David al kache nan gwòt la

Tout moun ki gen dèt, ki nan pwoblèm oswa ki gen kè anmè vin jwenn David nan yon gwòt, katsan gason. Sayil, ki chita anba yon pye tamaren ap rimen rankin li, fè Doèg touye katreven-senk prèt Papa nou ak tout lavil Nòb. Yon sèl pitit gason chape, epi David di se li ki lakòz lanmò yo.

Chapit 22.

David kite kote sa a, li sove al nan gwòt Adoulam lan. Lè frè l yo ak tout fanmi papa l yo tande sa, yo desann al jwenn li la. Tout moun ki te nan tray, tout moun ki te gen dèt, tout moun ki te gen kè amè sanble vin jwenn li. Li tounen chèf yo. Te gen katsan (400) gason konsa. David kite kote sa a, l al nan lavil Mispe nan peyi Moab. Li di wa Moab la: “Tanpri, kite papa m ak manman m vin rete avèk ou jouk mwen konnen sa Papa nou pral fè pou mwen.” Li kite yo lakay wa Moab la. Yo rete avèk li pandan tout tan David te nan fò a. Gad, pwofèt la, di David: “Pa rete nan fò a. Leve, al nan peyi Jida.” Se konsa David leve, l al nan rakbwa Erèt la.

Sayil touye prèt Papa nou yo

Sayil vin konnen yo te jwenn David ak moun li yo. Lè sa a, Sayil te chita anba pye tonmaren an, sou tèt mòn lan nan Gibeya, li te gen frenn li nan men l, tout moun k'ap sèvi l yo te kanpe bò kote l. Sayil di moun k'ap sèvi l ki te bò kote l yo: “Koute non, nou menm moun branch Benjamen! Èske pitit gason Jese a pral ban nou tout jaden ak tout jaden rezen? Èske l pral mete nou tout chèf sou mil moun ak chèf sou san moun, kifè nou tout fè konplo kont mwen? Pa gen pyès moun ki di m pitit gason m lan te pase yon kontra ak pitit Jese a. Pa gen yonn nan nou ki gen pitye pou mwen, ki di m pitit gason m lan moute sèvitè m lan kont mwen pou l pare pyèj pou mwen, jan l'ap fè l jòdi a.”

Doèg, moun peyi Edon an, ki te kanpe ansanm ak moun k'ap sèvi Sayil yo, di: “Mwen te wè pitit Jese a vini lavil Nòb, kay Akimelèk, pitit gason Akitoub la. Akimelèk te mande Senyè a sa pou li, li te ba li pwovizyon ak nepe Golyat, moun Filisti a.”

Wa a voye chache Akimelèk, prèt la, pitit gason Akitoub la, ansanm ak tout fanmi papa l yo, prèt ki te lavil Nòb yo. Yo tout vin jwenn wa a. Sayil di: “Koute non, pitit Akitoub.” Li reponn: “Men mwen, mèt mwen.”

Sayil mande l: “Poukisa ou menm ak pitit Jese a nou fè konplo kont mwen? Ou ba li pen ak yon nepe, ou mande Bondye sa pou li, pou l ka leve kont mwen, pou l pare pyèj, jan l'ap fè l jòdi a.”

Akimelèk reponn wa a: “Nan tout moun k'ap sèvi ou yo, kilès ki fidèl tankou David, bofis wa a, chèf gad ou yo, yon moun yo respekte lakay ou? Èske se jòdi a mwen konmanse mande Papa nou sa pou li? Mwen menm, mwen pa ta janm fè sa! Se pou wa a pa mete anyen sou do sèvitè li a, ni sou tout fanmi papa m yo, paske sèvitè ou a pa t konnen anyen nan tout bagay sa a, ni gwo ni piti.”

Men, wa a di: “Akimelèk, se mouri w'ap mouri, ou menm ak tout fanmi papa ou yo.” Wa a di gad ki te kanpe bò kote l yo: “Vire, al touye prèt Papa nou yo, paske men yo tou avèk David. Yo te konnen li t'ap kouri sove, men yo pa t di m sa.” Men, moun k'ap sèvi wa a yo pa t vle leve men yo pou touye prèt Papa nou yo.

Wa a di Doèg: “Ou menm, vire, al touye prèt yo.” Doèg, moun peyi Edon an, vire, l al touye yo. Jou sa a, li touye katreven senk (85) gason ki te gen efòd twal fen blan sou yo.

Li touye tout moun lavil Nòb, lavil prèt yo, ak kout nepe: gason, fanm, timoun, tibebe, bèf, bourik, mouton, li touye yo tout ak kout nepe. Men, yonn nan pitit gason Akimelèk yo, pitit gason Akitoub la, ki te rele Abyata, resi chape, l al kouri jwenn David. Abyata rakonte David ki jan Sayil te touye prèt Papa nou yo.

David di Abyata: “Jou sa a, mwen te konnen Doèg, moun peyi Edon an, te la. Mwen te konnen li t'ap al di Sayil sa. Se mwen menm ki lakòz tout moun nan fanmi papa ou yo mouri. Rete avèk mwen. Pa pè. Moun k'ap chèche touye m lan, l'ap chèche touye ou tou. Si ou avèk mwen, ou an sekirite.”