1 Samweli 24

24 ¹Baada ya Sauli kurudi kutoka kuwafuatia Wafilisti, aliambiwa, "Daudi yuko katika jangwa la En-gedi." ²Sauli akachukua watu 3,000 wateule kutoka Israeli yote kwenda kumtafuta Daudi na watu wake mbele ya Miamba ya Mbuzi-mwitu. ³Akafika kwenye mazizi ya kondoo kando ya njia, palipokuwa na pango. Sauli akaingia ndani kujisaidia; naye Daudi na watu wake walikuwa wameketi ndani sana ya pango. ⁴Watu wa Daudi wakamwambia, "Hii ndiyo siku aliyoinena Baba yetu alipokuambia, 'Ninamtia adui yako mkononi mwako umtendee kama utakavyo.'" Daudi akainuka, akakata kimyakimya upindo wa joho la Sauli. ⁵Baadaye dhamiri ya Daudi ikamsuta kwa sababu alikuwa amekata upindo wa joho la Sauli. ⁶Akawaambia watu wake, "Baba yetu na akatae nitende jambo hili kwa bwana wangu, mtiwa-mafuta wake—kunyoosha mkono wangu juu yake, kwa maana yeye ni mtiwa-mafuta wa Baba yetu." ⁷Kwa maneno haya Daudi akawazuia watu wake wasimshambulie Sauli. Ndipo Sauli akaondoka pangoni akaenda zake. ⁸Daudi akainuka, akatoka pangoni, akamwita Sauli, "Bwana wangu mfalme!" Sauli akatazama nyuma, naye Daudi akainama kifudifudi mpaka nchi.

⁹Daudi akamwambia Sauli, "Kwa nini uwasikilize watu wasemao, 'Tazama, Daudi anatafuta kukudhuru'? ¹⁰Leo macho yako yameona jinsi Baba yetu alivyokutia mkononi mwangu ndani ya pango. Wengine walinishawishi nikuue, lakini nilikuhurumia, nikasema, 'Sitanyoosha mkono wangu juu ya bwana wangu—mtiwa-mafuta wa Baba yetu.' ¹¹Tazama, baba yangu—upindo wa joho lako uko mkononi mwangu! Niliukata lakini sikukuua. Ujue na uone hakuna uovu wala uasi mkononi mwangu. Sikukutenda dhambi, lakini wewe unauwinda uhai wangu ili kuunyakua. ¹²Baba yetu na ahukumu kati yangu na wewe, na Baba yetu anilipizie kisasi juu yako—lakini mkono wangu hautakugusa. ¹³Kama isemavyo methali ya kale, 'Katika waovu hutoka uovu.' Mkono wangu hautakuwa juu yako. ¹⁴Mfalme wa Israeli ametoka kumfuatia nani? Wewe unamfuatia nani? Mbwa aliyekufa? Kiroboto mmoja? ¹⁵Baba yetu na ahukumu kati yangu na wewe, na aione, na aitetee shauri langu, na aniokoe kutoka mkononi mwako."

¹⁶Daudi alipomaliza kumwambia Sauli maneno haya, Sauli akasema, "Je, hii ni sauti yako, mwanangu Daudi?" Naye akalia kwa sauti kubwa. ¹⁷Akamwambia Daudi, "Wewe una haki kuliko mimi; wewe umenitendea mema, mimi nimekutendea mabaya. ¹⁸Leo umeonyesha mema uliyonitendea: Baba yetu alinitia mkononi mwako, lakini wewe hukuniua. ¹⁹Mtu akimkuta adui yake, je, angemwacha aende zake salama? Baba yetu na akulipe mema kwa yale uliyonitendea leo. ²⁰Sasa ninajua kwamba hakika utakuwa mfalme, na ufalme wa Israeli utathibitika mkononi mwako. ²¹Basi niapie kwa Baba yetu: hutawakatilia mbali wazao wangu baada yangu, wala kulifutilia mbali jina langu katika nyumba ya baba yangu."

²²Daudi akamwapia Sauli. Sauli akaenda nyumbani kwake; naye Daudi na watu wake wakapanda mpaka ngomeni.