Ina Kasaikha Mapamra
Jerusalemwui huikhami mashokranglakha eina tangda akhana kasaikha mapammara, kala ithumwui Avāli ngashun ngayā mangasāmi khavai khamayonbing haimi. Awui ming ngateira: Horkahai kala Ramcho maningluimara, kha Iwui Khamathān Ali Lei, kala Shakzā Kahaiva̱ da hora. Mayarana ngalāva̱ chili ningyāngkhaung thāda awui Avāna ali ningyāngkhaungra.
62 1Zionwui vang eina ina kasaikha mapamara, kala Jerusalemwui vang eina ina mangasāmkhuimana, awui khamashung khangarong kazingkathang thāda, kala awui huikhami meiwon kakā zārmei thāda horshokranglakha eina tangda. 2Yurbingna nawui khamashung khangarong theira, kala awunga saikorana nawui tekhamatei theira; kala na aming kadhara akhana kaho hora, chi aming ithumwui Avā khalattana nali mira. 3Na ithumwui Avāwui pāngli khamathā kuihon ngasāra, kala ithumwui Avāwui pāngli wungnaowui kuihon ngasāra. 4Nali 'Malaihaira' da maholuimara, kala nawui ngaleili 'Ngachakting' da maphokmiluimara; kha nali 'Hephzibah', Iwui Ringkaphā Awuili Lei, da hora, kala nawui ngaleili 'Beulah', Fathuihaiva̱ da hora; kaja ithumwui Avāwui ningna nali ningyāng unga, kala nawui ngalei fathuihaira. 5Yaronnao akhana ngalānao akhali ngakumda thāda, chithāda nawui naomayarabingna nali ngakumra; kala mākakhāma china awui shakazā ngalāva̱li ringphāda thāda, chithāda nawui Avāna nawuitungli ringphāra.
6O Jerusalem, nawui phākholi ina khamayonabing haivāsera; ngashun ngayā mateila athumna kasaikha mapamchingmara. Nathum ithumwui Avāli phaningung ngasakabing, nathum khalatta mangasāmkhui ngasakalu, 7kala ali mangasāmkhui ngasakalu, ana Jerusalemli sakā, kala okathui peichaoda ali masot ngasakranglakha eina tangda.
8Ithumwui Avāna awui yāpang eina, kala awui pangshap pāngthei eina ngashithaira: "Ina nawui māngum nawui yangkashebingli kashakazā vang eina mamiluimara, kala nana vāsang kahai drakhāra̱ yur kateibingna mamangluimara; 9kha ali mahā kasābingna chi zāda ithumwui Avāli sochikatra, kala ali kazipkhuibingna iwui kathara shimwui kayāngli chi mangra."
10Kānthulu, ngaveibing eina kānthulu! mibingwui vang shongfa ngarānlu. Chānrei sakālu, sakāmiluishitlu; lungguibing kashamshoklu; miyurbingwui tungli philān shunlu.
11Yanglu, ithumwui Avāna okathuiwui akatang saikorali hāshoka: Zionwui naongalāva̱li hānglu, "Yanglu, nawui huikhami rārāsai; yanglu, awui sāman awuili lei, kala runkhami awui mangāli lei." a a v11 Revelation 22:12na hi kharāme chili phokmi—Jishuna hānga, "Yanglu, ina kasha̱kha rāra, iwui runkhami iwuimāng khuida."
12Kala athumli 'Kathara Mibing', ithumwui Avāna Ngatangkhuihaibing da hora; kala nali 'Phākhuihaira', 'Malaihaimahai Keinung' da hora.
