ኢሳይያስ 63

63 ¹ከኤዶም የሚመጣ፣ ከቦጽራ በደም ቀይ ልብሶች የተጐናጸፈ፣ በልብሱ ግርማ ያጌጠ፣ በታላቅ ኀይሉ የሚራመድ ይህ ማን ነው? “እኔ ነኝ፤ ኢየሱስ፤ ጽድቅን የማውጅ፣ ለማዳን ኀያል።” ^a a v1 ሐዋርያው ዮሐንስ ኢየሱስን በደም የተነከረ ልብስ ለብሶ፣ የአባቱን ቍጣ የወይን መጭመቂያ ሲረግጥ አየ — ራእይ 19፥11-15።

²ልብስህ ለምን ቀይ ሆነ? ልብሶችህስ የወይን መጭመቂያ እንደሚረግጥ ሰው ለምን ሆኑ?

³“የወይን መጭመቂያውን ብቻዬን ረገጥሁ፤ ከሕዝቦችም መካከል ማንም ከእኔ ጋር አልነበረም፤ በቍጣዬ ቀጠቀጥኋቸው፤ በመዓቴም ረገጥኋቸው፤ ደማቸውም በልብሴ ላይ ተረጨ፤ ልብሴንም ሁሉ አበከልሁ። ⁴የበቀል ቀን በልቤ ነበርና፣ የተቤዥኋቸውም ዓመት ደርሷል። ⁵ተመለከትሁ፣ የሚረዳኝ ግን አልነበረም፤ የሚደግፈኝ ስለሌለ ተደነቅሁ፤ ስለዚህ የራሴ ክንድ አዳነኝ፣ መዓቴም ደገፈኝ። ⁶በቍጣዬ ሕዝቦችን ረገጥሁ፤ በመዓቴ አሰከርኋቸው፤ ደማቸውንም በምድር ላይ አፈሰስሁ።”

የአባታችንን ፍቅር እተርካለሁ

⁷የአባታችንን የኪዳን ፍቅር እተርካለሁ፣ ምስጋናውንም እናገራለሁ፤ እንዳደረገልን ሁሉ፣ ለእስራኤልም ቤት ያሳየውን ታላቅ ቸርነት፣ እንደ ርኅራኄው፣ እንደ ብዙ የኪዳን ፍቅሩም።

⁸እርሱ እንዲህ ብሎ ነበርና፤ “በእውነት እነርሱ ሕዝቤ ናቸው፣ የማይዋሹም ልጆች ናቸው።” እርሱም አዳኛቸው ሆነ።

⁹በመከራቸው ሁሉ እርሱ ተጨነቀ፤ የፊቱም መልአክ አዳናቸው፤ በፍቅሩና በርኅራኄው ተቤዣቸው፤ አነሣቸው፣ በቀደመውም ዘመን ሁሉ ተሸከማቸው። ¹⁰እነርሱ ግን ዐመፁ፣ መንፈስ ቅዱሱንም አሳዘኑ፤ ስለዚህ ተመለሰ፣ ጠላታቸውም ሆነ፤ እርሱ ራሱም ተዋጋቸው። ¹¹ያን ጊዜ የቀደመውን ዘመን፣ የሙሴንና የሕዝቡን ዘመን አሰበ። ከመንጋው እረኞች ጋር ከባሕር ያወጣቸው የት አለ? መንፈስ ቅዱሱን በመካከላቸው ያኖረ የት አለ፣ ¹²የክብሩን ክንድ በሙሴ ቀኝ የዘረጋ፣ ለራሱ የዘላለም ስም ለማድረግ ውኃውን በፊታቸው የከፈለ፣ ¹³በጥልቁ ባሕር ውስጥ የመራቸው የት አለ? በምድረ በዳ እንዳለ ፈረስ አልተሰናከሉም። ¹⁴ወደ ሸለቆ እንደሚወርድ ከብት፣ የአባታችን መንፈስ አሳረፋቸው። እንዲሁ ሕዝብህን መራህ፤ ለራስህም የክብር ስም አደረግህ።

ከሰማይ ተመልከት

¹⁵ከሰማይ ተመልከት፣ ከተቀደሰውና ከከበረው ማደሪያህ እይ። ቅንዓትህና ኀያል ሥራዎችህ የት አሉ? የልብህ መነሣሣትና ርኅራኄህ ከእኔ ተከልክለዋል። ¹⁶አንተ አባታችን ነህና፤ አብርሃም ባያውቀንም፣ እስራኤልም ባይቀበለን፣ አንተ አባታችን ነህ፤ ከጥንት ጀምሮ ቤዛችን የሚለው ስምህ ነው። ¹⁷አባታችን ሆይ፣ ከመንገድህ እንድንስት ለምን ትተወናለህ፣ አንተንም እንዳንፈራ ልባችንን ለምን ታደነድናለህ? ስለ ባሪያዎችህ፣ ስለ ርስትህ ነገዶች ተመለስ። ¹⁸ቅዱስ ሕዝብህ ለጥቂት ጊዜ ርስትን ያዙ፤ ጠላቶቻችን መቅደስህን ረገጡ። ¹⁹አንተ ፈጽሞ እንዳልገዛሃቸው ሆንን፤ በስምህ እንዳልተጠሩ ሆንን።