1 ዜና መዋዕል 18

18 ¹ከዚህ በኋላ ዳዊት ፍልስጥኤማውያንን አሸንፎ አስገዛቸው፤ ጌትንና መንደሮቿን ከፍልስጥኤማውያን እጅ ወሰደ። ²ሞዓብንም አሸነፈ፤ ሞዓባውያንም ለዳዊት ተገዥዎች ሆኑ፤ ግብርም አመጡለት።

³ዳዊት ሥልጣኑን እስከ ኤፍራጥስ ወንዝ ለማስፋፋት ሲሄድ፣ የሶባን ንጉሥ ሀዳድዔዘርን እስከ ሐማት ድረስ አሸነፈ። ⁴ዳዊት ከእርሱ 1,000 ሠረገሎች፣ 7,000 ፈረሰኞችና 20,000 እግረኛ ወታደሮች ማረከ። ለመቶ ሠረገሎች የሚበቁትን አስቀርቶ የሠረገላ ፈረሶችን ሁሉ ጅማታቸውን ቈረጠ። ⁵የደማስቆ አራማውያን የሶባን ንጉሥ ሀዳድዔዘርን ለመርዳት በመጡ ጊዜ፣ ዳዊት 22,000 አራማውያንን ገደለ። ⁶ዳዊትም በአራም-ደማስቆ ጦር ሰፈሮች አኖረ፤ አራማውያንም ግብር የሚከፍሉ አገልጋዮቹ ሆኑ። አባታችንም ዳዊት በሄደበት ሁሉ ድል ሰጠው። ⁷ዳዊት የሀዳድዔዘር መኳንንት የተሸከሟቸውን የወርቅ ጋሻዎች ወስዶ ወደ ኢየሩሳሌም አመጣቸው። ⁸ከሀዳድዔዘር ከተሞች ከጥብሐትና ከኩን፣ ዳዊት እጅግ ብዙ ናስ ወሰደ፤ ሰሎሞንም የናስ ባሕሩን፣ ዓምዶቹንና የናስ ዕቃዎችን ሠራበት።

⁹የሐማት ንጉሥ ቶዑ ዳዊት የሶባን ንጉሥ የሀዳድዔዘርን ሰራዊት ሁሉ እንዳሸነፈ በሰማ ጊዜ፣ ¹⁰ልጁን ሀዶራምን ወደ ንጉሡ ዳዊት ላከ፤ ሀዳድዔዘር ከቶዑ ጋራ ብዙ ጊዜ ይዋጋ ስለ ነበር፣ ዳዊት ሀዳድዔዘርን ተዋግቶ ስላሸነፈው ሰላም ሊለውና ሊባርከው። ሀዶራምም ከወርቅ፣ ከብርና ከናስ የተሠሩ ልዩ ልዩ ዕቃዎችን አመጣ። ¹¹ንጉሡ ዳዊት ከኤዶም፣ ከሞዓብ፣ ከአሞናውያን፣ ከፍልስጥኤማውያንና ከአማሌቅ ከሕዝቦች ሁሉ ከወሰደው ከብርና ከወርቅ ጋር እነዚህን ለአባታችን ቀደሰ።

¹²የጽሩያ ልጅ አቢሳ በጨው ሸለቆ 18,000 ኤዶማውያንን ገደለ። ¹³ዳዊትም በኤዶም ጦር ሰፈሮች አኖረ፤ ኤዶማውያንም ሁሉ ተገዥዎቹ ሆኑ፤ አባታችንም በሄደበት ሁሉ ድል ሰጠው።

ዳዊት በፍትሕና በጽድቅ ነገሠ

¹⁴ስለዚህ ዳዊት በእስራኤል ሁሉ ላይ ነገሠ፤ ለሕዝቡ ሁሉ ፍትሕንና ጽድቅን ያደርግ ነበር። ¹⁵የጽሩያ ልጅ ኢዮዓብ የሰራዊቱ አለቃ ነበር፤ የአሒሉድ ልጅ ኢዮሣፍጥ ታሪክ መዝጋቢ ነበር፤ ¹⁶የአሒጦብ ልጅ ሳዶቅና የአብያታር ልጅ አቢሜሌክ ካህናት ነበሩ፤ ሻውሻ ጸሐፊ ነበር፤ ¹⁷የዮዳሄ ልጅ በናያስ ኪሬታውያንንና ፍሌታውያንን ይመራ ነበር፤ የዳዊትም ልጆች በንጉሡ አጠገብ ከፍተኛ ባለሥልጣኖች ሆነው ያገለግሉ ነበር። ^a a v17 ኪሬታውያንና ፍሌታውያን የዳዊት ምርጥ የንጉሣዊ ዘበኛ ክፍሎች ነበሩ፤ ምናልባትም የሙያ ባዕዳን ወታደሮች ነበሩ።