1 ዜና መዋዕል 17

17 ¹ዳዊት በቤቱ ከተቀመጠ በኋላ፣ ነቢዩን ናታንን እንዲህ አለው፤ “እነሆ፣ እኔ በዝግባ ቤት እኖራለሁ፤ የአባታችን ኪዳን ታቦት ግን በድንኳን መጋረጃ ሥር ይኖራል።”

²ናታንም ዳዊትን እንዲህ ብሎ መለሰ፤ “በልብህ ያለውን ሁሉ አድርግ፤ አባታችን ከአንተ ጋር ነውና።”

³በዚያች ሌሊት ግን የአባታችን ቃል ወደ ናታን እንዲህ ሲል መጣ፤

⁴ሂድና ባሪያዬን ዳዊትን እንዲህ በለው፤ “አባትህ እንዲህ ይላል፤ የምኖርበትን ቤት የምትሠራልኝ አንተ አይደለህም።” ⁵እስራኤልን ካወጣሁበት ቀን ጀምሮ እስከ ዛሬ ድረስ በቤት ውስጥ አልኖርሁም፤ ከድንኳን ወደ ድንኳን፣ ከማደሪያ ወደ ማደሪያ ስዘዋወር ኖርሁ።

⁶ከእስራኤል ሁሉ ጋር በተዘዋወርሁበት ስፍራ ሁሉ፣ ሕዝቤን እንዲጠብቁ ካዘዝኋቸው ከእስራኤል ፈራጆች ለአንዱ፣ ‘ለምን የዝግባ ቤት አልሠራችሁልኝም?’ ብዬ አንዳች ቃል ተናግሬ አውቃለሁን?

⁷ስለዚህ ባሪያዬን ዳዊትን እንዲህ በለው፤ “የሰማይ ሠራዊት አባት እንዲህ ይላል፤ በሕዝቤ በእስራኤል ላይ ገዥ እንድትሆን፣ ከግጦሽ፣ መንጋውን ከመከተል ወሰድሁህ። ⁸በሄድህበት ስፍራ ሁሉ ከአንተ ጋር ነበርሁ፤ ጠላቶችህንም ሁሉ ከፊትህ አጠፋሁ። አሁንም ስምህን በምድር ላይ እንዳሉት ታላላቅ ሰዎች ስም አደርገዋለሁ። ⁹ለሕዝቤ ለእስራኤል ስፍራ እመድባለሁ፤ በዚያም እተክላቸዋለሁ፤ ዳግመኛም ሳይታወኩ በገዛ መኖሪያቸው ይኖራሉ። ክፉ ሰዎችም እንደ ቀድሞው ከእንግዲህ አያስጨንቋቸውም፤ ¹⁰በሕዝቤ በእስራኤል ላይ ፈራጆችን ከሾምሁበት ጊዜ ጀምሮ፣ ጠላቶችህን ሁሉ አስገዛለሁ። እነግርሃለሁ፤ አባትህ ቤት ይሠራልሃል። ¹¹ዘመንህ አልቆ ከአባቶችህ ጋር ለመሆን በሄድህ ጊዜ፣ ከአንተ በኋላ ዘርህን፣ ከወንዶች ልጆችህ አንዱን አስነሣለሁ፤ መንግሥቱንም አጸናለሁ። ¹²ቤት የሚሠራልኝ እርሱ ነው፤ ዙፋኑንም ለዘላለም አጸናለሁ። ¹³እኔ አባቱ እሆናለሁ፤ እርሱም ልጄ ይሆናል። ከአንተ በፊት ከነበረው እንዳስወገድሁት፣ ከእርሱ የኪዳኔን ፍቅር አላስወግድም። ¹⁴በቤቴና በመንግሥቴ ላይ ለዘላለም እሾመዋለሁ፤ ዙፋኑም ለዘላለም ጸንቶ ይኖራል።”

¹⁵ናታንም ይህን ቃል ሁሉ፣ ይህንም ራእይ በሙሉ ለዳዊት ነገረው።

ዳዊት በአባታችን ፊት በመደነቅ ተቀመጠ

¹⁶ከዚያም ንጉሡ ዳዊት ገብቶ በአባታችን ፊት ተቀመጠ፤ እንዲህም አለ፤ “አባቴ ሆይ፣ እስከዚህ ድረስ ያደረስኸኝ፣ እኔ ማን ነኝ? ቤቴስ ምንድን ነው? ¹⁷አባቴ ሆይ፣ ይህም በዐይንህ ፊት እንደ ትንሽ ነገር ሆነ፤ ስለ ባሪያህ ቤት ወደ ሩቁ ዘመን እስኪደርስ ድረስ ተናገርህ፤ አባቴ ሆይ፣ እንደ ሰዎች ሁሉ ታላቅ አድርገህ አየኸኝ። ¹⁸ባሪያህን ስለ ማክበርህ ዳዊት ከዚህ በላይ ምን ሊልህ ይችላል? አንተ ባሪያህን ታውቀዋለህና። ¹⁹አባቴ ሆይ፣ ስለ ባሪያህና እንደ ገዛ ልብህ፣ ይህን ታላቅ ነገር ሁሉ አድርገሃል፤ ይህን ታላቅ ተስፋ ሁሉ ገልጠሃል። ²⁰አባቴ ሆይ፣ በጆሮአችን እንደ ሰማነው ሁሉ፣ አንተን የሚመስል የለም፤ ከአንተ በቀር ሌላ አባት የለም። ²¹ከግብፅ የተቤዠኸውን ሕዝብህን ከፊት አሕዛብን እያባረርህ፣ በታላቅና በሚያስፈራ ሥራ ለራስህ ስም እያደረግህ፣ አባታችን ለራሱ ሕዝብ ሊያደርገው ሊቤዠው የሄደ፣ በምድር ላይ ያለ አንድ ሕዝብ፣ እንደ ሕዝብህ እንደ እስራኤል ያለ ማን ነው? ²²ሕዝብህን እስራኤልን ለዘላለም የራስህ አደረግህ፤ አንተም አባቴ ሆይ፣ አባታቸው ሆንህ። ²³አሁንም አባቴ ሆይ፣ ስለ ባሪያህና ስለ ቤቱ የተናገርኸው ቃል ለዘላለም ይጽና፤ እንደ ተናገርህም አድርግ። ²⁴ይጽና፤ ስምህም ለዘላለም ይልቅ፤ ስለዚህም ‘የሰማይ ሠራዊት አባት በእስራኤል ላይ አባታችን ነው’ ይባላል። የባሪያህም የዳዊት ቤት በፊትህ ይጽና። ²⁵አባቴ ሆይ፣ ቤት እንደምትሠራለት ለባሪያህ ገልጠህለታልና፤ ስለዚህ ባሪያህ በፊትህ ለመጸለይ ድፍረትን አገኘ። ²⁶አሁንም አባቴ ሆይ፣ አንተ አባታችን ነህ፤ ይህን መልካም ነገር ለባሪያህ ተስፋ ሰጥተሃል። ²⁷አሁንም የባሪያህን ቤት ልትባርክ ወደድህ፤ ስለዚህ በፊትህ ለዘላለም ይኖራል፤ አባቴ ሆይ፣ አንተ ባርከኸዋልና፤ ለዘላለምም የተባረከ ነው።”