U-Izaya 62

62 ¹Ngenxa yeSiyoni angiyikuthula, nangenxa yeJerusalema angiyikuphumula, kuze kuthi ukulunga kwayo kukhanye njengokusa, nensindiso yayo njengesibani esivuthayo. ²Izizwe ziyakubona ukulunga kwakho, namakhosi onke abone inkazimulo yakho; uyakubizwa ngegama elisha uBaba wethu ngokwakhe ayakulinika. ³Uyakuba ngumqhele wobuhle esandleni sikaBaba wethu, umqhele wobukhosi esandleni sikaBaba wethu. ⁴Abasayikukubiza ngokuthi Olahliweyo, nezwe lakho abasayikulithiya ngokuthi Incithakalo; kodwa uyakubizwa ngokuthi uHefesiba—okungukuthi iNtokozo Yami Ikuye—nezwe lakho uBheyula—okungukuthi Oganiweyo; ngokuba inhliziyo kaBaba wethu iyathokoza ngawe, nezwe lakho liyakuganwa. ⁵Ngokuba njengensizwa ishada intombi, kanjalo amadodana akho ayakushada nawe; futhi njengomkhwenyana ethokoza ngomlobokazi wakhe, kanjalo uYihlo uyakuthokoza ngawe.

⁶Ezindongeni zakho, Jerusalema, ngibekile abalindi; imini yonke nobusuku bonke abasoze bathula. Nina enikhumbuza uBaba wethu, ningaziniki ukuphumula, ⁷ningamniki ukuphumula kuze amise iJerusalema ayenze idunyiswe emhlabeni wonke.

⁸Ngesandla sakhe sokunene uBaba wethu ufungile, nangengalo yamandla akhe: “Angisayikuwanika amabele akho ezitheni zakho abe ngukudla, abafokazi abasayikuliphuza iwayini elisha owawukhandlekela lona; ⁹kodwa abawavunayo bayakuwadla badumise uBaba wethu, nabaliqoqayo bayakuliphuza emagcekeni endlu yami engcwele.”

¹⁰Dabulani, dabulani emasangweni! Lungiselani abantu indlela. Akhani, akhani umgwaqo omkhulu; susani amatshe; phakamiselani izizwe uphawu.

¹¹Bhekani, uBaba wethu umemezelile emikhawulweni yomhlaba: Yithini kuyo indodakazi yaseSiyoni, “Bheka, insindiso yakho iyeza; bheka, umvuzo wakhe ukuye, nenkokhelo yakhe iphambi kwakhe.” ^a a v11 IsAmbulo 22:12 libiza lo Oza — uJesu uthi: “Bheka, ngiza masinyane, ngiphethe umvuzo wami.”

¹²Bayakubizwa ngokuthi Abantu Abangcwele, Abahlengiweyo bakaBaba wethu; wena uyakubizwa ngokuthi Ofunwayo, uMuzi Ongalahlwanga.