1 ሳሙኤል 23

23 ¹ለዳዊትም እንዲህ ብለው ነገሩት፤ “እነሆ፣ ፍልስጤማውያን ቅዒላን እየወጉ ዐውድማዎችንም እየዘረፉ ነው።”

²ዳዊትም አባታችንን፣ “ሄጄ እነዚህን ፍልስጤማውያን ልውጋ?” ሲል ጠየቀ። አባታችንም፣ “ሂድ፣ ፍልስጤማውያንን ውጋ ቅዒላንም አድን” ብሎ መለሰለት።

³የዳዊት ሰዎች ግን፣ “እነሆ፣ እዚህ በይሁዳ እንኳ እንፈራለን፤ በፍልስጤማውያን ጦር ሰራዊት ላይ ወደ ቅዒላ ብንሄድማ እንዴት ይበልጥ የባሰ ይሆናል!” አሉ።

⁴ዳዊትም እንደ ገና አባታችንን ጠየቀ፤ አባታችንም፣ “ተነሥተህ ወደ ቅዒላ ውረድ፤ ፍልስጤማውያንን በእጅህ አሳልፌ እሰጥሃለሁና” ብሎ መለሰለት።

⁵ዳዊትና ሰዎቹ ወደ ቅዒላ ሄደው ፍልስጤማውያንን ወጉ፤ ከብቶቻቸውንም ነድተው ወሰዱ፤ ታላቅ መቅሠፍትም መቷቸው የቅዒላን ነዋሪዎች አዳኑ።

⁶የአኺሜሌክ ልጅ አብያታር በቅዒላ ወዳለው ዳዊት ሸሽቶ በመጣ ጊዜ ኤፉድ በእጁ ይዞ መጣ።

⁷ሳኦልም ዳዊት በቅዒላ እንዳለ በሰማ ጊዜ፣ “እግዚአብሔር ዳዊትን በእጄ አሳልፎ ሰጥቶታል፤ በሮችና መቀርቀሪያዎች ባሉበት ከተማ ገብቶ ራሱን አጥምዷልና” አለ። ⁸ሳኦልም ወደ ቅዒላ ወርደው ዳዊትንና ሰዎቹን እንዲከቡ፣ ሕዝቡን ሁሉ ለጦርነት ጠራ። ⁹ዳዊትም ሳኦል በእርሱ ላይ ክፉ እንደሚያደምም ባወቀ ጊዜ፣ ካህኑን አብያታርን፣ “ኤፉዱን ወደዚህ አምጣ” አለው። ¹⁰ዳዊትም እንዲህ አለ፤ “አባቴ ሆይ፣ የእስራኤል አምላክ፣ ሳኦል ወደ ቅዒላ መጥቶ በእኔ ምክንያት ከተማይቱን ሊያጠፋ እንዳሰበ ባሪያህ በርግጥ ሰምቷል።

¹¹የቅዒላ ሰዎች አሳልፈው ይሰጡኛልን? ባሪያህ እንደ ሰማው ሳኦል ይወርዳልን? አባቴ ሆይ፣ የእስራኤል አምላክ፣ ባሪያህን እባክህ ንገረው።” አባታችንም፣ “ይወርዳል” አለ።

¹²ዳዊትም፣ “የቅዒላ ሰዎች እኔንና ሰዎቼን ለሳኦል አሳልፈው ይሰጡናልን?” ሲል ጠየቀ። አባታችንም፣ “አሳልፈው ይሰጡሃል” አለ።

