1 சாமுவேல் 23

23 ¹அவர்கள் தாவீதுக்கு அறிவித்து, “இதோ, பெலிஸ்தர் கேகிலாவுக்கு விரோதமாய் யுத்தம்பண்ணி, களங்களைக் கொள்ளையிடுகிறார்கள்” என்றார்கள்.

²அப்பொழுது தாவீது எங்கள் பிதாவை நோக்கி, “நான் போய் இந்தப் பெலிஸ்தரைத் தாக்கலாமா?” என்று விசாரித்தான். அதற்கு எங்கள் பிதா, “நீ போய், பெலிஸ்தரைத் தாக்கி, கேகிலாவை மீட்டுக்கொள்” என்று பதிலளித்தார்.

³தாவீதின் மனுஷர் அவனை நோக்கி, “இதோ, இங்கே யூதாவிலேயே நாங்கள் பயந்திருக்கிறோம்; அப்படியிருக்க, பெலிஸ்தருடைய படைவகுப்புகளுக்கு விரோதமாய்க் கேகிலாவுக்குப் போனால் எத்தனை அதிகமாய்!” என்றார்கள்.

⁴தாவீது மறுபடியும் எங்கள் பிதாவை விசாரித்தான்; எங்கள் பிதா அவனுக்குப் பதிலாக, “எழுந்து, கேகிலாவுக்கு இறங்கிப்போ; நான் பெலிஸ்தரை உன் கையில் ஒப்புக்கொடுக்கிறேன்” என்றார்.

⁵அப்பொழுது தாவீதும் அவன் மனுஷரும் கேகிலாவுக்குப் போய், பெலிஸ்தரோடு யுத்தம்பண்ணி, அவர்களுடைய மிருகஜீவன்களை ஓட்டிக்கொண்டுவந்து, அவர்களை மகா சங்காரமாய் முறியடித்து, கேகிலாவின் குடிகளை மீட்டார்கள்.

⁶அகிமெலேக்கின் குமாரனாகிய அபியத்தார் கேகிலாவிலிருந்த தாவீதினிடத்திற்கு ஓடிவந்தபோது, ஏபோத்தைத் தன் கையில் வைத்துக்கொண்டு வந்தான்.

⁷தாவீது கேகிலாவில் இருக்கிறான் என்று சவுலுக்கு அறிவிக்கப்பட்டபோது, சவுல், “தேவன் அவனை என் கையில் ஒப்புக்கொடுத்தார்; அவன் கதவுகளும் தாழ்ப்பாள்களுமுள்ள பட்டணத்தில் பிரவேசித்ததினால், தன்னைத்தானே அடைத்துக்கொண்டான்” என்றான். ⁸பின்பு சவுல், கேகிலாவுக்கு இறங்கிப்போய், தாவீதையும் அவன் மனுஷரையும் முற்றிக்கைபோடும்படி, ஜனங்களெல்லாரையும் யுத்தத்திற்கு வரவழைத்தான். ⁹சவுல் தனக்கு விரோதமாய்ப் பொல்லாப்பு யோசிக்கிறான் என்று தாவீது அறிந்து, ஆசாரியனாகிய அபியத்தாரை நோக்கி, “ஏபோத்தை இங்கே கொண்டுவா” என்றான். ¹⁰பின்பு தாவீது, “இஸ்ரவேலின் தேவனாகிய என் பிதாவே, சவுல் என்னிமித்தம் கேகிலாவுக்கு வந்து, பட்டணத்தை அழிக்க யோசிக்கிறான் என்பதை உமது அடியேன் நிச்சயமாய்க் கேள்விப்பட்டேன்.

¹¹கேகிலாவின் குடிகள் என்னை அவன் கையில் ஒப்புக்கொடுப்பார்களா? உமது அடியேன் கேள்விப்பட்டபடியே சவுல் இறங்கிவருவானா? இஸ்ரவேலின் தேவனாகிய என் பிதாவே, உமது அடியேனுக்குத் தயவுசெய்து அறிவியும்” என்றான். அதற்கு எங்கள் பிதா, “அவன் இறங்கிவருவான்” என்றார்.

¹²அப்பொழுது தாவீது, “கேகிலாவின் குடிகள் என்னையும் என் மனுஷரையும் சவுலின் கையில் ஒப்புக்கொடுப்பார்களா?” என்று கேட்டான். அதற்கு எங்கள் பிதா, “ஒப்புக்கொடுப்பார்கள்” என்றார்.

