Seneibü Bouei Dawid la Thükbü Pendou Kuda

Thükbü kümsilei ngühli—Filistiabü, Moab, Zoba, Aram, Edom—khüm shuong lotan loubü, hoba Dawidei adanglabü chem shanga chinam thanan phobü. Nyibou laubü ngüh kho: Seneibü Bouei haoei ai jungto haubü pendoua hao la thükbü kukei, hoba haoei ngühmaanglanko müt pendou thüka leiyeikei.

Chapter 18.

Tou kho phaia Dawidei Filistiabü thükkei, hoba haoen kimbei, hoba Dawidei Filistiabü ik ka Gath hoba khübü sang yoan sungkei. Hobaje haoei Moab to thükkei, hoba Moabbü shuong Dawid khangenbü yeikei hoba hao to khüm loukei.

Hobaje Dawidei jembü leilang Eufrates shumang to lengaila haujinei, Zobabü Choba Hadadezer Hamath sühko thükkei. Hobaje Dawidei hao ka kailong hajar che hoba koli sepai hajar nyet sungkei, hoba youeibü sepai hajar saoche sungkei. Hobaje kailong koli youshi pendou Dawidei wapan apbukei, aieilausi kailong saongao shanga haoen thanan phokei. Hobaje ladang Damaskaa kibü Siriabü shuongei Zobabü Choba Hadadezer thuila loukei, Dawidei Siriabü müt hajar saoto nyi haitikei. Hobaje Dawidei sepai tan kho Damaskaa kibü Siriaa kaodaka phokei, hoba Siriabü shuong kho hao khangen to yeibei, hoba hao to khüm loukei. Hobaje Seneibü Bouei Dawid haushang pendoua thükbü kukei. Hobaje Dawidei Hadadezer khangenbü shuongei jungbü honeibü aih shuong sungkei, hoba khübü kho Jerusalem to sungbakei. Hobaje Tibhath hoba Cun ka, Hadadezer sangnyu shuong ka, Dawidei chinam juong künkei, hoba khonei Solomonei chinamei kümbü yungnyu, thaonyu shuong hoba chinamei kümbü peisilei kümbei.

Ladang Hamatbü Choba Toiei Dawidei Zobabü Choba Hadadezer lakjaibü tan pendou thüka dogo ditkei, Kheijinei Toiei hao to salem kula hoba haütila shanga, hao shou Hadoram Dawid Choba jungto hautikei, aishanga Dawidei Hadadezer yoa khulim loukei hoba hao to wapyo thükkei; Hadadezer kho ladüngnei Toi yoa shuokko kibü müt che kikei. Hobaje Hadoramei hon, chandinam hoba chinamei kümbü peisilei lulu lulu jungan loukei. Dawid Chobaei jembü pendou, kho Edom, Moab, Ammonbü shou si shuong, Filistiabü hoba Amalek, ka sungbü chandinam hoba hon yoa, habü ho Seneibü Bou la khümbo kukei.

Zeruiaeibü shou Abishaiei Jem pholia Edombü hajar anthükset haitikei. Hobaje Dawidei sepai tan kho Edom kaodak pendou ka phokei. Edombü müt pendou kho hao khangen to yeibei. Hoba haushang pendoua Seneibü Bouei Dawid to thükbü kukei.

Dawidei Matjem hoba Ngühmaiei Choba Songdakkei

Kheijinei Israel pendou thüka Dawidei Choba yeibei, hoba hao mütli jembü pendou la ngühmai hoba matjem kümbei. Zeruiaeibü shou Joab kho lakjaibü tan thüka kikei, hoba Ahiludeibü shou Jehoshafat doletbou kikei. Ahitubeibü shou Zadok hoba Abiathareibü shou Ahimelek ungshedbou shuong kikei, hoba Shavsha dobou kikei. Jehoiadaeibü shou Benaia Keretbü hoba Peletbü leiyeibü kikei, hoba Dawideibü shousi shuong Choba thenko thüka kibü jaishou shuong kikei. ^a