya cece su; cikin ƙaunarsa da jinƙansa ya fanshe su; ya ɗaga su sama ya kuma ɗauke su dukan kwanakin dā. Amma suka yi tawaye suka kuma ɓata wa Ruhunsa Mai Tsarki rai; saboda haka ya juya ya zama maƙiyinsu, shi kansa kuma ya yaƙe su. Sai ya tuna da kwanakin dā, na Musa da na mutanensa. Ina wanda ya fitar da su daga teku, tare da makiyayan garkensa? Ina wanda ya sa Ruhunsa Mai Tsarki a cikinsu, wanda ya miƙa hannunsa mai ɗaukaka a hannun daman Musa, wanda ya raba ruwaye a gabansu domin yă yi wa kansa suna madawwami, wanda ya bi da su ta cikin zurfafa? Kamar doki a jeji, ba su yi tuntuɓe ba. Kamar dabbobin da suke gangarawa zuwa kwari, Ruhun Ubanmu ya ba su hutawa. Haka ka bi da mutanenka, domin ka yi wa kanka suna mai ɗaukaka.

Ka Duba Daga Sama

Ka duba daga sama ka gani, daga mazauninka mai tsarki da ɗaukaka. Ina himmarka da manyan ayyukanka? An hana ni motsin zuciyarka da jinƙanka. Gama kai ne Ubanmu, ko da yake Ibrahim bai san mu ba, Isra'ila kuma bai yarda da mu ba; kai ne Ubanmu; Mai Fansarmu tun zamanin dā shi ne sunanka. Me ya sa, ya Ubanmu, kake bar mu muna karkacewa daga hanyoyinka kake kuma taurare zuciyarmu, har ba ma tsoronka? Ka komo saboda bayinka, kabilan gādonka. Na ɗan lokaci kaɗan mutanenka masu tsarki suka mallaki wurin; maƙiyanmu sun tattake wurinka mai tsarki. Mun zama kamar waɗanda ba ka taɓa yin mulki a kansu ba, kamar waɗanda ba a kira su da sunanka ba.