¹³அப்பொழுது தாவீதும் ஏறக்குறைய அறுநூறுபேராகிய அவன் மனுஷரும் எழுந்து, கேகிலாவைவிட்டுப் புறப்பட்டு, தாங்கள் போகக்கூடிய இடங்களுக்கெல்லாம் அலைந்து திரிந்தார்கள். தாவீது கேகிலாவிலிருந்து தப்பிப்போனான் என்று சவுலுக்கு அறிவிக்கப்பட்டபோது, அவன் அவனைப் பின்தொடர்வதை நிறுத்தினான். ¹⁴தாவீது வனாந்தரத்திலுள்ள அரணான இடங்களிலும், சீப் வனாந்தரத்தின் மலைத்தேசத்திலும் தங்கியிருந்தான். சவுல் நாள்தோறும் அவனைத் தேடினான்; ஆனாலும் எங்கள் பிதா அவனை இவன் கையில் ஒப்புக்கொடுக்கவில்லை. ¹⁵தாவீது தன் பிராணனை வாங்கத் தேடி சவுல் புறப்பட்டுவந்ததைக் கண்டபோது, அவன் சீப் வனாந்தரத்திலுள்ள கோரேசில் இருந்தான். ¹⁶சவுலின் குமாரனாகிய யோனத்தான் எழுந்து, கோரேசில் இருந்த தாவீதினிடத்திற்குப் போய், அவனை எங்கள் பிதாவில் திடப்படுத்தி, ¹⁷அவனை நோக்கி, “பயப்படாதே; என் தகப்பனாகிய சவுலின் கை உன்னைக் கண்டுபிடிக்காது; நீ இஸ்ரவேலின்மேல் ராஜாவாவாய், நான் உனக்கு இரண்டாவதாய் இருப்பேன்; இதை என் தகப்பனாகிய சவுலும் அறிவான்” என்றான். ¹⁸அவர்கள் இருவரும் எங்கள் பிதாவுக்கு முன்பாக உடன்படிக்கைபண்ணினார்கள். தாவீது கோரேசில் தங்கினான்; யோனத்தான் தன் வீட்டுக்குப் போனான்.

¹⁹அப்பொழுது சீப்பியர் கிபியாவிலிருந்த சவுலினிடத்திற்குப் போய், “எஷிமோனுக்குத் தெற்கேயுள்ள அகிலா மேட்டிலிருக்கிற கோரேசின் அரணான இடங்களில் தாவீது எங்களிடத்தில் ஒளிந்துகொண்டிருக்கிறான் அல்லவா? ²⁰இப்பொழுதும் ராஜாவே, உமது மனவிருப்பத்தின்படி நீர் இறங்கிவாரும், இறங்கியே வாரும்; அவனை ராஜாவின் கையில் ஒப்புக்கொடுப்பது எங்கள் கடமையாயிருக்கும்” என்றார்கள்.

²¹அப்பொழுது சவுல், “நீங்கள் என்மேல் இரக்கம் வைத்தபடியால், எங்கள் பிதா உங்களை ஆசீர்வதிப்பாராக. ²²நீங்கள் போய், இன்னும் ஆயத்தப்படுங்கள்; அவன் காலடி வைக்கும் இடத்தையும், அங்கே அவனைக் கண்டவர் யார் என்பதையும் அறிந்துகொள்ளுங்கள்; அவன் மகா தந்திரமுள்ளவன் என்று எனக்கு அறிவிக்கப்பட்டது. ²³அவன் ஒளிந்துகொள்ளுகிற எல்லா மறைவிடங்களையும் அறிந்துகொண்டு, நிச்சயமான செய்தியை என்னிடத்தில் கொண்டுவாருங்கள்; அப்பொழுது நான் உங்களோடேகூட வருவேன்; அவன் தேசத்தில் இருந்தால், யூதாவின் சகல வம்சங்களுக்குள்ளும் அவனைத் தேடிக் கண்டுபிடிப்பேன்” என்றான்.

²⁴அவர்கள் எழுந்து, சவுலுக்கு முன்னே சீப்புக்குப் போனார்கள். தாவீதும் அவன் மனுஷரும் எஷிமோனுக்குத் தெற்கே அரபாவிலுள்ள மாவோன் வனாந்தரத்தில் இருந்தார்கள். ²⁵சவுலும் அவன் மனுஷரும் அவனைத் தேடப் புறப்பட்டார்கள்; அது தாவீதுக்கு அறிவிக்கப்பட்டது; அப்பொழுது அவன் கன்மலையிலிருந்து இறங்கி, மாவோன் வனாந்தரத்தில் தங்கினான். சவுல் அதைக் கேள்விப்பட்டு, மாவோன் வனாந்தரத்தில் தாவீதைப் பின்தொடர்ந்து போனான். ²⁶சவுல் மலையின் ஒரு பக்கத்திலும், தாவீதும் அவன் மனுஷரும் மலையின் மறுபக்கத்திலும் நடந்தார்கள்; தாவீது சவுலைவிட்டுத் தப்பிப்போகத் தீவிரமாய் நடந்தான்; சவுலும் அவன் மனுஷரும் தாவீதையும் அவன் மனுஷரையும் பிடிக்கும்படி அவர்களைச் சூழ்ந்துகொண்டார்கள். ²⁷அப்பொழுது ஒரு தூதன் சவுலினிடத்தில் வந்து, “நீர் சீக்கிரமாய் வாரும்; பெலிஸ்தர் தேசத்தின்மேல் படையெடுத்து வந்திருக்கிறார்கள்” என்றான். ²⁸அப்பொழுது சவுல் தாவீதைப் பின்தொடர்வதை நிறுத்தி, பெலிஸ்தருக்கு எதிராகப் போனான்; ஆகையால் அந்த இடத்திற்கு சேலா-அம்மாலிகோத் என்று பேரிட்டார்கள். ^a a v28 சேலா-அம்மாலிகோத் என்றால் “பிரிந்துபோகுதலின் கன்மலை” என்று அர்த்தம் — பெலிஸ்தருடைய படையெடுப்பு சவுலைத் துரத்துதலை நிறுத்திவிடச் செய்தபோது, சவுலும் தாவீதும் ஒருவரையொருவர்விட்டுப் பிரிந்துபோன இடம். ²⁹தாவீது அவ்விடத்தைவிட்டுப் போய், என்கேதியிலுள்ள அரணான இடங்களில் தங்கியிருந்தான்.