Moi Chup Nathakibo
Kunba ekjon Jerusalem laga bachai diya tu najanile tak mat nakori thakibo koi, aru rati-din amar Pitri ke hudi thakibole paharadar khan rakhi diye. Tai laga naam bodli hoi: Chari Diya aru Khali nohoi, kintu Tai Uporte Moi Khushi, aru Biya Kora. Dulha nisena Tai laga Pitri Tai uporte khushi kore.
62 1Sion laga karne Moi chup nathakibo, aru Jerusalem laga karne Moi aram nakoribo, jitia tak tar laga dharmikota phojur nisina ujala na hoi, aru tar laga mukti jolai thaka saaki nisina na hoi. 2Desh khan pora tumar dharmikota dikhibo, aru sob raja khan pora tumar mohima dikhibo; aru notun nam ekta pora tumi ke matibo, juntu amar Pitri nijor pora tumi ke dibo. 3Tumi amar Pitri laga hath te ekta sundor mukut hobo, amar Pitri laga hath te raja laga mukut ekta hobo. 4Aru tarkhan pora tumi ke “Chari Diya” kobo nai, aru tumar desh ke “Khali Jaga” nam dibo nai; kintu tumi ke “Hephzibah”—Moi laga Khushi Tar bhitor te ase—koi matibo, aru tumar desh ke “Beulah”—Shadi Kora; kilemane amar Pitri laga mon tumi laga uporte khushi ase, aru tumar desh shadi kora hobo. 5Kilemane ekjon jawan manuh pora ekjon jawan maiki ke shadi kora nisina, tumar putro khan pora tumi ke shadi koribo; aru ekjon damadi pora tar laga noya kone uporte khushi kora nisina, tumar Pitri pora tumi laga uporte khushi hobo.
6He Jerusalem, tumar bera khan uporte Moi rukhiya khan ke rakhise; pura din aru pura rati tarkhan kitia bhi chup nathakibo. Tumikhan kon pora amar Pitri ke yaad koradiye, nijor ke aram nadibi, 7aru Tar ke aram nadibi jitia tak Tar pora Jerusalem ke thik na kore aru pura prithibi te tai ke prosansa kora bona na kore.
8Amar Pitri pora Tar laga dyna hath pora kosom khaise, aru Tar takot laga bahu pora: “Aru kitia bhi Moi tumar dhan tumar dushman khan ke khana nimite nadibo, aru bahar desh laga manuh khan pora tumi mehnat kora notun angur ros nakhabo; 9kintu kon pora eitu katibo tarkhan pora eitu khabo aru amar Pitri ke prosansa koribo, aru kon pora eitu joma koribo tarkhan pora Moi laga pobitro jagah laga chowk te eitu khabo.”
10Paar hoi jabi, geit khan pora paar hoi jabi! Manuh khan nimite rasta taiyar koribi. Bonabi, dangor rasta bonabi; pathor khan ke hatai dibi; manuh khan uporte ekta jhanda uthai dibi.
11Sabi, amar Pitri pora prithibi laga shesh tak prochar korise: Sion laga chukri ke kobi, “Sabi, tumar mukti ahhi ase; sabi, Tar inam Tar logot te ase, aru Tar pukhti Tar age te ase.” a a v11 Prokahit Bakya 22:12 te ahhi thaka Ekjon ke naam loi ase — Jisu pora koise, “Sabi, Moi joldi ahhi ase, Moi laga inam Moi logot te loi kene.”
12Aru tarkhan ke “Pobitro Manuh Khan,” “amar Pitri laga Mukti Pua Khan” koi matibo; aru tumi ke “Bisara Manuh,” “Chari Nadiya Sheher Ekta” koi matibo.