Si Jesus, Gamhanan sa Pagluwas

May nagaabot halin sa Edom nga may saput nga may dugo, nga nag-isa nga nag-uyatak sang pugaan sang ubas kag wala sing may nagbulig. Dayon nagabalik ang handum nga mahinuklugon: ang aton Amay nga nag-antos sa pag-antos sang iya katawhan, nagadala sa ila, tubtob nga ginpasubo nila ang iya Espiritu. Natapos ini sa pamangkot kon diin napakadto ang iya kaluoy.

Nagahambal ang aton Amay sa bersikulo 8

Kapitulo 63.

Sin-o bala ini nga nagakari halin sa Edom, nga nagasuksok sang mga panapton nga nabulit sang pula halin sa Bozra, ini sia nga halangdon sa iya panapton, nga nagalakat sa iya daku nga kusog? “Ako ini, nga nagabantala sang pagkamatarung, gamhanan sa pagluwas.” ^a

Ngaa pula ang imo panapton, kag ang imo mga bayo kaangay sang isa nga nagatapak sa pulugaan sang ubas?

“Nagtapak ako sa pulugaan sang ubas nga nagaisahanon, kag halin sa mga katawohan wala sing nagaupod sa akon; gindugmok ko sila sa akon kaakig kag gintapakan ko sila sa akon kasingkal; ang ila dugo nagwisik sa akon mga panapton, kag ginbulit ko ang bug-os ko nga panapton. Kay ang adlaw sang pagbalus yara sa akon tagiposoon, kag ang tuig sang akon mga gintubos nag-abut na. Nagtan-aw ako, apang wala sing bisan sin-o nga magbulig; natingala ako nga wala sing nagsakdag sa akon; gani ang akon kaugalingon nga butkon nagdala sa akon sang kaluwasan, kag ang akon kasingkal nagsakdag sa akon. Gintapakan ko ang mga katawohan sa akon kaakig; ginpahubog ko sila sa akon kasingkal, kag ginbubo ko ang ila dugo sa duta.”

Isugid Ko ang Paghigugma sang Aton Amay

Isugid ko ang malig-on nga paghigugma sang aton Amay, ang mga pagdayaw sa iya, suno sa tanan nga iya ginhimo sa aton, kag ang daku nga kaayo nga iya ginpakita sa panimalay sang Israel, suno sa iya kalooy, suno sa iya bugana nga malig-on nga paghigugma.

Kay nagsiling sia, “Sa pagkamatuud sila akon katawohan, mga anak nga indi magluib.” Kag nangin ila Manluluwas sia.

Sa tanan nila nga kapipit-an nag-antos sia, kag ang manugbalita sang iya presensya nagluwas sa ila; sa iya paghigugma kag sa iya kalooy gintubos niya sila; ginsakwat niya sila kag gindala sila sa tanan nga mga adlaw sang dumaan. Apang nagrebelde sila kag ginpasubo nila ang iya Espiritu Santo; gani nagliso sia kag nangin ila kaaway, kag sia mismo nagpakig-away sa ila. Niyan gindumdom niya ang mga adlaw sang dumaan, ni Moises kag sang iya katawohan. Diin ang nagtuytoy sa ila paibabaw halin sa dagat, upod sang mga manugbantay sang iya panong? Diin ang nagbutang sang iya Espiritu Santo sa tunga nila, nga nag-untay sang iya mahimayaon nga butkon sa tuo nga kamot ni Moises, nga nagtunga sang mga tubig sa atubangan nila agud maghimo para sa iya kaugalingon sang isa ka ngalan nga walay katapusan, nga nagtuytoy sa ila latas sa kadadalman? Kaangay sang kabayo sa kamingawan, wala sila makasandad. Kaangay sang kasapatan nga nagapanaug sa nalupyakan, ang Espiritu sang aton Amay naghatag sa ila sang kapahuwayan. Gani gintuytoyan mo ang imo katawohan, agud maghimo para sa imo kaugalingon sang isa ka mahimayaon nga ngalan.

Tumuluk Ka Halin sa Langit

Tumuluk ka halin sa langit kag tan-awa, halin sa imo balaan kag mahimayaon nga puluy-an. Diin na ang imo kakugi kag ang imo gamhanan nga mga buhat? Ang pagbukal sang imo tagiposoon kag ang imo kalooy ginpunggan gikan sa akon. Kay ikaw amo ang amon Amay, bisan si Abraham wala makakilala sa amon kag ang Israel wala nagakilala sa amon; ikaw amo ang amon Amay; ang amon Manunubos halin sang una nga mga panag-on amo ang imo ngalan. Ngaa, Amay namon, ginatugotan mo kami nga magtalang halin sa imo mga dalanon kag ginapatig-a mo ang amon tagiposoon, sa bagay nga wala kami nagakahadlok sa imo? Magbalik ka tungud sa imo mga alagad, ang mga tribo sang imo panublion. Sa malip-ot nga tion ang imo balaan nga katawohan nagpanag-iya; gintapakan sang amon mga kaaway ang imo santuaryo. Nangin kaangay kami sadtong wala mo gid paggahuma, kaangay sadtong wala pagtawga sa imo ngalan.