ዳዊት ኣብ በዓቲ ተዓቝበ

ኣብ ዕዳ፥ ኣብ ፀበባ ወይ ኣብ መረረ ዝነበረ ዅሉ ኣብ በዓቲ ናብ ዳዊት ተኣከበ፥ ኣርባዕተ ሚእቲ ሰብኣይ። ሳኦል ኣብ ትሕቲ ተምሪ ኾፍ ኢሉ ቅርሕንቱ እናዓቀበ፥ ንዶይቅ ነቶም ሰማንያን ሓሙሽተን ካህናት ኣቦናን ንብዘላ ኸተማ ኖብን ከጥፍኦም ገበረ። ሓደ ወዲ ኣምለጠ፥ ዳዊት ድማ ንሞቶም ኣነ ኣምፂአዮ በለ።

ምዕራፍ 22።

ዳዊት ካብኡ ወፂኡ ናብ በዓቲ ዓዱላም ኣምለጠ፤ ኣሕዋቱን ብዘሎ ስድራ ቤት ኣቦኡን ድማ ሰሚዖም ናብኡ ወረዱ። ኣብ ፀበባ ዘሎ ዅሉ፥ ዕዳ ዘለዎ ዅሉ፥ ወይ ብመንፈሱ ዝመረረ ዅሉ ናብኡ ተኣከቡ፤ ንሱ ኸዓ ሓለቓኦም ኮነ፤ ኣስታት ኣርባዕተ ሚእቲ ሰብኣይ ድማ ነበሩ። ዳዊት ካብኡ ናብ ምፅጳ ሞኣብ ከደ፤ ንንጉሳ ኸዓ “በይዛኻ፥ እቲ ኣቦና ንኣይ ዝገብረለይ ክሳዕ ዝፈልጥ፥ ኣቦይን ኣደይን መፂኦም ምሳኻ ይቀመጡ” በሎ። ኣብ ቅድሚ ንጉስ ሞኣብ ከዓ ገደፎም፤ ዳዊት ኣብ ዕርዲ እንተሎ ድማ፥ ኵሉ እቲ ዘመን ምስኡ ተቐመጡ። ጋድ እቲ ነቢይ ድማ ንዳዊት “ኣብ ዕርዲ ኣይትቀመጥ፤ ተልዒልካ ናብ ምድሪ ይሁዳ ኺድ” በሎ። ሽዑ ዳዊት ተሲኡ ናብ ዱር ሔሬት ከደ።

ሳኦል ንካህናት ኣቦና ቐተሎም

ሳኦል ድማ ዳዊትን ሰባቱን ከም ዝተረኽቡ ሰምዐ። ኣብ ጊብዓ ኣብ ትሕቲ እታ ኣብ በሪኽ ዘላ ተምሪ፥ ዂናት ኣብ ኢዱ ሒዙ ተቐሚጡ ነበረ፤ ኵሎም ኣገልገልቱ ኸዓ ኣብ ዙርያኡ ደው ኢሎም ነበሩ። ሳኦል ድማ ነቶም ኣብ ጥቓኡ ደው ኢሎም ዝነበሩ ኣገልገልቱ ከምዙይ በሎም፦ “ኣቱም ደቂ ብንያም፥ ስምዑ! ወዲ እሴይ ንዅልኹም ገራሁን ኣታኽልቲ ወይንን ክህበኩም ድዩ? ንዅልኹምከ ኣሕሉቕ ሽሕን ኣሕሉቕ ሚእትን ክገብረኩም ድዩ፥ ኵልኹም ኣብ ልዕለይ ክትሽጠሩ? ወደይ ምስ ወዲ እሴይ ኪዳን ከም ዝኣተወ ዝነግረኒ የለን። ካባኻትኩም ሓደ እኳ ዝድንግፀለይ የለን፤ ወደይ ንሓሽከረይ ኣብ ልዕለይ ኣተሲኡ፥ ከምቲ ሎሚ ዝገብሮ ዘሎ፥ ምእንቲ ክፀናትወኒ ዝነግረኒ ድማ የለን።”

ዶይቅ እቲ ኤዶማዊ ኸዓ፥ ኣብ ጥቓ ኣገልገልቲ ሳኦል ደው ኢሉ ዝነበረ፥ ከምዙይ በለ፦ “ወዲ እሴይ ናብ ኖብ፥ ናብ ኣቢሜሌክ ወዲ ኣኪጡብ ክመፅእ ርእየዮ። ኣቢሜሌክ ድማ ንእኡ ኢሉ ንእግዚኣብሄር ጠየቐ፤ ስንቂ ኸዓ ሃቦ፤ ሰይፊ ጐልያድ እቲ ፍልስጥኤማዊ ድማ ሃቦ።”

