1 Samweli 22

22 ¹Daudi akaondoka huko, akakimbilia katika pango la Adulamu; ndugu zake na jamaa yote ya baba yake waliposikia, wakashuka kwake huko. ²Kila mtu aliyekuwa taabuni, au mwenye deni, au mwenye uchungu wa nafsi, akakusanyika kwake; naye akawa jemadari wao—wapata watu 400. ³Kutoka huko Daudi akaenda Mispa ya Moabu, akamwambia mfalme wake, "Tafadhali baba yangu na mama yangu waje wakae pamoja nawe, hata nitakapojua Baba yetu atakalonitendea." ⁴Akawaacha mbele ya mfalme wa Moabu; nao wakakaa naye muda wote Daudi alipokuwa ngomeni. ⁵Gadi nabii akamwambia Daudi, "Usikae ngomeni; ondoka, uende katika nchi ya Yuda." Basi Daudi akaondoka, akaenda katika msitu wa Herethi.

Sauli Awaua Makuhani wa Baba

⁶Sauli akasikia kwamba Daudi na watu wake wameonekana. Naye alikuwa ameketi Gibea chini ya mkwaju juu ya kilima, mkuki wake mkononi, na watumishi wake wote wamesimama pande zote zake. ⁷Sauli akawaambia watumishi wake waliosimama karibu naye, "Sikilizeni sasa, enyi Wabenyamini! Je, mwana wa Yese atawapa ninyi nyote mashamba na mashamba ya mizabibu? Je, atawafanya ninyi nyote majemadari wa maelfu na majemadari wa mamia, ⁸hata mmenifanyia hila ninyi nyote? Wala hakuna hata mmoja aniambiaye kwamba mwanangu amefanya agano na mwana wa Yese. Wala hakuna hata mmoja miongoni mwenu anayenihurumia au kuniambia kwamba mwanangu amemwinua mtumishi wangu juu yangu ili kuniotea, kama afanyavyo leo hii."

⁹Ndipo Doegi Mwedomi, aliyesimama pamoja na watumishi wa Sauli, akajibu, "Nilimwona mwana wa Yese akija Nobu, kwa Ahimeleki mwana wa Ahitubu. ¹⁰Naye Ahimeleki akamwuliza BWANA kwa ajili yake, akampa masurufu na upanga wa Goliathi Mfilisti."

¹¹Basi mfalme akatuma watu wamwite Ahimeleki kuhani mwana wa Ahitubu, na jamaa yote ya baba yake, makuhani waliokuwa Nobu; nao wote wakaja kwa mfalme. ¹²Sauli akasema, "Sikiliza sasa, mwana wa Ahitubu." Naye akajibu, "Mimi hapa, bwana wangu."

¹³Sauli akamwuliza, "Kwa nini ninyi na mwana wa Yese mmefanya hila juu yangu, hata ukampa mkate na upanga, na kumwuliza Mungu kwa ajili yake, ili ainuke juu yangu na kuniotea, kama afanyavyo leo hii?"

¹⁴Ahimeleki akamjibu mfalme, "Ni nani miongoni mwa watumishi wako wote aliye mwaminifu kama Daudi, mkwe wa mfalme, jemadari wa walinzi wako, na mwenye heshima nyumbani mwako? ¹⁵Je, leo ndipo nilipoanza kumwuliza Baba yetu kwa ajili yake? Hasha! Mfalme asimtwike mtumishi wake neno lolote, wala jamaa yote ya baba yangu; kwa maana mtumishi wako hakujua neno lolote la haya yote, dogo wala kubwa."

¹⁶Lakini mfalme akasema, "Hakika utakufa, Ahimeleki, wewe na jamaa yote ya baba yako." ¹⁷Mfalme akawaambia walinzi waliosimama karibu naye, "Geukeni, mkawaue makuhani wa Baba yetu; kwa sababu mkono wao nao u pamoja na Daudi, nao walijua kwamba anakimbia, wala hawakuniambia." Lakini watumishi wa mfalme hawakukubali kunyoosha mkono wao kuwapiga makuhani wa Baba yetu.

¹⁸Ndipo mfalme akamwambia Doegi, "Geuka wewe, uwapige makuhani." Naye Doegi Mwedomi akageuka, akawapiga makuhani; akaua siku ile watu themanini na watano waliovaa naivera ya kitani.

¹⁹Naye akaupiga Nobu, mji wa makuhani, kwa makali ya upanga—wanaume, wanawake, watoto, na wanyonyao, na ng'ombe, na punda, na kondoo—yote kwa makali ya upanga. ²⁰Lakini mmoja wa wana wa Ahimeleki mwana wa Ahitubu, jina lake Abiathari, akaokoka, akamkimbilia Daudi. ²¹Abiathari akamwambia Daudi kwamba Sauli amewaua makuhani wa Baba yetu.

²²Daudi akamwambia Abiathari, "Nalijua siku ile Doegi Mwedomi alipokuwako huko, kwamba hakika angemwambia Sauli. Mimi ndiye niliyesababisha kifo cha kila mtu wa nyumba ya baba yako. ²³Kaa pamoja nami; usiogope; kwa maana yeye anayeitafuta roho yangu ndiye anayeitafuta roho yako. Pamoja nami utakuwa salama."