1ይ ዜና 17 FHB Father's Heart Bible™

17 ¹ዳዊት ኣብ ቤቱ ምስ ተቐመጠ፥ ንነቢይ ናታን ከምዙይ በሎ፦ “እንሆ፥ ኣነ ኣብ ቤት ፅሕዲ እነብር ኣለኹ፤ ታቦት ኪዳን ኣቦና ግና ኣብ ትሕቲ መጋረጃታት ድንኳን ኣሎ።”

²ናታን ድማ ንዳዊት “ኣቦና ምሳኻ እዩ እሞ፥ ኵሉ እቲ ኣብ ልብኻ ዘሎ ግበር” ኢሉ መለሰሉ።

³በታ ለይቲ እቲኣ ግና ቃል ኣቦና ናብ ናታን መፀ፦

⁴ኪድ ንባርያይ ዳዊት ከምዙይ በሎ፦ “ኣቦኻ ከምዙይ ይብል ኣሎ፦ እታ ዝነብረላ ቤት እትሰርሓለይ ንስኻ ኣይኮንካን።” ⁵ካብታ ንእስራኤል ዘውፃእኩላ መዓልቲ ክሳዕ ሕዚ ኣብ ቤት ኣይተቐመጥኩን፤ ካብ ድንኳን ናብ ድንኳን፥ ካብ ማሕደር ናብ ማሕደር እናተዛወርኩ ነበርኩ።

⁶ምስ ኵሎም ደቂ እስራኤል ኣብ ዝተዛወርኩሉ፥ ንህዝበይ ክጓስዩ ኻብ ዝኣዘዝክዎም ፈረድቲ እስራኤል ንሓደኳ ‘ስለ ምንታይ ቤት ፅሕዲ ዘይሰራሕኹምለይ?’ ኢለዶ ቃል ተዛሪበ እየ?

⁷ስለዙይ ንባርያይ ዳዊት ከምዙይ በሎ፦ “ኣቦ ሰራዊት ሰማይ ከምዙይ ይብል ኣሎ፦ ኣብ ልዕሊ ህዝበይ እስራኤል መራሒ ክትከውን፥ ካብ መጓሰዪ፥ ካብ ምስዓብ ኣባጊዕ ኣምፃእኹኻ። ⁸ኣብ ዝኸድካዮ ዅሉ ምሳኻ ነበርኩ፥ ንዅሎም ፀላእትኻ ኸዓ ካብ ቅድሜኻ ቘረፅክዎም። ሕዚ ድማ ስምካ ኸም ስም እቶም ኣብ ምድሪ ዝዓበዩ ኽገብሮ እየ። ⁹ንህዝበይ እስራኤል ቦታ ኽገብረሎም፥ ኣብኡ ድማ ክተኽሎም እየ፤ ኣብ ገዛእ ርስቶም ክነብሩ እዮም፥ ድሕሪ ሕዚ ኣይክናወፁን እዮም። ከምቲ ቐደም ሕሱማት ሰባት ድሕሪ ሕዚ ኣይከጨንቕዎምን እዮም፥ ¹⁰ከምቲ ኣብ ልዕሊ ህዝበይ እስራኤል ፈረድቲ ዝሸምኩሉ ዘመን ድማ፥ ንዅሎም ፀላእትኻ ከዋርዶም እየ። እብለካ ኣለኹ፦ ኣቦኻ ቤት ክሰርሐልካ እዩ። ¹¹መዓልቲታትካ ምስ ተፈፀመ ናብ ኣቦታትካ ምስ ከድካ፥ ነቲ ድሕሬኻ ዝኸውን ዘርእኻ፥ ሓደ ኻብ ደቅኻ፥ ከተስኦ እየ፤ ንመንግስቱውን ከፅንዓ እየ። ¹²ንሱ እዩ እቲ ቤት ዝሰርሓለይ፥ ኣነ ኸዓ ዙፋኑ ንዘለኣለም ከፅንዖ እየ። ¹³ኣነ ኣቦኡ ክኸውን እየ፥ ንሱ ኸዓ ወደይ ክኸውን እዩ። ከምቲ ካብቲ ቕድሜኻ ዝነበረ ዘርሓቕኩዎ፥ ምሕረተይ ካብኡ ኣየርሕቕን እየ። ¹⁴ኣብ ልዕሊ ቤተይን መንግስተይን ንዘለኣለም ከቕሞ እየ፤ ዙፋኑ ኸዓ ንዘለኣለም ፅኑዕ ክኸውን እዩ።”

