Nee Ndinamatama Tayu
Munthu unango anakhonda kukhala dzololo mpaka cipulumuso ca Yerusalemu cinaoneka, mbaikha alindiri kuti apitirize kukumbusa Baba wathu usiku na masikati. Madzina ace anasanduka: nee Wakusiyidwa na Wakusala, mbwenye Ndinakomerwa Na Iye, na Wakumangwa. Baba wace anakondwa na iye ninga momwe mkwati anacitira.
62 1Thangwi ya Sioni nee ndinamatama tayu, pontho thangwi ya Yerusalemi nee ndinapuma tayu, mpaka kulungama kwace kunagaka ninga macibese, na upulumuki wace ninga nyale yakugaka. 2Madzinza anaona kulungama kwako, na amambo onsene anaona mbiri yako; iwe unacemerwa na dzina ipsa inafuna kukupasa Baba wathu Iye ene. 3Iwe unakhala nthimba yakubalika m'manja mwa Baba wathu, nthimba ya umambo m'manja mwa Baba wathu. 4Nee anadzakucemera pontho kuti Wakusiyiwa, nee anadzacemera dziko yako kuti Yakufudzika tayu; mbwenye iwe unadzacemerwa Hefiziba—Kukomerwa Kwanga Kuli mwa Iye—na dziko yako Bheula—Yakulombwa; thangwi ntima wa Baba wathu usakomerwa na iwe, na dziko yako inadzalombwa. 5Thangwi ninga mphale analomba ntsikana, tenepo anako anadzakulomba iwe; ninga mankhadzi anakomerwa na mankhadzikazi wace, tenepo Baba wako anadzakomerwa na iwe.
6Padzulu pa makhoma ako, Yerusalemi, ndaikha alindiri; ntsiku na masiku onsene nee anadzamatama tayu. Imwe ale musakumbusa Baba wathu, lekani kupuma, 7pontho lekani kumupasa mpumo mpaka Iye akhazikise Yerusalemi, mbacita kuti isimbwe pa dziko yonsene.
8Na nkono wace wa madyo Baba wathu alumbira, na nkono wace wamphambvu: “Nkhabe kudzapereka pontho tirigu wako kuna anyamalwa ako toera akhale cakudya tayu, nee alendo anadzamwa vinyu ipsa yakuti waphatira basa tayu; 9mbwenye ale anabvuna anadya mbasimba Baba wathu, na ale anagumanya anamwa m'mabwalo a nyumba yanga yakucena.”
10Pitani, pitani pa misuwo! Sasanyani njira ya mbumba. Mangani, mangani njira ikulu; bulusani miyala; kwirisani mbendera padzulu pa madzinza.
11Onani, Baba wathu adziwisa mpaka makunkhu a dziko yonsene: Pangani mwana wankazi wa Sioni: “Onani, upulumuki wako ukubwera; onani, muoni wace uli na Iye, na malipo ace pamaso pace.” a a v11 Cibvumbulutso 22:12 isatchula Ule anabwera—Yezu alonga kuti: “Onani, ndiri kubwera mwakucimbiza, mbandabweresa muoni wanga na Ine.”
12Iwo anadzacemerwa Anthu Akucena, Akuombolwa a Baba wathu; iwe unadzacemerwa Wakusakwa, Nzinda Wakukhonda Kusiyiwa.
