1 Samuel 24

24 ¹Saulna Philistinenaobingli kakharomwui eina latung tharan, "David En-gediwui lamhāngli lei" kaji Saulli hānghaowa. ²Saulna Israel saikorawui eina kapang kahai mi thing kathum khuilaga Sirao Lunghārwui mangāli David eina awui mibingli phākhavai vai. ³Ana shongfawui makānda lungkhur akha khalei yaoshangli vāshunghaowa. Saulna ngachir ngarang khavai chili kātong; kha David eina awui mibing lungkhur alungthungli pamsai. ⁴Davidwui mibingna hānga, "Hi chi ithumwui Avāna nali, 'Yanglu, ina nawui yangkashe chi nawui pāngli mira, nana ningkachāng thada ali sālu' da hānghaikasā atam chilina." Chieina Davidna ngakarthuida kasaikha Saulwui kachonwui achikun akha katattāmi. ⁵Chiwui thili Davidna Saulwui kachonwui achikun katattāhaiwui vang awui mashun-makhuina ali tandi mi. ⁶Ana awui mibingli hānga, "Ithumwui Avā mangāli, iwui akhavā, awui thao neomi kahaili hithāda sāda ali ipāng khangkā kaji ina masālakmara; kaja ana ithumwui Avāwui thao neomi kahaina." ⁷Hikatha tui eina Davidna awui mibingli Saulli attai kajiwui eina khāmkhui. Chieina Saulna lungkhurwui eina thuihailaga awui aramli vāhaowa. ⁸Davidna ngakarthuida lungkhurwui eina thuihailaga, Saulwui thili, "Iwui akhavā awunga," da vaowa. Saulna latunglaga yanga, kala Davidna amai ngaleili hoklaga kui mashunzanga.

⁹Davidna Saulli hānga, "'Yanglu, Davidna nali sākashi sākhavai phāda lei' da kahāng mibingwui tui khisāda nganākhala? ¹⁰Ithumwui Avāna nali lungkhurli iwui pāngli mihaira kaji aja namik eina theihaira. Kaikhana ili nali shaothat khavai poi, kha ina nali yangmi, kala hānga, 'Iwui akhavā, ithumwui Avāwui thao neomi kahaili ipāng makhangkāmara.' ¹¹Yanglu, ivā, nawui kachonwui achikun iwui pāngli lei! Ina chi katattāhaira kha nali mashaothatmana. Iwui pāngli makhayā lah salāng maleimana kaji theida yanglu. Ina nawuitungli morei masāmana, chithālala nana iwui mirin khuikhavai phāda lei. ¹²Ithumwui Avāna nawui eina iwui ngachaili bichar sāranu, kala ithumwui Avāna nawuitungli iwui vang athut hāngsangranu; kha iwui pāngna nali masingmara. ¹³Achālakhawui chānsam tuina hāng thada, 'Makhayābingwui eina makhayā rāra.' Kha iwui pāng nawuitungli maleimara. ¹⁴Israelwui awungana khipāli ngararkida khuishokkhala? Nana khipāli kakharom da leikhala? Thikahai fa akhali kharomda leila? Kachāknao akhali kharomda leila? ¹⁵Ithumwui Avāna nawui eina iwui ngachaili bichar sāda theiranu, kala iwui vang nganingmida, nawui pāng eina ili kharākankhuimiranu."

¹⁶Davidna hikatha tui Saulli hāngchithei kahaiwui thili, Saulna hānga, "Inaomayara David, hi nawui akhon maningmala?" da panglāk eina chapa. ¹⁷Ana Davidli hānga, "Na ili reimei khamashungna; nana ili kaphā sāhaira, kha ina nali sākashi sāhaira. ¹⁸Aja nana ili kaphā sākahai chi chithei: ithumwui Avāna ili nawui pāngli horsangmihaira, kha nana ili masāthatmana. ¹⁹Mi akhana awui yangkashe samphang tharan, ana ali sākaza̱ maleila yāmngasakrakhala? Aja nana iwui vang sākahai chiwui vang ithumwui Avāna nali kaphā athut khuinaoranu. ²⁰Nana kachangkhata awunga sāra, kala Israelwui wungram nawui pāngli reisangra kaji ara ina thei. ²¹Chiwui vang eina ithumwui Avāwui ming singda ili khangashit sālu: nana iwui thili iwui ara̱-azāli makatathaialu, kala ishāvāwui shimkhurwui eina iwui ming mashimithaialu."

²²Davidna Saulli khangashit sai. Saulna awui pamli latunghaowa; kha Davidla awui mibingla raipanli kāhaowa.