እቲ ንጉስ ድማ ንካህን ኣቢሜሌክ ወዲ ኣኪጡብ፥ ንብዘሎ ስድራ ቤት ኣቦኡ፥ ነቶም ኣብ ኖብ ዝነበሩ ካህናትን ፀውዖም፤ ኵላቶም ድማ ናብቲ ንጉስ መፁ። ሳኦል ከዓ “ኣታ ወዲ ኣኪጡብ፥ ሕዚ ስማዕ” በሎ። ንሱ ድማ “እኒሆ ኣለኹ፥ ጐይታይ” ኢሉ መለሰሉ።

ሳኦል ከዓ “ንስኻን ወዲ እሴይን ስለ ምንታይ ኣብ ልዕለይ ተመሓሓልኩም? እንጀራን ሰይፍን ሃብካዮ፤ ንእግዚኣብሄር ከዓ ኢልካ ጠየቕካሉ፤ ስለዙይ ከምቲ ሎሚ ዝገብሮ ዘሎ፥ ኣብ ልዕለይ ክትንስእን ክፀናትወንን እዩ” በሎ።

ኣቢሜሌክ ድማ ንንጉስ ከምዙይ ኢሉ መለሰሉ፦ “ካብ ኵሎም ኣገልገልትኻ ኸም ዳዊት እሙን መን ኣሎ? ንሱ ሰብ ጓል ንጉስ፥ ሓለቓ ዘብዐኛታት ናትካ፥ ኣብ ቤትካ ድማ ዝኸበረ እዩ። ሎሚ ንእኡ ኢለ ንኣቦና ክጥይቕ ጀሚረ ድየ? እዙይስ ካባይ የርሕቆ! ንጉስ ኣብ ልዕሊ ሓሽከሩን ኣብ ልዕሊ ብዘሎ ስድራ ቤት ኣቦይን ገለ ነገር ኣይፅዓን፤ ሓሽከርካ ኻብ እዙይ ኵሉ ንእሽተይ ኮነ ዓብዪ ነገር ሓደ እኳ ኣይፈልጥን ነበረ እሞ።”

እቲ ንጉስ ግና “ኣታ ኣቢሜሌክ፥ ንስኻ ምስ ኵሉ ስድራ ቤት ኣቦኻ ሞት ክትመውት ኢኻ” በለ። እቲ ንጉስ ድማ ነቶም ኣብ ጥቓኡ ደው ኢሎም ዝነበሩ ዘብዐኛታት “ግልፅ ኢልኩም ንካህናት ኣቦና ቕተልዎም፤ ኢዶም ከዓ ምስ ዳዊት እዩ ዘሎ፤ ከም ዝሃደመ እናፈለጡ ኣይነገሩንን እዮም” በሎም። ኣገልገልቲ ንጉስ ግና ኣብ ልዕሊ ካህናት ኣቦና ኢዶም ከልዕሉ ኣይፈተዉን።

እቲ ንጉስ ድማ ንዶይቅ “ንስኻ ግልፅ ኢልካ ንካህናት ውግኣዮም” በሎ። ዶይቅ እቲ ኤዶማዊ ኸዓ ግልፅ ኢሉ ንእኣቶም ወግኦም፤ በታ መዓልቲ እቲኣ ድማ ናይ ፍታል ኤፉድ ዝለበሱ ሰማንያን ሓሙሽተን ሰባት ቀተለ።

ንኖብ እታ ኸተማ ካህናት ድማ ብሰይፊ ወግኦ፤ ሰብኡትን ኣንስትን ቆልዑን ህፃናትን ኣብዑርን ኣእዱግን ኣባጊዕን ድማ ብዘሎ ብስሕለት ሰይፊ ቀተለ። ካብ ደቂ ኣቢሜሌክ ወዲ ኣኪጡብ ግና ኣብያታር ዝስሙ ሓደ ወዲ ኣምለጠ፤ ናብ ዳዊት ድማ ሃደመ። ኣብያታር ከዓ ሳኦል ንካህናት ኣቦና ኸም ዝቐተሎም ንዳዊት ነገሮ።

ዳዊት ድማ ንኣብያታር ከምዙይ በሎ፦ “በታ መዓልቲ እቲኣ ዶይቅ እቲ ኤዶማዊ ኣብኡ ስለ ዝነበረ፥ ንሳኦል ከም ዝነግሮ ፈሊጠ ነይረ። ኣነ ንዅሉ ሰብ ቤት ኣቦኻ ንሞት ኣሕሊፈ ዝሃብክዎም እየ። ምሳይ ተቐመጥ፤ ኣይትፍራሕ፤ ንህይወተይ ዝደሊ ንህይወትካውን ይደሊ እዩ እሞ። ምሳይ ብደሓን ኢኻ።”