Isaia 62 FHB Father's Heart Bible™

62 ¹Nĩ ũndũ wa Zayuni ndigaakira, na nĩ ũndũ wa Jerusalemu ndigaahurũka, nginya ũthingu wake ũkaarĩra ta ũtheri wa rũũciinĩ, naguo ũhonokio wake ũkaarĩra ta gĩcinga gĩgũakana. ²Ndũũrĩrĩ nĩikoona ũthingu waku, nao athamaki oothe moone riiri waku; nawe ũgeetwo rĩĩtwa rĩerũ rĩrĩa Ithe witũ we mwene agaakũhe. ³Ũgaatuĩka thũmbĩ ya ũthaka guokoinĩ kwa Ithe witũ, thũmbĩ ya ũthamaki guokoinĩ kwa Ithe witũ. ⁴Matigaacooka gũgwĩta Mũtiganĩrie, kana meete bũrũri waku Ũkirĩte; no ũgeetwo Hefeziba—Gĩkeno Gĩakwa Kĩrĩ Harĩ We—naguo bũrũri waku Beula—Mũhiku; tondũ ngoro ya Ithe witũ nĩĩkenaga nĩ ũndũ waku, naguo bũrũri waku nĩũkaahikania. ⁵Nĩgũkorwo o ta ũrĩa mwanake ahikagia mũirĩĩtu, noguo aariũ aku magaagũhikia; na o ta ũrĩa mũhikania akenagĩra mũhiki wake, noguo Ithe waku agaagũkenera.

⁶Thingoinĩ ciaku, wee Jerusalemu, nĩnjigĩte arangĩri; mũthenya wothe na ũtukũ wothe matigaakira o na rĩ. Inyuĩ mũririkanagia Ithe witũ, mũtikehurũkie, ⁷na mũtikamũhurũkie nginya akaarũgamia Jerusalemu, na atũme ĩgoocagwo thĩ yothe.

⁸Na guoko gwake kwa ũrĩo, Ithe witũ nĩehĩtĩte, o na na gĩcoka kĩa hinya wake, atĩrĩ: “Ndigacooka kũheana ngano yaku kũrĩ thũ ciaku ĩtuĩke irio ciacio, kana ageni manyue ndibei njerũ ĩrĩa werutĩire wĩra; ⁹no arĩa makaamĩgetha nĩo makaamĩrĩa na magooce Ithe witũ, nao arĩa makaamĩcookanĩrĩria nĩo makaamĩnyuĩra nja cia handũ hakwa harĩa haamũre.”

¹⁰Hĩtũkĩrai, hĩtũkĩrai ihingoinĩ! Haarĩriai andũ njĩra. Aakai, aakai njĩra ĩrĩa nene; eheriai mahiga; haandai bendera igũrũ rĩa ndũũrĩrĩ.

¹¹Atĩrĩrĩ, Ithe witũ nĩanĩrĩire nginya ituri cia thĩ: Ĩrai mwarĩ wa Zayuni, “Atĩrĩrĩ, ũhonokio waku nĩ ũrooka; atĩrĩrĩ, irĩhi rĩake arĩ naarĩo, naguo mũcaara wake ũrĩ mbere yake.” ^a a v11 Kũguũrĩrio 22:12 nĩrĩgwetete ũyũ ũrooka — Jesũ ekuuga atĩrĩ, “Atĩrĩrĩ, ndĩrooka o narua, njookĩte na irĩhi rĩakwa.”

¹²Nao mageetwo Andũ Aamũre, Arĩa Akũũre a Ithe witũ; nawe ũgeetwo Ũrĩa Wacaririo, Itũũra Rĩtatiganĩirio.