Isaias 63

63 ¹Kinsa kini nga naggikan sa Edom, nga nagsul-ob ug mga bisti nga namantsahan ug pula gikan sa Bozra, kining halangdon sa iyang bisti, nga nagmartsa sa iyang dakong kusog? “Ako kini—si Jesus—nga nagmantala sa pagkamatarong, gamhanan sa pagluwas.” ^a a v1 Nakita ni apostol Juan si Jesus, nga nagsul-ob ug kupo nga gituslob sa dugo, nga nagtunob sa pug-anan sa ubas sa kapungot sa iyang Amahan — Pinadayag 19:11-15.

²Nganong pula man ang imong bisti, ug ang imong mga sapot sama sa usa nga nagtunob sa pug-anan sa ubas?

³“Ako lang nag-inusara nga nagtunob sa pug-anan sa ubas, ug gikan sa mga katawhan walay usa nga mikuyog kanako; gidugmok ko sila sa akong kasuko ug gitunob-tunoban ko sila sa akong kapungot; ang ilang dugo mipisik sa akong mga bisti, ug namantsahan ko ang tanan kong sapot. ⁴Kay ang adlaw sa pagpanimalos anaa sa akong kasingkasing, ug ang tuig sa akong mga tinubos miabot na. ⁵Mitan-aw ako, apan walay usa nga motabang; nahingangha ako nga walay usa nga mialalay kanako; busa ang akong kaugalingong bukton maoy nagdala kanako sa kaluwasan, ug ang akong kapungot maoy nag-alalay kanako. ⁶Gitunob-tunoban ko ang mga katawhan sa akong kasuko; gihubog ko sila sa akong kapungot, ug gibubo ko ang ilang dugo sa yuta.”

Akong Isaysay ang Gugma sa Atong Amahan

⁷Akong isaysay ang gugmang walay paglubad sa atong Amahan, ang mga pagdayeg kaniya, sumala sa tanan nga iyang gibuhat alang kanato, ug ang dakong kaayo nga iyang gipakita sa panimalay sa Israel, sumala sa iyang kaluoy, sumala sa iyang madagayaon nga gugmang walay paglubad.

⁸Kay miingon siya, “Sa pagkatinuod sila akong katawhan, mga anak nga dili magmaluibon.” Ug nahimo siyang ilang Manluluwas.

⁹Sa tanan nilang kasakit nag-antos usab siya, ug ang mensahero sa iyang presensya nagluwas kanila; sa iyang gugma ug sa iyang kaluoy iyang gitubos sila; iyang gisapnay sila ug gikugos sila sa tanang mga adlaw sa kakaraanan. ¹⁰Apan misupil sila ug gipaguol nila ang iyang Espiritu Santo; busa mitalikod siya ug nahimong ilang kaaway, ug siya mismo nakig-away kanila. ¹¹Unya iyang nahinumdoman ang mga adlaw sa kakaraanan, ni Moises ug sa iyang katawhan. Hain na ang usa nga nagtultol kanila gikan sa dagat, uban sa mga magbalantay sa iyang panon? Hain na ang usa nga nagbutang sa iyang Espiritu Santo sa ilang taliwala, ¹²nga mituy-od sa iyang mahimayaong bukton diha sa tuong kamot ni Moises, nga nagbahin sa katubigan sa atubangan nila aron magbuhat alang sa iyang kaugalingon ug ngalan nga walay kataposan, ¹³nga naggiya kanila latas sa kahiladman? Sama sa kabayo sa kamingawan, wala sila mapandol. ¹⁴Sama sa kahayopan nga nanaog ngadto sa walog, ang Espiritu sa atong Amahan naghatag kanila ug pahulay. Sa ingon gigiyahan mo ang imong katawhan, aron magbuhat alang sa imong kaugalingon ug mahimayaong ngalan.

Dungawa Gikan sa Langit

¹⁵Dungawa gikan sa langit ug tan-awa, gikan sa imong balaan ug mahimayaong puloy-anan. Hain na ang imong kasibot ug ang imong gamhanang mga buhat? Ang pagbati sa imong kasingkasing ug ang imong kaluoy gipugngan gikan kanako. ¹⁶Kay ikaw ang among Amahan, bisan pa si Abraham wala makaila kanamo ug ang Israel wala moila kanamo; ikaw ang among Amahan; among Manunubos sukad pa sa kakaraanan mao ang imong ngalan. ¹⁷Nganong, among Amahan, gitugotan mo kami nga mahisalaag gikan sa imong mga dalan ug gipagahi ang among kasingkasing, nga tungod niini wala na kami mahadlok kanimo? Balik tungod ug alang sa imong mga alagad, ang mga tribo sa imong panulondon. ¹⁸Sa mubong panahon ang imong balaang katawhan nanag-iya; gitunob-tunoban sa among mga kaaway ang imong balaang dapit. ¹⁹Nahimo kami nga sama niadtong wala mo gayod magmando, sama niadtong wala tawga pinaagi sa imong ngalan.