¹³ዳዊትና ስድስት መቶ የሚሆኑ ሰዎቹ ከቅዒላ ወጥተው ከቦታ ወደ ቦታ ተቅበዘበዙ። ዳዊትም ከቅዒላ እንዳመለጠ በተነገረው ጊዜ ሳኦል መከተሉን ተወ። ¹⁴ዳዊትም በምድረ በዳው ምሽጎችና በዚፍ ምድረ በዳ ተራራማ አገር ተቀመጠ። ሳኦልም ዕለት ዕለት ይፈልገው ነበር፤ አባታችን ግን በእጁ አሳልፎ አልሰጠውም። ¹⁵ዳዊትም በዚፍ ምድረ በዳ በሖሬሽ ሳለ፣ ሳኦል ነፍሱን ለመፈለግ እንደ ወጣ አየ። ¹⁶የሳኦል ልጅ ዮናታንም ተነሥቶ በሖሬሽ ወዳለው ዳዊት ሄደ፤ በአባታችንም አበረታው። ¹⁷እንዲህም አለው፤ “አትፍራ፤ የአባቴ የሳኦል እጅ አታገኝህም። አንተ በእስራኤል ላይ ትነግሣለህ፤ እኔም ከአንተ ሁለተኛ እሆናለሁ። አባቴ ሳኦል እንኳ ይህን ያውቃል።” ¹⁸ሁለቱም በአባታችን ፊት ኪዳን ተጋቡ። ዳዊትም በሖሬሽ ቀረ፤ ዮናታን ግን ወደ ቤቱ ሄደ።

¹⁹ዚፋውያንም ወደ ጊብዓ ወደ ሳኦል ወጥተው፣ “ዳዊት በይሺሞን ደቡብ ባለው በሐኪላ ኮረብታ ላይ፣ በሖሬሽ ምሽጎች መካከል በእኛ ዘንድ ተሸሽጎ የለምን? ²⁰ንጉሥ ሆይ፣ አሁን እንደ ፈቀድህ ውረድ፣ በርግጥ ውረድ፤ እርሱን በንጉሡ እጅ አሳልፎ መስጠት የእኛ ድርሻ ነው” አሉ።

²¹ሳኦልም እንዲህ አለ፤ “ስለ ራራችሁልኝ አባታችን ይባርካችሁ። ²²ሂዱ፣ ደግሞም ተዘጋጁ፤ እግሩ የሚረግጥበትን ስፍራ፣ በዚያም ያየውን ሰው ዕወቁ፤ እጅግ ተንኰለኛ እንደ ሆነ ተነግሮኛልና። ²³የሚሸሸግባቸውን መሸሸጊያ ስፍራዎች ሁሉ ዐውቃችሁ የተረጋገጠ ወሬ አምጡልኝ። ከእናንተም ጋራ እሄዳለሁ፤ በምድሪቱም ካለ፣ በይሁዳ ነገዶች ሁሉ መካከል ፈልጌ አገኘዋለሁ” አለ።

²⁴እነርሱም ተነሥተው ከሳኦል ቀድመው ወደ ዚፍ ሄዱ። ዳዊትና ሰዎቹ ግን በይሺሞን ደቡብ በዓረባ፣ በሜዖን ምድረ በዳ ነበሩ። ²⁵ሳኦልና ሰዎቹም ሊፈልጉ ተነሡ፤ ለዳዊትም ተነገረው። ወደ ዓለቱም ወርዶ በሜዖን ምድረ በዳ ተቀመጠ። ሳኦልም በሰማ ጊዜ ዳዊትን ወደ ሜዖን ምድረ በዳ ተከተለው። ²⁶ሳኦል በተራራው በአንድ ወገን፣ ዳዊትና ሰዎቹም በሌላው ወገን ሄዱ፤ ዳዊትም ከሳኦል ለማምለጥ ይቸኩል ነበር፤ ሳኦልና ሰዎቹ ግን ዳዊትንና ሰዎቹን ለመያዝ ይከቡአቸው ነበር። ²⁷ነገር ግን መልእክተኛ ወደ ሳኦል መጥቶ፣ “ፍጠንና ና! ፍልስጤማውያን ምድሪቱን እየወረሩ ነውና” አለ። ²⁸ስለዚህ ሳኦል ዳዊትን መከተሉን ትቶ ፍልስጤማውያንን ለመውጋት ሄደ። ያን ስፍራም ሴላ-ሃማሕሌቆት ብለው የጠሩት ስለዚህ ነው። ^a a v28 ሴላ-ሃማሕሌቆት ማለት “የመለያየት ዓለት” ማለት ነው — የፍልስጤማውያን ወረራ ሳኦልን ማሳደዱን እንዲያቋርጥ ባስገደደው ጊዜ ሳኦልና ዳዊት እርስ በርሳቸው የተለያዩበት ስፍራ ነው። ²⁹ዳዊትም ከዚያ ወጥቶ በዒንጌዲ ምሽጎች ተቀመጠ።