Yalendaku Dibata
Mutu mosi kalendaku dibata tee yikuna luhulusu lwa Yelusalemi lwamonika, amana wisi telamisa bakengi mu kuyubulula Tata wetu mwini yi phipha konda kulembwa. Mazina mandi mabaluka: ka Wayambwala yi Zumbu ku, kaasi Tsambu Yama Yenina Mwena Yandi, amana Wakwela. Tata wandi wisi munsangadila hanga mukwedi bu kisi sangwala.
Tata wetu kisi zonza mu mavese 8–9, 11
62 1Kikuma kya Siyoni, yálendaku dibata, amana kikuma kya Yelusalemi, yálendaku lembwa, tii yikuna masonga mandi makenzuka hanga suka, amana luhulusu lwandi hanga mwinda wa mbawu. 2Makanda makamona masonga maku, amana bakyamvu boosu bakamona khembu yaku; amana bakúkutela ngeyi khumbu ya pha yina Tata wetu yandi-meni kakúheka. 3Ngeyi wukála mukhonzi wa phisi mu koku dya Tata wetu, mukhonzi wa kipfumu mu koku dya Tata wetu. 4Balendaku hika kukutela ngeyi Wayambwala, amana balendaku hika kutela tsi yaku Zumbu; kaasi bakúkutela ngeyi Hefisiba—disongidila Tsambu Yama Yenina Mwena Yandi—amana tsi yaku Beyula—disongidila Wakwela; mukuma mbundu ya Tata wetu yisi monina tsambu mwena ngeyi, amana tsi yaku yakakwélama. 5Mukuma hanga ditoko disi kwela ndumba, bwabuna bana baku bakakukwela ngeyi; amana hanga mukwedi kisi sangwala kikuma kya mukhetu wandi wa longu, bwabuna Tata waku kakusangwadila ngeyi.
6Hana bibaka byaku, Yelusalemi, yíthetika bakengi; mwini wosu yi phipha yosu balendaku dibata. Benu bana lwisi yubulula Tata wetu, lulembwaku, 7amana lumuyambulaku kalembwa tii yikuna kakódisa Yelusalemi amana kakhitula yandi kima kya lukumu mu tsi yosu.
8Mu koku dyandi dya lubakala, Tata wetu wádya ndefi, amana mu koku dya ngolu zandi: «Yilendaku hika kuheka bule dyaku kwena bambeni baku hanga madya, amana banzenza balendaku nwa vinu dya pha dina wásadila; 9kaasi bana bakúhela dyawu bakadya amana bakazatula Tata wetu, amana bana bakútikisa bakanwa muna luphangu lwa kikumbu kyama.»
10Luhituka, luhituka mu mwelu! Luyidika nzila kikuma kya batu. Lutunga, lutunga nzila yineni; lukatula matadi; luzangula mwanza hana thandu ya bikanda.
11Tala, Tata wetu wásamuna tii yi muna mwatsukila tsi: Luzimbwala kwena mwana wa ndumba wa Siyoni: «Tala, luhulusu lwaku lwisini; tala, lufutu lwandi lwenina yi yandi, amana thalu yandi ku thwala yandi.» a a v11 Mukanda wa Lusengumunu 22:12 wusi tela wuna wisi kwisa — Yesu wuzimbudi: «Tala, yikwisa nswalu, yinata lufutu lwama yi meni.»
12Amana bakábatela Batu Batoma, Bahuluka ba Tata wetu; amana ngeyi bakúkutela Wasandama, Mbanza Yikondi Yambwala.
