Mwen P'ap Rete Pe

Yon moun refize rete an silans jiskaske tout moun wè delivrans Jerizalèm, epi li mete gadyen pou yo kontinye ap anmède Papa nou lajounen kou lannwit. Non li chanje: se pa Abandone ak Dezole ankò, men Mwen Pran Plezi Nan Li, ak Marye. Papa l kontan pou li tankou yon fiyanse.

Chapit 62.

Poutèt Siyon, mwen p'ap pe, epi poutèt Jerizalèm, mwen p'ap rete an repo, jouk jistis li a klere tankou bajou k'ap kase, epi delivrans li tankou yon flanbo k'ap boule. Nasyon yo va wè jistis ou, epi tout wa yo va wè glwa ou; epi y'a rele ou yon non nèf, yon non Papa nou menm va ba ou. W'a yon bèl kouwòn nan men Papa nou, yon kouwòn wa nan men Papa nou. Yo p'ap rele ou Abandone ankò, ni yo p'ap rele peyi ou a Dezole; men y'a rele ou Efziba—Kè M Kontan nan Li—epi peyi ou a Beoula—Marye; paske kè Papa nou pran plezi nan ou, epi peyi ou a va marye. Paske menm jan yon jenn gason marye ak yon jenn fi, se konsa pitit gason ou yo va marye avè ou; epi menm jan yon nonm k'ap marye kontan pou lamarye li, se konsa Papa ou va kontan pou ou.

Sou miray ou yo, Jerizalèm, mwen mete gad; tout lajounen ak tout lannwit yo p'ap janm pe. Nou menm k'ap fè Papa nou chonje, pa pran repo, epi pa kite li an repo jouk li tabli Jerizalèm epi fè yo fè lwanj li toupatou sou latè.

Papa nou fè sèman ak men dwat li, epi ak bra fòs li: “Mwen p'ap janm renmèt ble ou a bay lènmi ou yo pou yo manje ankò, ni etranje p'ap bwè diven nèf ou te travay di pou li a; men moun ki fè rekòt la va manje l epi y'a fè lwanj Papa nou, epi moun ki ranmase l yo va bwè l nan lakou kote ki apa pou mwen an.”

Pase, pase nan pòtay yo! Pare chemen an pou pèp la. Bati, bati gran wout la; wete wòch yo; leve yon drapo pou tout pèp yo.

Gade, Papa nou fè konnen nan dènye bout latè: Di pitit fi Siyon an, “Gade, delivrans ou ap vini; gade, rekonpans li avè l, epi sa li gen pou l bay la devan l.” ^a

Epi y'a rele yo Pèp Ki Sen an, Moun Papa nou Rachte yo; epi y'a rele ou Moun Yo Chache a, Yon Vil Yo Pa Abandone.