1 Samuẹli 24

24 ¹Lẹ́yìn tí Saulu padà dé láti inú lílé àwọn ará Filistini, wọ́n sọ fún un pé, “Dafidi wà ní aginjù Eni-Gedi.” ²Saulu sì mú ẹgbẹ̀rún mẹ́ta (3,000) ọkùnrin àṣàyàn láti gbogbo Israẹli láti wá Dafidi àti àwọn ọkùnrin rẹ̀ níwájú Àpáta Àwọn Ewúrẹ́ Igbó. ³Ó sì dé ibi àgọ́ àwọn àgùntàn tí ó wà létí ọ̀nà, níbi tí ihò àpáta kan wà. Saulu sì wọ inú rẹ̀ lọ láti bo ẹsẹ̀ rẹ̀; Dafidi àti àwọn ọkùnrin rẹ̀ sì jókòó jìnnà sínú ihò àpáta náà. ⁴Àwọn ọkùnrin Dafidi sì wí fún un pé, “Èyí ni ọjọ́ tí Baba wa ń sọ nígbà tí ó wí fún ọ pé, ‘Wò ó, èmi yóò fi ọ̀tá rẹ lé ọ lọ́wọ́, kí ìwọ kí ó ṣe sí i bí ó ti wù ọ́.’” Dafidi sì dìde, ó sì gé etí aṣọ ìgúnwà Saulu ní jẹ́ẹ́jẹ́. ⁵Lẹ́yìn náà, ẹ̀rí-ọkàn Dafidi sì dá a lẹ́bi nítorí tí ó gé etí aṣọ ìgúnwà Saulu. ⁶Ó sì wí fún àwọn ọkùnrin rẹ̀ pé, “Kí Baba wa má jẹ́ kí n ṣe nǹkan yìí sí olúwa mi, ẹni àmì òróró rẹ̀—kí n sì nawọ́ sí i, nítorí ẹni àmì òróró Baba wa ni.” ⁷Pẹ̀lú àwọn ọ̀rọ̀ wọ̀nyí, Dafidi fi dá àwọn ọkùnrin rẹ̀ dúró kúrò nínú kíkọlu Saulu. Nígbà náà ni Saulu sì jáde kúrò nínú ihò àpáta náà, ó sì bá ọ̀nà rẹ̀ lọ. ⁸Dafidi sì dìde, ó jáde kúrò nínú ihò àpáta náà, ó sì kígbe tẹ̀lé Saulu pé, “Olúwa mi ọba!” Saulu sì wo ẹ̀yìn, Dafidi sì tẹrí ba, ó dojú rẹ̀ bọ ilẹ̀.

⁹Dafidi sì wí fún Saulu pé, “Èéṣe tí ìwọ fi ń fetí sí ọ̀rọ̀ àwọn ènìyàn tí wọ́n wí pé, ‘Wò ó, Dafidi ń wá ọ̀nà láti pa ọ́ lára’? ¹⁰Lónìí, ojú rẹ ti rí bí Baba wa ti fi ọ́ lé mi lọ́wọ́ nínú ihò àpáta náà. Àwọn kan rọ̀ mí láti pa ọ́, ṣùgbọ́n mo dá ọ sí, mo sì wí pé, ‘Èmi kì yóò nawọ́ sí olúwa mi—ẹni àmì òróró Baba wa.’ ¹¹Wò ó, baba mi—etí aṣọ ìgúnwà rẹ wà ní ọwọ́ mi! Mo gé e ṣùgbọ́n èmi kò pa ọ́. Mọ̀ kí o sì rí i pé kò sí ibi tàbí ọ̀tẹ̀ kankan ní ọwọ́ mi. Èmi kò ṣẹ̀ ọ́, síbẹ̀ ìwọ ń dọdẹ ẹ̀mí mi láti gbà á. ¹²Kí Baba wa ṣe ìdájọ́ láàrin èmi àti ìwọ, kí Baba wa sì gbẹ̀san mi lára rẹ—ṣùgbọ́n ọwọ́ mi kì yóò fọwọ́ kàn ọ́. ¹³Gẹ́gẹ́ bí òwe àtijọ́ ti wí pé, ‘Láti ọ̀dọ̀ ènìyàn búburú ni ìwà búburú ti ń jáde wá.’ Ọwọ́ mi kì yóò sí lòdì sí ọ. ¹⁴Ta ni ọba Israẹli jáde wá lòdì sí? Ta ni ìwọ ń lé? Ajá òkú? Eegbọn kan ṣoṣo? ¹⁵Kí Baba wa ṣe ìdájọ́ láàrin èmi àti ìwọ, kí ó sì rí i, kí ó jà fún ẹjọ́ mi, kí ó sì gbà mí sílẹ̀ kúrò ní ọwọ́ rẹ.”

¹⁶Nígbà tí Dafidi parí sísọ àwọn ọ̀rọ̀ wọ̀nyí fún Saulu, Saulu sì wí pé, “Ohùn rẹ ni èyí, Dafidi ọmọ mi?” ó sì sọkún rara. ¹⁷Ó sì wí fún Dafidi pé, “Ìwọ ṣe olódodo ju èmi lọ; ìwọ ṣe rere sí mi, èmi sì ṣe búburú sí ọ. ¹⁸Lónìí ni ìwọ fi hàn rere tí ìwọ ṣe sí mi: Baba wa fi mí lé ọ lọ́wọ́, síbẹ̀ ìwọ kò pa mí. ¹⁹Bí ènìyàn bá rí ọ̀tá rẹ̀, yóò ha jẹ́ kí ó lọ láìléwu bí? Kí Baba wa san rere fún ọ nítorí ohun tí ìwọ ṣe fún mi lónìí. ²⁰Ní báyìí, mo mọ̀ pé dájúdájú ìwọ yóò jẹ ọba, ìjọba Israẹli yóò sì fìdí múlẹ̀ ṣinṣin ní ọwọ́ rẹ. ²¹Nítorí náà, búra fún mi ní orúkọ Baba wa pé: ìwọ kì yóò ké àwọn irú-ọmọ mi kúrò lẹ́yìn mi, bẹ́ẹ̀ ni ìwọ kì yóò pa orúkọ mi rẹ́ kúrò ní ilé baba mi.”

²²Dafidi sì búra fún Saulu. Saulu sì lọ ilé; Dafidi àti àwọn ọkùnrin rẹ̀ sì gòkè lọ sí ibi odi alágbára náà.