Isaiah 62

62 ¹Nítorí Síónì, èmi kì yóò dákẹ́, àti nítorí Jerusalẹmu, èmi kì yóò sinmi, títí òdodo rẹ̀ yóò fi tàn jáde bí ìmọ́lẹ̀ òwúrọ̀, àti ìgbàlà rẹ̀ bí ọ̀wọ́-iná tí ń jó. ²Àwọn orílẹ̀-èdè yóò rí òdodo rẹ, àti gbogbo ọba yóò rí ògo rẹ; a ó sì fi orúkọ tuntun pè ọ́, tí Baba wa fúnra rẹ̀ yóò fún ọ. ³Ìwọ yóò jẹ́ adé ẹwà ní ọwọ́ Baba wa, adé ọba ní ọwọ́ Baba wa. ⁴Wọn kì yóò pè ọ́ ní Ẹni Ìkọ̀sílẹ̀ mọ́, bẹ́ẹ̀ ni wọn kì yóò pe ilẹ̀ rẹ ní Ìdahoro; ṣùgbọ́n a ó pè ọ́ ní Hẹfisiba—Inú Mi Dùn Sí I—àti ilẹ̀ rẹ ní Beula—Ẹni Ìgbéyàwó; nítorí ọkàn Baba wa dùn sí ọ, ilẹ̀ rẹ yóò sì ní ọkọ. ⁵Nítorí bí ọ̀dọ́mọkùnrin ti ń fẹ́ ọ̀dọ́mọbìnrin, bẹ́ẹ̀ ni àwọn ọmọ rẹ yóò ṣe fẹ́ ọ; àti bí ọkọ ìyàwó ti ń yọ̀ sí ìyàwó rẹ̀, bẹ́ẹ̀ ni Baba rẹ yóò ṣe yọ̀ sí ọ.

⁶Lórí àwọn odi rẹ, Jerusalẹmu, mo ti fi àwọn olùṣọ́ sí; ní gbogbo ọ̀sán àti ní gbogbo òru wọn kì yóò dákẹ́ láé. Ẹ̀yin tí ń rán Baba wa létí, ẹ má ṣe sinmi, ⁷ẹ má sì ṣe jẹ́ kí ó sinmi títí yóò fi fìdí Jerusalẹmu múlẹ̀, tí yóò sì sọ ọ́ di ìyìn jákèjádò ayé.

⁸Fi ọwọ́ ọ̀tún rẹ̀ ni Baba wa ti búra, àti fi apá agbára rẹ̀ pé: “Èmi kì yóò fi ọkà rẹ fún àwọn ọ̀tá rẹ gẹ́gẹ́ bí oúnjẹ mọ́ láé, bẹ́ẹ̀ ni àwọn àjèjì kì yóò mu wáìnì tuntun tí ìwọ ṣe làálàá fún; ⁹ṣùgbọ́n àwọn tí wọ́n kórè rẹ̀ yóò jẹ ẹ́, wọn yóò sì yin Baba wa, àwọn tí wọ́n sì kó o jọ yóò mu ún ní àwọn àgbàlá ibi mímọ́ mi.”

¹⁰Ẹ gbà, ẹ gba àwọn ẹnu ibodè kọjá! Ẹ tún ọ̀nà ṣe fún àwọn ènìyàn. Ẹ mọ, ẹ mọ ọ̀nà òpópó; ẹ ṣa àwọn òkúta kúrò; ẹ gbé àsíá sókè lórí àwọn orílẹ̀-èdè.

¹¹Kíyèsíi, Baba wa ti kéde dé òpin ayé pé: Ẹ sọ fún ọmọbìnrin Síónì pé, “Kíyèsíi, ìgbàlà rẹ ń bọ̀; kíyèsíi, èrè rẹ̀ wà lọ́dọ̀ rẹ̀, ẹ̀san rẹ̀ sì wà níwájú rẹ̀.” ^a a v11 Ìfihàn 22:12 dárúkọ Ẹni tí ń bọ̀ yìí—Jesu wí pé, “Kíyèsíi, mò ń bọ̀ láìpẹ́, mo mú ẹ̀san mi wá pẹ̀lú mi.”

¹²A ó sì pè wọ́n ní Ènìyàn Mímọ́, Àwọn Ẹni Ìràpadà ti Baba wa; a ó sì pè ọ́ ní Ẹni-tí-a-wá-kiri, Ìlú Tí A kò Kọ̀sílẹ̀.