ኢሳይያስ 63 FHB Father's Heart Bible™

63 ¹እዝ ካብ ኤዶም ዝመፅእ ዘሎ፥ ካብ ባሶራ ቐይሕ ዝሕብሮም ክዳውንቲ ዝለበሰ፥ በቲ ኽዳኑ ዝኸበረ፥ ብብርቱዕ ሓይሉ ዝኸይድ ዘሎ መን እዩ? “ፅድቂ ዝእውጅ፥ ንምድሓን ሓያል፥ ኣነ እየ።” ^a a v1 ሃዋርያ ዮሃንስ ንኢየሱስ፥ ብደም ዝተጠልቀ ልብሲ ተኸዲኑ፥ ነቲ መፅመቝ ወይኒ ቍጥዓ ኣቦኡ እናረገፀ ረአዮ — ራእይ 19፡11-15።

²ክዳንካ ስለ ምንታይ ቐይሕ ኮይኑ፥ ክዳውንትኻ ኸዓ ኸም ናይ ሓደ ኣብ መፅመቝ ወይኒ ዝረግፅ ዝኾነ?

³“ንበይነይ ነቲ መፅመቝ ወይኒ ረጊፀዮ፥ ካብቶም ህዝብታት ከዓ ሓደ እኳ ምሳይ ኣይነበረን፤ ብቝጥዓይ ጨፍለቕኩዎም፥ ብቍጥዓይ ድማ ረገፅኩዎም፤ ደሞም ከዓ ናብ ክዳውንተይ ነጠበ፥ ኵሉ ኽዳነይ ድማ ኣበላሸኹ። ⁴መዓልቲ ሕነ ኣብ ልበይ ነይራ እያ እሞ፥ ዓመት እቶም ዝተበዘኹዎም ከዓ በፂሓ ነበረት። ⁵ጠመትኩ፥ ዝረድእ ግና ኣይነበረን፤ ዝድግፈኒ ስለ ዘይነበረ ተገረምኩ፤ ስለዙይ ቅልፅመይ ባዕሉ ምድሓን ኣምፅአለይ፥ ቍጥዓይ ድማ ደገፈኒ። ⁶ነቶም ህዝብታት ብቝጥዓይ ረገፅኩዎም፤ ብቍጥዓይ ኣስከርኩዎም፥ ደሞም ከዓ ናብ ምድሪ ኣፍሰስኩ።”

ፍቕሪ ኣቦና ክነግር እየ

⁷ምሕረት ኣቦናን ውዳሰኡን ክነግር እየ፥ ከምቲ ዝገበረና ዅሉ፥ ነቲ ንቤት እስራኤል ዘርኣዮ ዓብዪ ሕያዋይነት ድማ፥ ከም ርህራሄኡ፥ ከም ብዝሒ ምሕረቱ።

⁸ንሱ ኸዓ “ብሓቂ ህዝበይ እዮም፥ ዘይሕሱ ውሉድ እዮም” በለ፤ መድሕኖምውን ኮነ።

⁹ብዅሉ መከራኦም ንሱ ተጨነቐ፤ መልኣኽ ገፁ ኸዓ ኣድሓኖም፤ ብፍቕሩን ብርህራሄኡን ተቤዘዎም፤ ኣልዒሉ ኸዓ ብዅሉ መዓልቲታት ጥንቲ ፆሮም። ¹⁰ንሳቶም ግና ዓመፁ፥ ንቅዱስ መንፈሱ ኸዓ ኣጕሃዩ፤ ስለዙይ ተመሊሱ ፀላኢኦም ኮነ፥ ባዕሉ ድማ ተዋግኦም። ¹¹ሽዑ ነተን መዓልቲታት ጥንቲ፥ ናይ ሙሴን ናይ ህዝቡን ዘከረ። እቲ ምስ ጓሶት መጓሰኡ ኻብ ባሕሪ ዘደየቦም መን ኣሎ? እቲ ቅዱስ መንፈሱ ኣብ ማእኸሎም ዘንበረ መን ኣሎ፥ ¹²እቲ ኣብ የማን ሙሴ ክቡር ቅልፅሙ ዘርግሐ፥ ኣብ ቅድሚኦም ነቲ ማያት ኣብ ክልተ ዝመቐላ፥ ንርእሱ ናይ ዘለኣለም ስም ምእንቲ ኽገብር፥ ¹³እቲ ብዓሚቝ ባሕሪ ዝመርሖም መን እዩ? ከም ፈረስ ኣብ ምድረ በዳ፥ ኣይተዓንቀፉን። ¹⁴ከምቲ ናብ ለሰ ዝወርድ እንስሳ፥ መንፈስ ኣቦና ዕረፍቲ ሃቦም። ከምኡ ድማ ንርእስኻ ኽቡር ስም ምእንቲ ኽትገብር፥ ንህዝብኻ መራሕኻዮም።

ካብ ሰማይ ጠምት

¹⁵ካብ ሰማይ ጠሚትካ ርአ፥ ካብታ ቅድስትን ክብረትን ማሕደርካ። ቅንኣትካን ሓያል ግብርታትካን ኣበይ ኣለዉ? ናይ ልብኻ ሀረርታን ርህራሄኻን ካባይ ተኸልኪሎም ኣለዉ። ¹⁶ንስኻ ኣቦና ኢኻ እሞ፥ ኣብርሃም ንዓና እኳ እንተ ዘይፈለጠ፥ እስራኤልውን እኳ እንተ ዘይኣመነና፥ ንስኻ ኣቦና ኢኻ፤ ስምካ ኸዓ ካብ ጥንቲ ጀሚሩ ተቤዛዊና እዩ። ¹⁷ኦ ኣቦና፥ ስለ ምንታይ ካብ መንገድኻ ዀለል ተብለና፥ ንልብናውን ተትርሮ፥ ከይንፈርሃካ ትገብር? ምእንቲ ባሮትካ፥ ምእንቲ ነገዳት ርስትኻ ተመለስ። ¹⁸ቅዱስ ህዝብኻ ንቑሩብ ጊዜ ወረስዎ፤ ፀላእትና ኸዓ ንቤተ መቕደስካ ረገፅዎ። ¹⁹ከምቶም ከቶ ዘይገዛእካዮም፥ ከምቶም ብስምካ ዘይተፀውዑ ኮንና።