1 Maũndũ ma Matukũ ma Tene 17 FHB Father's Heart Bible™

17 ¹Rĩrĩa Daudi aarĩkirie gũikara nyũmba yake, akĩĩra Nathani ũrĩa mũnabii atĩrĩ, “Ta rora, niĩ ndũũraga thĩinĩ wa nyũmba ya mĩtarakwa, no ithandũku rĩa kĩrĩĩkanĩro kĩa Ithe witũ rĩikaraga rungu rwa itambaya cia hema.”

²Naake Nathani akĩmũcookeria Daudi atĩrĩ, “Ĩka maũndũ mothe marĩa marĩ ngoroinĩ yaku, amu Ithe witũ arĩ hamwe nawe.”

³No ũtukũ ũcio kiugo kĩa Ithe witũ gĩgĩkinyĩra Nathani, atĩrĩ:

⁴Thiĩ wĩre Daudi ndungata yakwa atĩrĩ, “Ũũ nĩguo Ithe waku ekuuga: Tiwe ũrĩa ũrĩngĩnjakĩra nyũmba ya gũikara.” ⁵Niĩ ndirĩ ndatũũra thĩinĩ wa nyũmba kuuma mũthenya ũrĩa ndaambatirie Isiraeli nginya ũmũthĩ—no ndĩthaamagia kuuma hema nginya hema, na kuuma gĩikaro nginya gĩikaro.

⁶Kũrĩa guothe ndaathaamagĩra hamwe na Isiraeli othe, hihi nĩ kũrĩ hĩndĩ ndaarĩtie kiugo kũrĩ ũmwe wa atuanĩri a ciira a Isiraeli, arĩa ndaathire marĩĩthie andũ akwa, ngĩũria atĩrĩ, ‘Nĩkĩĩ mũtaanjakĩra nyũmba ya mĩtarakwa?’

⁷Nĩ ũndũ ũcio wĩre ndungata yakwa Daudi atĩrĩ, “Ũũ nĩguo Ithe wa mbũtũ cia ita cia igũrũ ekuuga: Niĩ nĩndakuoire kuuma ũrĩithioinĩ, kuuma kũrũmĩrĩra rũũru, nĩguo ũtuĩke mwathi wa andũ akwa a Isiraeli. ⁸Ngoretwo hamwe nawe kũrĩa guothe ũthiĩte, na ngĩniina thũ ciaku ciothe mbere yaku. Na rĩu nĩ ngũtũma rĩĩtwa rĩaku rĩhaanane na rĩĩtwa rĩa andũ arĩa anene mũno a thĩ. ⁹Nĩ ngaamũrĩra andũ akwa a Isiraeli handũ, ndĩmahaande hau, matũũre mũciĩ wao ene, matekũnyariirwo rĩngĩ. Andũ aaganu matigacooka kũmahinyĩrĩria ta mbere, ¹⁰kuuma hĩndĩ ĩrĩa ndaamũrĩire atuanĩri a ciira igũrũ rĩa andũ akwa a Isiraeli. Nĩ ngaatooria thũ ciaku ciothe. Ngũkwĩra atĩrĩ: Ithe waku nĩagagwakĩra nyũmba. ¹¹Rĩrĩa matukũ maku makaathira, ũthiĩ gũkorwo hamwe na maithe maku ma tene, nĩ ngaarahũra rũciaro rwaku thutha waku, ũmwe wa aariũ aku, na nĩ ngaahaanda ũthamaki wake. ¹²Nĩ we ũkaanjakĩra nyũmba, na nĩ ngaahaanda gĩtĩ gĩake kĩa ũthamaki nginya tene. ¹³Niĩ nĩngatuĩka Ithe wake; nake atuĩke mũrũ wakwa. Ndikeheria wendo wakwa wa kĩrĩĩkanĩro kũrĩ we ta ũrĩa ndawehereirie ũrĩa warĩ mbere yaku. ¹⁴Nĩ ngaamũiga igũrũ rĩa nyũmba yakwa na ũthamaki wakwa nginya tene; nakĩo gĩtĩ gĩake kĩa ũthamaki gĩkaarũgama gĩkĩrĩ kĩrũmu nginya tene.”

