1 ሳሙኤል 24

24 ¹ሳኦል ፍልስጥኤማውያንን ከማሳደድ ከተመለሰ በኋላ፣ “ዳዊት በዔንጌዲ ምድረ በዳ ነው” ተብሎ ተነገረው። ²ሳኦልም ዳዊትንና ሰዎቹን በዱር ፍየሎች ዐለቶች ፊት ለፊት ይፈልግ ዘንድ፣ ከመላው እስራኤል የተመረጡ ሦስት ሺህ ሰዎችን ይዞ ሄደ። ³በመንገዱ ዳር ወደ ነበሩት የበጎች በረቶች ደረሰ፤ በዚያም ዋሻ ነበረ። ሳኦልም እግሩን ለመሸፈን ወደ ዋሻው ገባ፤ ዳዊትና ሰዎቹም በዋሻው ጥልቅ ውስጥ ተቀምጠው ነበር። ⁴የዳዊት ሰዎች፣ “አባታችን፣ ‘ጠላትህን በእጅህ አሳልፌ እሰጥሃለሁ፤ የወደድኸውንም ታደርግበታለህ’ ብሎ የተናገረህ ቀን ይህ ነው” አሉት። ዳዊትም ተነሥቶ የሳኦልን ልብስ ዘርፍ ዝም ብሎ ቈረጠ። ⁵ከዚያ በኋላ የሳኦልን ልብስ ዘርፍ ስለ ቈረጠ የዳዊት ኅሊና ወቀሰው። ⁶ሰዎቹንም፣ “ይህን በጌታዬ፣ በአባታችን ቅቡዕ ላይ አደርግ ዘንድ፣ እጄንም በእርሱ ላይ አነሣ ዘንድ አባታችን ይከልክለኝ፤ እርሱ የአባታችን ቅቡዕ ነውና” አላቸው። ⁷ዳዊትም በዚህ ቃል ሰዎቹን ሳኦልን እንዳያጠቁ ገታቸው። ሳኦልም ከዋሻው ወጥቶ መንገዱን ቀጠለ። ⁸ዳዊትም ተነሥቶ ከዋሻው ወጣ፤ ከሳኦልም ኋላ፣ “ጌታዬ ንጉሥ ሆይ!” ብሎ ጠራ። ሳኦልም ወደ ኋላው ተመለከተ፤ ዳዊትም በግንባሩ ወደ ምድር ተደፋ።

⁹ዳዊትም ሳኦልን እንዲህ አለው፤ “‘እነሆ፣ ዳዊት ሊጐዳህ ይፈልጋል’ የሚሉትን ሰዎች ቃል ለምን ትሰማለህ? ¹⁰ዛሬ አባታችን በዋሻው ውስጥ በእጄ እንዴት አሳልፎ እንደ ሰጠህ ዐይኖችህ አይተዋል። አንዳንዶችም ልገድልህ አነሣሱኝ፤ እኔ ግን ራራሁልህ፤ ‘እጄን በጌታዬ፣ በአባታችን ቅቡዕ ላይ አላነሣም’ አልሁ። ¹¹እነሆ አባቴ፣ የልብስህ ዘርፍ በእጄ ነው! ቈረጥሁት እንጂ አልገደልሁህም። በእጄ ክፋትም ሆነ ዐመፅ እንደ ሌለ ዕወቅ፤ እይም። አንተን አልበደልሁም፤ አንተ ግን ነፍሴን ልትወስድ ታሳድዳታለህ። ¹²አባታችን በእኔና በአንተ መካከል ይፍረድ፤ አባታችንም ከአንተ ይበቀልልኝ፤ እጄ ግን አይነካህም። ¹³የቀድሞ ምሳሌ፣ ‘ክፋት ከክፉዎች ይወጣል’ እንደሚል፣ እጄ በአንተ ላይ አይሆንም። ¹⁴የእስራኤል ንጉሥ ማንን ለማሳደድ ወጣ? ማንንስ ታሳድዳለህ? የሞተ ውሻን? አንዲት ቍንጫን? ¹⁵አባታችን በእኔና በአንተ መካከል ይፍረድ፤ ይይም፤ ነገሬንም ይሟገትልኝ፤ ከእጅህም ያድነኝ።”

¹⁶ዳዊት ይህን ለሳኦል ተናግሮ በጨረሰ ጊዜ፣ ሳኦል፣ “ልጄ ዳዊት ሆይ፣ ይህ ድምፅህ ነውን?” አለ፤ በታላቅ ድምፅም አለቀሰ። ¹⁷ለዳዊትም እንዲህ አለው፤ “ከእኔ ይልቅ አንተ ጻድቅ ነህ፤ አንተ መልካም አደረግህልኝ፤ እኔ ግን ክፉ አደረግሁብህ። ¹⁸ዛሬም ያደረግህልኝን መልካም ገለጥህልኝ፤ አባታችን በእጅህ አሳልፎ ሰጥቶኝ ሳለ አልገደልኸኝም። ¹⁹ሰው ጠላቱን ቢያገኝ ሳይጐዳው በሰላም ይለቀዋልን? ዛሬ ስላደረግህልኝ አባታችን መልካም ይክፈልህ። ²⁰አሁንም በእርግጥ እንደምትነግሥ፣ የእስራኤልም መንግሥት በእጅህ እንደምትጸና ዐውቃለሁ። ²¹እንግዲህ ከእኔ በኋላ ዘሬን እንዳታጠፋ፣ ስሜንም ከአባቴ ቤት እንዳታጠፋ በአባታችን ማልልኝ።”

²²ዳዊትም ለሳኦል ማለለት። ሳኦልም ወደ ቤቱ ሄደ፤ ዳዊትና ሰዎቹም ወደ አምባው ወጡ።