¹⁵ናታን እዝ ዅሉ ዘረባ እዙይን እዝ ዅሉ ራእይ እዙይን ንዳዊት ነገሮ።

ዳዊት ኣብ ቅድሚ ኣቦና ተገሪሙ ተቐመጠ

¹⁶ሽዑ ንጉስ ዳዊት ኣትዩ ኣብ ቅድሚ ኣቦና ተቐመጠ፥ ከምዙይ ከዓ በለ፦ “ክሳዕ እዙይ ዘብፃሕካኒ፥ ኦ ኣቦ፥ ኣነ መን እየ፥ ቤተይከ እንታይ እዩ? ¹⁷እዙይ ድማ ኣብ ኣዒንትኻ ንእሽተይ ኮይኑ ተርእዩካስ፥ ኦ ኣቦ፥ ብዛዕባ እታ ናብ ርሑቕ ዝመፅእ ጊዜ እትበፅሕ ቤት ባርያኻ ተዛሪብካ፥ ከም እቶም ዝዓበዩ ሰባት ጌርካ ኸዓ ረአኻኒ፥ ኦ ኣቦ። ¹⁸ዳዊት ብዛዕባ ምኽባር ባርያኻ፥ ደጊም እንታይ ክብለካ ይኽእል? ንስኻ ንባርያኻ ትፈልጦ ኢኻ እሞ። ¹⁹ኦ ኣቦ፥ ምእንቲ ባርያኻን ከም ልብኻን፥ እዝ ዅሉ ዓብዪ ነገር እዙይ ገበርካ፥ እዝ ዅሉ ዓብዪ ተስፋታት እዙይውን ገለፅካ። ²⁰ኦ ኣቦ፥ ከምቲ ብኣእዛንና ዝሰማዕናዮ ዅሉ፥ ከማኻ ዝበለ የለን፥ ብዘይ ንስኻ ኻልእ ኣቦ ድማ የለን። ²¹ከም ህዝብኻ እስራኤል ዝበለ መን ኣሎ? ንሳ ኣብ ምድሪ፥ ኣቦና ንርእሱ ህዝቢ ክገብራ ኽቤዝዋ ዝኸደ፥ ሓንቲ ህዝቢ እያ፤ ብዓበይትን ዝፍርሑን ግብርታት ንርእስኻ ስም ገበርካ፥ ነቲ ካብ ግብፂ ዝተቤዘኻዮ ህዝብኻ ካብ ቅድሚኡ ንህዝብታት ኣሳጒግካ። ²²ንህዝብኻ እስራኤል ንዘለኣለም ናይ ርእስኻ ገበርካዮም፥ ንስኻ ኸዓ፥ ኦ ኣቦ፥ ኣቦኦም ኮንካ። ²³ሕዚ ኸዓ፥ ኦ ኣቦ፥ እቲ ብዛዕባ ባርያኻን ቤቱን እተዛረብካዮ ቓል ንዘለኣለም ይፅናዕ፤ ከምቲ እተዛረብካዮ ድማ ግበር። ²⁴ይፅናዕ፥ ስምካ ኸዓ ንዘለኣለም ይዕበ፥ ከምዙይ ከዓ ይበሃል፦ ‘ኣቦ ሰራዊት ሰማይ ኣብ ልዕሊ እስራኤል ኣቦና እዩ።’ ቤት ባርያኻ ዳዊት ድማ ኣብ ቅድሜኻ ይፅናዕ። ²⁵ኦ ኣቦ፥ ንስኻ ንባርያኻ ቤት ከም እትሰርሓሉ ገሊፅካሉ ኢኻ እሞ፥ ባርያኻ ኣብ ቅድሜኻ ኽፅሊ ትብዓት ረኸበ። ²⁶ሕዚ ኸዓ፥ ኦ ኣቦ፥ ንስኻ ኣቦና ኢኻ፤ ነዝ ፅቡቕ ነገር እዙይ ድማ ንባርያኻ ተስፋ ኣተኻዮ። ²⁷ሕዚ ድማ ንዘለኣለም ኣብ ቅድሜኻ ምእንቲ ኽፀንሕ፥ ንቤት ባርያኻ ክትባርኽ መሪፅካ ኢኻ፤ ኦ ኣቦ፥ ንስኻ ባሪኽካዮ ኢኻ እሞ፥ ንዘለኣለም ብሩኽ እዩ።”