¹⁵Naake Nathani akĩĩra Daudi ciugo icio ciothe na kĩoneki kĩu gĩothe.

Daudi Aikaraga Thĩ Mbere ya Ithe witũ Agegete

¹⁶Nake Mũthamaki Daudi agĩthiĩ thĩinĩ, agĩikara thĩ mbere ya Ithe witũ, akiuga atĩrĩ, “Niĩ nĩ ũ, Ithe wakwa, na nyũmba yakwa nĩ kĩ, atĩ nĩũndeehete nginya haha? ¹⁷Na ta ũrĩa gũkĩrĩ ũndũ mũnini maithoinĩ maku, Ithe wakwa—nĩwaarĩtie ũhoro wa nyũmba ya ndungata yaku ĩgĩkinya matukũinĩ marĩa marĩ kũraya, na ũkanyona ta mũndũ ũrĩa mũnene mũno wa andũ, Ithe wakwa. ¹⁸Daudi aacooka kuuga atĩa makĩria harĩwe nĩ ũndũ wa gũtĩĩithia ndungata yaku? Amu wee nĩũũĩ ndungata yaku. ¹⁹Ithe wakwa, nĩ ũndũ wa ndungata yaku na kuumana na ngoro yaku we mwene, nĩwĩkĩte maũndũ maya manene mothe, ũkĩguũria ciĩranĩro ici nene ciothe. ²⁰Ithe wakwa, gũtirĩ ũkũhaananĩte nawe, na gũtirĩ Ithe ũngĩ tiga wee, kũringana na ũrĩa ithuothe twĩiguĩire na matũ maitũ. ²¹Nũũ ũhaana ta andũ aku a Isiraeli, rũrĩrĩ rũu rũmwe rũrĩ gũkũ thĩ rũrĩa Ithe witũ aathiĩire gũkũũra matuĩke andũ ake we mwene, ũkĩĩgĩĩra rĩĩtwa na ciĩko nene na cia gũtĩĩithania, ũkĩingata ndũũrĩrĩ mbere ya andũ aku, arĩa wakũũrire kuuma bũrũri wa Misiri? ²²Nĩwatuire andũ aku a Isiraeli aku kĩũmbe nginya tene, nawe, Ithe wakwa, ũgĩtuĩka Ithe wao. ²³Na rĩu, Ithe wakwa, kiugo kĩrĩa waarĩtie igũrũ rĩa ndungata yaku na nyũmba yake nĩ gĩtũũre nginya tene; ĩka o ta ũrĩa warĩtie. ²⁴Nĩ gĩtũũre, narĩo rĩĩtwa rĩaku rĩnenehe nginya tene, nĩguo kuugwo atĩrĩ, ‘Ithe wa mbũtũ cia ita cia igũrũ nĩ we Ithe witũ igũrũ rĩa Isiraeli.’ Nayo nyũmba ya ndungata yaku Daudi nĩ ĩhaandwo mbere yaku. ²⁵Amu wee, Ithe wakwa, nĩwaguũrĩirie ndungata yaku atĩ nĩũkamĩakĩra nyũmba—nĩ ũndũ ũcio ndungata yaku nĩyonire ũmĩrĩru wa gũkũhooya mbere yaku. ²⁶Na rĩu, Ithe wakwa, wee nĩwe Ithe witũ; nĩweeranĩire ndungata yaku ũndũ ũyũ mwega. ²⁷Na rĩu nĩwĩtĩkĩrĩte kũrathima nyũmba ya ndungata yaku, nĩguo ĩtũũre mbere yaku nginya tene; amu wee, Ithe wakwa, nĩũmĩrathimĩte, na nĩ ĩrathimĩtwo nginya tene.”