1 ሳሙኤል 22

22 ¹ዳዊትም ከዚያ ተነሥቶ ወደ ዓዶላም ዋሻ አመለጠ፤ ወንድሞቹና የአባቱ ቤተ ሰብ ሁሉ ይህን ሰምተው ወደ እርሱ ወደዚያ ወረዱ። ²በመከራ ውስጥ የነበረ፣ ዕዳ ያለበት ወይም መንፈሱ የመረረ ሁሉ ወደ እርሱ ተሰበሰበ፤ እርሱም አለቃቸው ሆነ፤ ወደ አራት መቶ የሚሆኑ ሰዎችም ነበሩ። ³ዳዊትም ከዚያ ወደ ሞዓብ ምጽጳ ሄዶ ንጉሡን፣ “አባታችን ለእኔ የሚያደርገውን እስካውቅ ድረስ፣ እባክህ አባቴና እናቴ መጥተው ከአንተ ጋራ ይቈዩ” አለው። ⁴ከሞዓብ ንጉሥም ዘንድ ተዋቸው፤ ዳዊት በምሽጉ ውስጥ ሳለ ከእርሱ ጋራ ተቀመጡ። ⁵ነቢዩ ጋድም ዳዊትን፣ “በምሽጉ ውስጥ አትቈይ፤ ተነሥተህ ወደ ይሁዳ ምድር ግባ” አለው። ዳዊትም ተነሥቶ ወደ ሔሬት ዱር ሄደ።

ሳኦል የአባታችንን ካህናት ጨፈጨፈ

⁶ሳኦልም ዳዊትና ሰዎቹ መገኘታቸውን ሰማ። እርሱም በኮረብታው ላይ ባለው ቁልቋል ዛፍ ሥር በጊብዓ ተቀምጦ ነበር፤ ጦሩም በእጁ ነበር፤ ሎሌዎቹም ሁሉ በዙሪያው ቆመው ነበሩ። ⁷ሳኦልም በአጠገቡ ለቆሙት ሎሌዎቹ እንዲህ አለ፤ “እናንተ ብንያማውያን ሆይ፤ ስሙ! የእሴይ ልጅ ለሁላችሁ እርሻና የወይን አትክልት ይሰጣችኋልን? ሁላችሁን የሺህ አለቆችና የመቶ አለቆች ያደርጋችኋልን? ⁸ሁላችሁ በእኔ ላይ ያሴራችሁብኝ ለዚህ ነውን? ልጄ ከእሴይ ልጅ ጋራ ኪዳን መግባቱን የሚነግረኝ የለም። ከእናንተም የሚራራልኝ፣ ዛሬ እንደሚያደርገው ልጄ ሎሌዬን በእኔ ላይ አስነሥቶ እንዲያደባኝ መቀስቀሱን የሚነግረኝ የለም።”

⁹ከሳኦል ሎሌዎች ጋራ የነበረው ኤዶማዊው ዶይቅም፣ “የእሴይን ልጅ ወደ ኖብ፣ ወደ አኪጦብ ልጅ ወደ አኪሜሌክ ሲመጣ አየሁ። ¹⁰አኪሜሌክም ስለ እርሱ እግዚአብሔርን ጠየቀ፤ ስንቅንና የፍልስጥኤማዊውን የጎልያድን ሰይፍ ሰጠው።”

¹¹ንጉሡም ካህኑን የአኪጦብን ልጅ አኪሜሌክን፣ የአባቱንም ቤተ ሰብ ሁሉ፣ በኖብ የነበሩትን ካህናት አስጠራ፤ ሁሉም ወደ ንጉሡ መጡ። ¹²ሳኦልም፣ “የአኪጦብ ልጅ ሆይ፤ አሁን ስማ” አለ። እርሱም፣ “ጌታዬ ሆይ፤ እነሆኝ” ብሎ መለሰ።

¹³ሳኦልም፣ “አንተና የእሴይ ልጅ ለምን በእኔ ላይ አሴራችሁብኝ? እንጀራና ሰይፍ ሰጠኸው፤ ስለ እርሱም እግዚአብሔርን ጠየቅህ፤ ስለዚህም ዛሬ እንደሚያደርገው በእኔ ላይ ተነሥቶ አደባኝ” አለው።

¹⁴አኪሜሌክም ንጉሡን መልሶ እንዲህ አለ፤ “ከሎሌዎችህ ሁሉ መካከል እንደ ዳዊት ታማኝ ማን አለ? እርሱ የንጉሡ አማች፣ የዘቦችህ አለቃ፣ በቤትህም የከበረ ነው። ¹⁵ስለ እርሱ አባታችንን መጠየቅ የጀመርሁት ዛሬ ነውን? ይህ ከእኔ ይራቅ! ንጉሡ በሎሌው ላይ፣ በአባቴም ቤተ ሰብ ሁሉ ላይ ምንም አይጫን፤ ሎሌህ ከዚህ ሁሉ ስለ ትንሹም ስለ ትልቁም ምንም አያውቅምና።”

¹⁶ንጉሡ ግን፣ “አኪሜሌክ ሆይ፤ አንተና የአባትህ ቤተ ሰብ ሁሉ በእርግጥ ትሞታላችሁ” አለ። ¹⁷ንጉሡም በአጠገቡ ለቆሙት ዘቦች፣ “ዘወር ብላችሁ የአባታችንን ካህናት ግደሉ፤ እጃቸው ደግሞ ከዳዊት ጋራ ነውና፤ መሸሹንም እያወቁ አልነገሩኝም” አለ። የንጉሡ ሎሌዎች ግን በአባታችን ካህናት ላይ እጃቸውን ለማንሣት አልወደዱም።

¹⁸ንጉሡም ዶይቅን፣ “አንተ ዘወር ብለህ ካህናቱን ምታ” አለው። ኤዶማዊው ዶይቅም ዘወር ብሎ ካህናቱን መታ፤ በዚያም ቀን የተልባ እግር ኤፉድ የለበሱ ሰማንያ አምስት ሰዎችን ገደለ።

¹⁹የካህናቱንም ከተማ ኖብን በሰይፍ መታ፤ ወንዶችንና ሴቶችን፣ ልጆችንና ሕፃናትን፣ በሬዎችንና አህዮችን፣ በጎችንም ሁሉ በሰይፍ ፈጀ። ²⁰ነገር ግን አብያታር የሚባል የአኪጦብ ልጅ የአኪሜሌክ አንድ ልጅ አምልጦ ወደ ዳዊት ሸሸ። ²¹አብያታርም ሳኦል የአባታችንን ካህናት መግደሉን ለዳዊት ነገረው።

²²ዳዊትም አብያታርን እንዲህ አለው፤ “ኤዶማዊው ዶይቅ በዚያ በነበረበት ቀን፣ በእርግጥ ለሳኦል እንደሚነግር ዐውቄ ነበር። በአባትህ ቤት የነበሩትን ሁሉ ለሞት ዳረግኋቸው። ²³ከእኔ ጋራ ተቀመጥ፤ አትፍራ፤ ነፍሴን የሚሻ ነፍስህን ይሻልና። ከእኔ ጋራ ሆነህ ትጠበቃለህ።”